Read Batak Karo JEREMIA 52 Bible Online

JEREMIA 52 - Batak Karo bible

JEREMIA 52

¹Tupung Sedekia jadi raja Juda umurna enggo dua puluh sada tahun. Dekahna ia merentah i Jerusalem sepuluh sada tahun. Gelar nandena Hamutal, anak si Jeremia i kuta Lipna nari.

²Raja Sedekia erdosa kempak TUHAN bali ras si ilakoken Raja Joyakim.

³Lanai tanggung-tanggung rawana TUHAN man kalak Jerusalem ras man kalak Juda, seh maka iambengkenNa kalak enda i bas adep-adepenNa nari. Sedekia berontak ngelawan Nebukadnesar raja Babilon,

⁴e maka reh Nebukadnesar ras kerina tenterana ngelawan Jerusalem i bas wari pesepuluhken bulan pesepuluhken tahun pesiwahken pemerentahen Sedekia. Ipajekkenna kemahna i darat kuta. Ipantekina benteng-benteng ngkelewetisa, [95†]

⁵jenari ikepungna seh tahun pesepuluh sadaken pemerentahen Sedekia.

⁶I bas wari pesiwahken, bulan peempatken i bas tahun e ka, tupung e kelihen mesangat, seh maka lanai lit kai pe si man pangan jelma si nterem.

⁷Tupung e me benteng-benteng kuta e iruntuhken kalak. Aminna pe kuta e enggo ikepung kalak Babilon, tapi tupung berngi kiam me kerina tentera e. Kiam ia arah peken kerajan, terus arah pintu gerbang si lit i kelang-kelang dua tembok, jenari lompat arah Baluren Lau Jordan. [96†]

⁸Raja Sedekia iayak tentera Babilon jenari itunduksa i taneh kendit deherken Jeriho, itangkapna. Kerina tenterana kiam nadingken ia.

⁹Sedekia ibaba ku Raja Nebukadnesar si enggo nimai i kuta Ripla i daerah Hamat. I jah me Nebukadnesar mereken ukumen man Sedekia.

¹⁰I adep-adepen Sedekia i Ripla ibunuhi me kerina anakna si dilaki. Man peminpin-peminpin Juda pe ibereken ukumen mate.

¹¹Kenca bage ipulditkenna mata Sedekia jenari igarikenna dingen ibabana ku Babil. Sedekia tetap tading i bas penjara i Babil seh ngayak matena. [97†]

¹²Tanggal sepuluh bulan lima, tahun pesepuluh siwahken pemerentahen Nebukadnesar, raja Babilon Nebusaradan e me penasehat raja ras puanglima tenterana, mengketi Jerusalem.

¹³Icilukna Rumah Pertoton, istana dingen rumah kalak si mbelin Jerusalem. [98†]

¹⁴Tenterana ngeruntuhken benteng-benteng kuta.

¹⁵Kalak si tading i bas kuta e pande-pande si beluh, kerina kalak si enggo erpihak kempak Babilon kerina iangkut Nebusaradan ku Babilon.

¹⁶Tapi i Juda itadingkenna kalak si musil-musil, si la lit kadena pe. Isuruhna ia erdahin i bas peken anggur dingen erjuma.

¹⁷Kalak Babilon merperken tiang tembaga ras gereta-gereta si lit i bas Rumah Pertoton. Tong tembaga si mbelin e iperperkenna, jenari kerina tembaga ibabana ku Babilon. [99†]

¹⁸Ibabana pe belanga-belanga, sendok-sendok, piso, siram-siram, calung-calung ras piala-piala subuk si ibahan i bas emas, tembaga entah pirak si ipake i bas kebaktin.

¹⁹Kerina perkakas-perkakas si ibahan i bas emas entah pirak nari ibabana: mangkuk-mangkuk kitik, panci ingan maba rara, mangkuk ingan dareh persembahen, ingan abu, tangke lampu, mangkuk ingan kumenen, ras mangkuk si ipake guna lau anggur si man amburenken.

²⁰Perkakas tembaga si enggo ibahan Raja Salomo guna Rumah Pertoton e dua tiang tembaga, gereta, tong mbelin, sepuluh dua lembu si natang tong e, la tertimbang beratna.

²¹[21-22] Tiang si dua e bali tempasna, 8 meter ganjangna; 5,3 meter kelewetna. Tiang e kosong i bas, kapalna 75 melimeter. I datas ancuk-ancuk tiang-tiang lit sada takal tembaga, 2,2 meter ganjangna, sekelewetna ihiasi alu buah delima si ibahan i bas tembaga nari ka.

²³I bas kisi-kisi tep-tep tiang lit seratus buah delima. Siwah puluh enem i bas si seratus e idah i teruh nari.

²⁴Tole, puanglima Nebusaradan nangkap Imam si Mbelin Seraya, Sepanya, imam tingkat dua, dingen telu kalak nari kalak si mbelin si erdahin i bas Rumah Pertoton.

²⁵I bas kuta e nari ibabana opsir si enggo jadi puanglima pasukan, pitu kalak penasehat raja sitading denga i bas kuta e, wakil puanglima, si ertanggung jawab i bas pencataten tentera, janah pitu si mbelin si debanna.

²⁶Kerina e ibaba Nebusaradan ku raja Babilon si sangana i kuta Ripla,

²⁷i daerah Hamat. I jah isiksana ia kerina jenari ibunuh. Bage me, kalak Juda enggo iangkut ku pembuangen.

²⁸Enda me kalak si iangkut Nebukadnesar jadi tabanen: pesepuluh pitu tahunken ia jadi raja, iangkutna 3.023 kalak.

²⁹I bas tahun pesepuluh waluhken iangkutna 832 kalak i Jerusalem nari;

³⁰i bas pedua puluh dua tahunken, 745 iangkut Nebusaradan. Kerina lit 4.600 kalak teremna si iangkut.

³¹I bas tahun kenca Ewil-Merodak jadi raja Babilon, icidahkenna kiniulinna kempak Joyakin raja Juda, alu mulahi ia i bas penjara nari. Si enda jadi i bas wari dua puluh lima bulan sepuluh dua e me pe telu puluh pitu tahunken Joyakin enggo jadi tahanen.

³²Ibahan Ewil-Merodak si mehuli man bana. Iberekenna pangkat si mbelin man bana, belinen asangken raja-raja si deban si lit i bas pembuangen i Babilon.

³³E maka Joyakin ipelepas isambarina paken penjarana jenari man ia i bas meja raja kidekah umur geluhna.

³⁴Tep-tep wari kidekah umur geluhna tetap ibereken raja Babilon belanjana.