Read Batak Karo JEREMIA 7 Bible Online

JEREMIA 7 - Batak Karo bible

JEREMIA 7

¹ [1-3] TUHAN nuruh aku ku pintu gerbang Rumah Pertoton; arah e me bangsa Juda bengket ersembah. IkatakenNa man bangku maka tedis aku i je meritaken man bangsa e kai si ikataken TUHAN si Mada Kuasa, Dibata Israel man bana nina, “Ubahlah lagu langkah ras perbahanenndu, e maka Kupediat kam terus ringan i jenda.

⁴Olanai itekindu ranan penipu si ngatakenca, ‘Terkelin kap kita! Enda kap Rumah Pertoton TUHAN, enda kap Rumah Pertoton, enda kap Rumah Pertoton TUHAN!’

⁵Ubahlah lagu langkahndu, olanai perusur-usur perbahanenndu. Bahanlah si bujur sapih-sapih kam,

⁶olanai idehkenndu kalak asing, anak-anak melumang ras diberu balu-balu. Olanai iamburkenndu dareh kalak si la ersalah i bas negeri enda. Olanai kam nembah man dibata-dibata si deban si erbahanca kam ceda.

⁷Adi kam robah, Kubere kam terus ringan i jenda, i bas negeri si enggo Kubereken jadi sikerajangen nini-ninindu rasa lalap seh rasa lalap.

⁸Nehenlah! Pengarapenndu itamakenndu man ranan si la tuhu.

⁹Kam nangko, munuh, erlua-lua, melasken sumpah si la tuhu, nutung persembahen man Baal, nembah man dibata si la itandaindu.

¹⁰Ilakokenndu kerina si ciga ateKu e, kenca bage reh kam dingen tedis i adep-adepenKu, i bas Rumah PertotonKu, jenari nindu, ‘Terkelin kap kita!’

¹¹Iakapndu kin maka RumahKu e ingan penamun? Enggo Kuidah kerina kai si ibahanndu. [10†]

¹²Laweslah ku Silo, ingan si pemena Kupilih man inganKu isembah. Nehenlah kai si Kubahan man ingan e erkiteken dosa-dosa bangsangKu Israel. [11†]

¹³Enggo ilakokenndu kerina dosa si enda, aminna pe enggo Kuulih-ulihi ngerana man bandu, tapi la kam nggit megikenca. Adi Kulebuh kam la kam ngaloi.

¹⁴E maka kai si enggo Kubahan kempak Silo, Kubahan ka me kempak Rumah PertotonKu, penalemenndu e. I jenda i bas ingan si enggo Kubereken man nini-ninindu ras man bandu seri perbahanenKu bagi si Kubahan man Silo.

¹⁵Kupelawes kam i adep-adepenKu nari, bali ras pemelawesKu sima-simandu Israel. Aku kap TUHAN si enggo ngerana man bandu.”

¹⁶Nina TUHAN, “O Jeremia, ola ertoto guna bangsa enda. Ola kam erlebuh entah ertoto guna ia, ola sekseki Aku, sabap labo kam Kubegiken.

¹⁷La kin idahndu kai si ibahanna i bas kuta-kuta Juda ras i gedang-gedang dalan Jerusalem?

¹⁸Anak-anak pepulung ranting, dilaki-dilaki pegara api, diberu-diberu erbahan cimpa guna ipersembahken man dibata-dibata si igelarina Kemberahen Langit. Ipirpirkenna pe lau anggur kempak dibata si deban, gelah arah e mesui ateKu ibahanna. [12†]

¹⁹Tapi ateKu kin mesui? Lang! Bana jine nge ijurukenna dingen ia nge si erbahanca akapna mela.

²⁰Dage Aku TUHAN si Erdolat Kutungkasken me pernembeh ateKu si gara ku Rumah Pertoton e. Kutungkasken e ku babo manusia ras ku asuh-asuhenna, ku batang-batang kayu, ras ku ulih jumana. NembehKu bali ras api si gara, janah la ise pe ngasup nimpetisa.

²¹O bangsangKu, deba itutungndu persembahenndu i babo batar-batar, deba banci ipan kam. Tapi Aku TUHAN ngatakenca maka labo lit lainna bicara kerina gia ipanndu.

²²Tupung nini-ninindu ndarat i Mesir nari labo perentah-perentah kerna persembahen tutungen si Kubereken entah aturen-aturen kerna persembahen si deban.

²³Tapi perentah si Kubereken e me maka erkemalangen man bangKu, gelah Aku jadi Dibatana dingen ia jadi bangsangKu. Kukataken man bana maka ia nggeluh rikutken si enggo Kuperentahken, alu bage si mehuli jadi man bana.

²⁴Tapi la ia patuh, la diatena pe. Alu merawa ilakokenna rikutken ate-atena, dingen sura-surana si jahat nge iikutkenna. Lagu langkahna reh jahatna, labo reh ulina.

²⁵Menaken kin tupung nini-ninindu ndarat i Mesir nari seh ngayak paksa enda la erngadi-ngadi. Kusuruh persuruhenKu nabi-nabi ku tengah-tengahndu.

²⁶Tapi ise pe la lit si erdiate. Ise pe la lit megikenca. Tapi reh kam ngelawan lebihen asa nini-ninindu nai.

²⁷E maka, o Jeremia, kam me melasken kerina ranan enda man bangsangKu, tapi labo kam idengkehkenna. Ilebuh kam ia tapi labo kam diatena pe.

²⁸Turikenlah man bana maka bangsana la ngikutken Aku, TUHAN Dibatana; la ia erlajar arah ukumen si ialokenna. Kepatuhen man TUHAN lanai lit i bas ia. Si e kerina lanai sitik pe icakapken.”

²⁹“Erceda atelah, o kalak Jerusalem; guntinglah bukndu, ambekkenlah. Endekenlah ende-enden ate ceda i datas ancuk-ancuk deleng, erkiteken Aku TUHAN sangana keke rawangKu, enggo Kutulak bangsangKu.

³⁰Kalak Juda enggo ngelakoken si jahat. Iamparkenna gana-ganana si ciga ateKu i bas Rumah Pertoton, enggo iliamina e.

³¹I Baluren Hinnom ipajekkenna batar-batar si ibahanna gelarna Topet, gelah banci ipersembahkenna anakna si diberu ras si dilaki i datas api si gara. La lit perentahKu man bana lako erbahan bage -- labo lit sitik pe e i bas ukurKu. [13†]

³²Janah seh me paksana ingan e lanai igelari Topet entah Baluren Hinnom, tapi Baluren Penggelehen, sabap i je ikuburina jelma erkiteken lanai lit ingan si deban ingan ngkuburkenca.

³³Bangke-bangke e ipangani perik-perik dingen rubia-rubia si meliar janah ise pe la lit si nggurbasa.

³⁴Negeri e jadi taneh mesawang. I kuta-kuta Juda dingen i dalan-dalan i Jerusalem lanai Kubahan lit i je sora surak-surak dingen sora keriahen. Lanai lit i je sora pesta erdemu bayu si meriah. [14†]