Read Batak Karo JEREMIA 9 Bible Online

JEREMIA 9 - Batak Karo bible

JEREMIA 9

¹Bicara sumbul lau min takalku matangku pancur iluh. Tangis me aku suari ras berngi erkiteken bangsangku enggo ibunuhi.

²Bicara lit min inganku tading i gurun pasir ndauh i bas bangsangku nari tentu aku lawes ku je nadingken bangsangku. Bangsangku si erlua-lua perpulungen kalak si jahat ukurna.

³Lalap atena ngataken si la tuhu, kini la bujuren nge, labo kinibujuren si ngkuasai negeri e. Nina TUHAN, “BangsangKu runut erbahan kejahaten, dingen la ietehna maka Aku me Dibatana.”

⁴Tep-tep kalak la banci la erjaga-jaga nandangi temanna, janah sekalak pe lanai banci tek nandangi seninana. Sabap tep-tep senina bali penipuna ras Jakup, kerina kalak encekuraki temanna.

⁵ [5-6] Kerina si mabai temanna papak, dingen la lit kalak melasken kata tuhu. Dilahna enggo semal melasken kata guak, dingen la ia nggit ngadi erbahan salah. Runut ia erbahan kejahaten penipun siarak-araken ras penipun. Ikataken TUHAN maka bangsaNa enggo nulak Ia.

⁷Erkiteken si e nina TUHAN si Mada Kuasa, “Kuane me bangsangKu desken besi, jenari Kuuji ia. Kai denga kin si banci Kubahan nandangi bangsangKu?

⁸Dilahna desken anak panah si erbisa, lalap ia erbual. Man temanna mehuli kerina rananna tapi situhuna siding nge si itogengna.

⁹La kin nge ia Kuukum erkiteken perbahanenna e? La kin Aku erbalas man bangsa si bagenda? Aku kap Dibata si ngerana enda.”

¹⁰Ningku, “Ceda kal ateku erkiteken deleng-deleng, tangis aku erkiteken mbalmbal sabap enggo kerah kerina, dingen ise pe lanai lit mentas arah e. Sora asuh-asuhen pe lanai terbegi, perik-perik pe enggo kabang, rubia-rubia si meliar pe enggo lawes.”

¹¹Nina TUHAN, “Kubahan maka Jerusalem bali ras batu si ergun-gun, man ingan serigala nggeluh. Kuta-kuta Juda Kujadiken gurun pasir, sekalak pe la lit ringan i je.”

¹²Nungkun aku ningku, “O TUHAN, ngkai maka negeri enda ceda janah kerah desken gurun pasir, seh maka ise pe la lit mentas arah e? Ise kin ngasup ngantusisa si e? Man ise kin enggo iterangkenNdu si e gelah banci iturikenna ka man kalak si deban?”

¹³Nina TUHAN ngaloisa, “Si enda kerina jadi erkiteken bangsangKu enggo nundalken ajaren si enggo Kubereken man bana. Lanai Aku iikutkenna, lanai idalankenna kai si Kukataken man bana.

¹⁴Tapi mekeng ia, dingen isembahna gana-gana Baal bagi si iajarken nini-ninina bana.

¹⁵E maka dengkehkenlah kai ateKu Kubahan, TUHAN si Erdolat, Dibata nu Israel: Kubereken man bangsangKu sirap-rap man panganna dingen racun man inemenna.

¹⁶Kukerapken ia ku tengah-tengah bangsa-bangsa si subuk ia bage pe nini-ninina la pernah nandaisa. Kusuruh pasuken tentera merangsa seh Kukernepken ia tuhu-tuhu.”

¹⁷Nina TUHAN si Mada Kuasa, “Ukurkenlah kai si sangana jadi! Dilolah kalak si beluh tangis-tangis, diberu-diberu si ngendeken ende-enden penguburen.”

¹⁸Nina bangsa e, “Kataken man bana maka pedas-pedas ia reh, janah ngendeken ende-enden penguburen man banta, seh maka matanta dem alu iluh dingen seliben matanta besar erkiteken ngandung.”

¹⁹Dengkehkenlah sora tangis i Sion nari nina, “Enggo cilaka kita, enggo mela kal siakap. Terpaksa sitadingken negerinta, rumahta enggo irontasken kerina.”

²⁰Ningku, “Dengkehkenlah TUHAN, diberu-diberu, perdiatekenlah rananNa. Ajarilah anakndu si diberu uga ngandung, ajarilah teman-temanndu uga ngendeken ende-enden penguburen.

²¹Kematen enggo bengket arah tingkapta, bengket ia ku bas istananta itampulna anak-anakta i pasar-pasar, bage pe anak si nguda i tengah tiga.

²²Bangke manusia merap i japa pe; bali ras pupuk si ergun-gun i juma, desken buah gandum si isabi jenari tading ibahan si rani, la lit sekalak pe si pepulungsa. Enda me kata si isuruh TUHAN kubelasken.”

²³Nina TUHAN, “Kalak pentar ola megah iakapna kerna kepentarenna. Kalak megegeh ola iagahkenna gegehna, kalak bayak ola megah iakapna kerna kebayakenna.

²⁴Adi lit kalak atena ermegah ate, megahlah iakapna perban itandaina Aku. Sabap keleng ateKu tetap kap, dingen Kubahan kai si bujur ras benar. E me perkara si erbahanca meriah ukurKu, Aku TUHAN si enggo ngerana.” [17†]

²⁵ [25-26] Nina TUHAN, “Seh me paksana Kuukum bangsa Mesir, Juda, Edom, Amon, Moap ras bangsa padang gurun, si enggo nggunting bukna jadi gendek. Kerina bangsa e enggo isunat, tapi pusuhna la isunat. La lit sada pe i bas bangsa enda nari, bage pe kalak Israel encikep perpadanenKu.”