Read Batak Karo PERNGANDUNGEN 1 Bible Online

PERNGANDUNGEN 1 - Batak Karo bible

PERNGANDUNGEN 1

¹Andiko lengetna Jerusalem; mbarenda seh kal riahna. Mbarenda ermulia i tengah bangsa-bangsa, genduari bali ras diberu balu-balu, si biak raja e enggo jadi budak.

²Gedang-gedang berngi tangis ngandung ia; iluhna maler ku pipina. Kerina temanna mbarenda la ngapuli ia. Teman-temanna enggo ngelok, kerina enggo jadi imbangna.

³Kalak Juda enggo jadi budak si musil-musil ipaksa lawes i rumahna nari. Tading i negeri kalak la lit ingan si ikataken ia empuna. Ikepung musuh-musuh ia la lit dalanna pulah.

⁴Genduari la lit kalak si bengket ku bas Rumah Pertoton, nembah tupung wari-wari si badia. Singuda-nguda ngendeken tangis-tangis janah imam-imam kelsehen nari nge ngenca. Pintu gerbang enggo melenget, Sion enggo mesui atena.

⁵Imbang-imbangna enggo menang, ikuasai musuhna ia. TUHAN kap si mahanca mesui atena, erkiteken dosana si mbelin. Anak-anakna enggo itangkap dingen iangkut tertaban.

⁶Kemulian Jerusalem enggo bene, peminpin-peminpinna desken belkih, si kote perbahan melihe. Gegehna enggo keri erkiteken iayak-ayak perburu.

⁷I bas runtuhenna si melenget genduari, Jerusalem nginget kemulianna si nai. Tupung ia italuken musuh-musuhna, la lit kalak si nampati ia. Itawai imbangna ia tupung ketalunna.

⁸Kemulianna enggo bene, manjang-anjang ia janah ciga ate kalak kempaksa. Kelsehen ia, ibunikenna ayona perban mela iakapna. Jerusalem jine erbahanca ia melket ibahan dosana si mesangat.

⁹Kemelketenna teridah kal tapi la icidahkenna sikerajangenna. Enggo mesangat kal perndabuhna, la lit ise pe si ngasup ngapulisa. Imbang-imbangna enggo menang, e maka serko ia mindo perkuah ate man TUHAN.

¹⁰Imbang-imbangna enggo ngerampuki erta-ertana. Idahna pe imbangna e bengket ku bas Rumah Pertoton, ku ja TUHAN ngelarang kalak perbegu bengket ku bas.

¹¹Kelsehen rayatna tupung ia ndaram-ndarami si man pangan. Itukarkenna erta-ertana guna pangan gelah ola ia mate. Nina kuta e, “Nehen aku TUHAN, tatap min kiniseranku.”

¹²“Nehen min aku!” serko ia kempak kalak si mentas arah e. “La lit pernah kalak ndat ukumen bagi ukumen enda, ukumen si ibereken TUHAN man bangku tupung paksa Ia merawa.

¹³IdabuhkenNa api i datas nari api si nciluk pusuhku. ItogengNa siding man bangku, idampeskenna aku ku taneh. Jenari itadingkenNa aku ipediatna i bas sui ate si la erngadi-ngadi.

¹⁴IpepulungNa kerina dosangku jenari iberkisna jadi sada. IolahkenNa e i bas kerahungku, seh kote aku nahanken beratna. TUHAN ngendesken aku man imbangku lanai lit ngasupku ngelawan ia.

¹⁵Kerina tenterang si mbisangku iuru-uru TUHAN. IsuruhNa tentera ngkernepken anak peranangku. IerikNa bangsangku desken ngerik buah anggur i bas pengeriken.

¹⁶E me sabapna matangku teriluh erdire-dire. La lit kalak si ngasup ngapuli aku, la lit kalak si ngasup petetap ateku. Musuh enggo naluken aku, bangsangku lanai lit sitandaina.

¹⁷Kudadaken tanku, tapi la lit sinampati aku. Enggo ilebuh TUHAN imbang-imbangku, lako ngepung aku. Desken barang mbau, ciga ate musuh-musuhku ngenen aku.

¹⁸Tapi bujur kap perbahanen TUHAN e, sabap lanai kap ia kuikutken. O bangsa-bangsa kerina, dengkehkenlah perdiateken kiniseranku. Anak perana ras si nguda-ngudangku enggo iangkut tertaban.

¹⁹Kulebuh teman-temanku, tapi itipuna aku. Imam-imam ras peminpin-peminpin maten i gedang-gedang pasar-pasar kuta ndaram-ndarami pangan atena mesuri beltekna si lume.

²⁰O TUHAN, nehen min ateku mesui, mesui kal pusuhku. Getem kal pusuhku, picet kal ukurku erkiteken dosa-dosangku. Gedang-gedang dalan lit pembunuhen, i bas rumah pe lit kematen.

²¹Dengkehken min, kesah-kesah kal aku, la lit si petetap ukurku. Meriah ukur musuhku perbahan idabuhkenNdu cilaka man bangku. BerekenNdu dage wari si ipadankenNdu. Bahan dage mesui ate imbang-imbangku bagi si kunanami.

²²Ukum min ia kerina perbahan kejahatenna. Dabuhken min ukumen man bana bagi pendabuhkenNdu ukumen man bangku. Kelsehen kal aku perban suina, getem kal pusuhku.”