Read Batak Karo PERNGANDUNGEN 3 Bible Online

PERNGANDUNGEN 3 - Batak Karo bible

PERNGANDUNGEN 3

¹Aku kap ngenca si metehsa uga nanamna iukum TUHAN.

²Igerana aku ku kegelapen si seh kal bagesna.

³Iulih-ulihiNa rusur nggudam aku la sitik pe encidahken perkuah ateNa.

⁴Dagingku ras kulingku ipelepasNa kesip tulan-tulanku meripuk ibahanNa.

⁵IerukNa aku i bas penjara, kiniseran ras kebiaren engkelewetisa.

⁶IpaksaNa aku nggeluh i bas kegelapen kematen si rasa lalap.

⁷IiketNa aku alu rante ipenjarakenNa aku, lanai lit pengarapen banci pulah.

⁸Serko mindo penampat, tapi la diate Dibata megiken aku.

⁹Mbewat-mbewat perdalanku. Lingling batu ngolang-ngolangi kujapa pe aku nulih.

¹⁰ItimaiNa aku desken beruang nggempangi, desken singa, iraukna aku.

¹¹Ipeburona aku i bas dalan, idampeskenNa seh getem, jenari itadingkenNa aku.

¹²IpegestengNa panahNa janah aku ibahanNa jadi sasarenNa.

¹³IpanahkenNa anak panahNa kempak pusuhku.

¹⁴Itawa-tawai kalak aku gedang-gedang wari, kerina ia pesega-sega aku.

¹⁵IpaksaNa aku nginem inemen si pagit, ibesuriNa aku alu pangan ras inemen si pagit.

¹⁶IdehkenNa ayongku ku taneh penggelen ipenku perban man batu rintik.

¹⁷Enggo lupa aku uga mejuah-juah, uga dame janah uga malem ate.

¹⁸Lanai aku ndekah nggeluh, pengarapenku nandangi TUHAN enggo bene.

¹⁹Ngukuri uga suina ateku, inganku tading pe lanai lit, bali kap e ras racun si pagit.

²⁰Si e kerina tetap kal i bas ingetenku, getem kal ukurku amin bage pe, turah kap pengarapenku,

²¹adi kuinget si enda.

²²Langa bo keri keleng ate TUHAN perkuah ateNa tetap nge lit.

²³Keleng ateNa mbincar tep-tep erpagi-pagi, bali tetapna ras matawari si pultak arah kenjulu.

²⁴ TUHAN kap baginku e maka man baNa ngenca aku erpengarapen.

²⁵ TUHAN mehuli kap man kerina kalak si ernalem man baNa.

²⁶E maka madin kita megenggeng, nimai Ia nampati kita.

²⁷Janah ulin erlajar megenggeng tupung paksa kita nguda.

²⁸Tupung kita i bas kiniseran madin kita kundul sisada alu megenggeng.

²⁹E maka ulin mungkuk alu patuh, sabap i je lit si man arapenken.

³⁰Aminna pe iligas ras iisakken la banci lang pulah kita i jenari.

³¹ TUHAN perkuah kap e maka labo lalap kita itulakNa.

³²IberekenNa gia man banta kiniseran, tapi keleng ateNa man banta tetap ras megegeh.

³³Sabap labo ateNa ngena, kita ermesui ate dingen rate ceda.

³⁴Ieteh TUHAN nge, maka getem kal nge pusuhta itindes i bas penjara.

³⁵IetehNa nge hakta la ibereken kalak.

³⁶Tupung keadilen iputar-balikken i bas pengadilen, itehNa nge.

³⁷Peraten TUHAN ngenca si lalap erdalan.

³⁸Si mehuli ras si jahat duana jadi rikutken perentahNa.

³⁹Engkai maka kita kelsehen tupung kita iukum erkiteken dosa-dosanta?

⁴⁰Marilah siuji geluhta jenari jeralah man TUHAN.

⁴¹Talangilah pusuh peratenta man Dibata si i surga jenari ertotolah.

⁴²“O TUHAN, enggo kap kami erdosa janah ngelawan, la kap ialemiNdu dosa kami.

⁴³Ielis-elisNdu kami jenari ibunuhNdu. Enggo tambur perkuah ateNdu perban rawaNdu.

⁴⁴Alu embun si mekapal, itamburiNdu baNdu, e maka lanai seh toto kami.

⁴⁵IbahanNdu kami bali ras sampah si ergun-gun i tengah bangsa-bangsa.

⁴⁶Kerina imbang-imbang kami megombang ngguro-guroken kami.

⁴⁷Kami enggo mentas arah kiniseran ras kecedan, kegeluhen kami lit i bas bahaya ras kebiaren.

⁴⁸Iluh matangku erdire-dire maler bagi lau mbelin, ngidah bangsangku enggo ikernepken.

⁴⁹Iluhku erdire-dire la ngadi-ngadi, bali ras lau si maler.

⁵⁰Seh ipergermetken TUHAN i surga nari, jenari idahNa kita.

⁵¹Getem kal pusuhku tupung kuidah kai si jadi man diberu-diberu i bas kuta e.

⁵²Desken perik-perik aku enggo isidingi imbang-imbangku la ersabap kalak ernembeh ate man bangku.

⁵³Ionjumkenna aku geluh-geluhen ku bas lubang, jenari itutupina alu batu.

⁵⁴Mulai me aku itamburi lau, nandangi mate me aku ateku.

⁵⁵I bas lubang si mbages nari serko aku man bandu, o TUHAN.

⁵⁶Janah tupung kupindo gelah idengkehkenNdu min sorangKu, ibegikenNdu kap aku.

⁵⁷IaloiNdu aku, janah nindu, ‘Ola mbiar’.

⁵⁸O TUHAN enggo Kam reh mbebasken aku ikeliniNdu geluhku.

⁵⁹Runggui janah sampati min aku; itehNdu kap si la mehuli si ibahan kalak man bangku.

⁶⁰ItehNdu kap maka nembeh ate imbang-imbangku man bangku, uga ia erpekat ngelawan aku.

⁶¹Enggo ibegikenNdu aku ihinana, o TUHAN, ietehNdu pertakinna man bangku.

⁶²Gedang-gedang wari icakapkenna aku janah ipertakikenna aku.

⁶³Erpagi-pagi nari seh ben iguro-gurokenna aku.

⁶⁴O TUHAN ukum min ia sue ras kai si ibahanna.

⁶⁵Sumpahi min ia bahan min maka bene pengarapenna.

⁶⁶Ayak-ayaklah ia, sasapken ia i bas doni enda nari!”