Read Batak Karo PERNGANDUNGEN 4 Bible Online

PERNGANDUNGEN 4 - Batak Karo bible

PERNGANDUNGEN 4

¹Emas si isepuh enggo magem, kerina batu Rumah Pertoton ampar merap gedang-gedang dalan.

²Anak perana Sion seri kap mbarenda ras emas, tapi genduari seri nge ras kudin taneh.

³Indung serigala pe ipepinemna anak-anakna, tapi bangsangku bali kap ras perik unta si kejam man anak-anakna.

⁴Ipelepasna anak-anakna si mbaru tubuh mate lumben ras muas. Anak-anak mindo pangan tapi la lit sekalak pe si merekenca.

⁵Kalak si semal man pangan entabeh mate kelihen i gedang-gedang dalan. Si biasa medem i bas bantal sutra medem i bas gun-gunen sampah.

⁶Bangsangku enggo iukum, lebihen asangken ukumen man kalak Sodom, si rempet itombangken alu tan Dibata. [1†]

⁷Peminpin-peminpinta la keliamen bersih kal bali ras salju, paguh, dingen megegeh, erndilap ndilap perbahan sehatna.

⁸Genduari amparen ia i bas pasar, lanai itandai, ayona biringen asangken ageng; kulingna kerah bagi ranting, ringut mbaluti tulan-tulanna.

⁹Mate i bas perang ulin kap asang si pudin mate, manjar-anjar perpatena perban lumben, sabap lanai lit nakan si man pangan.

¹⁰Kecedan si reh engkenai bangsangku seh kal hantuna, seh maka nande si ngkelengi anak-anakna pe itanggerna anakna jine man panganna. [2†]

¹¹ TUHAN nguseken gegeh rawana si gurlah, ipegaraNa api i Sion nuluhisa gelah radas ras taneh.

¹²Ise pe la tek, raja-raja bangsa si deban pe la tek, maka musuh banci mengketi pintu gerbang Jerusalem.

¹³Tapi jadi me bage, erkiteken nabi-nabina enggo erdosa, imam-imamna ersalah kerna kematen kalak bujur.

¹⁴Peminpin-peminpin mampa-mampa i gedang-gedang dalan, desken kalak pentang, uisna melket ibahan dareh, seh maka la lit ise pe banci ndadapsa.

¹⁵“Lawes! Keliamen!” ningkalak. “Lawes! Ola dadap!” E maka mampa-mampa ia i bas sada bangsa nari ku bangsa si deban, la lit ise pe si ngaloken ia.

¹⁶Lanai diate TUHAN pe ia, TUHAN jine si engkernepken ia kerina. Imam-imam ras peminpin-peminpinna lanai iperdiateken TUHAN.

¹⁷Idarami kami kalak si nggit nampati kami, tapi sia-sia. Itimai kami penampat i bas sada bangsa nari, tapi sada bangsa pe la tersampatisa kami.

¹⁸Musuh sangana nggempangi kami, lanai kami banci erdalan i bas pasar-pasar. Wari-wari kami enggo dem beliganna, wari pendungi enggo seh.

¹⁹Kalak si ngayaki kami pedasen asangken rajawali nangkis i datas awang-awang. Ielisna kami arah deleng-deleng, iemona kami i bas taneh mesawang.

²⁰Ikuasaina ulu kegeluhen kami, e me raja pilihen TUHAN, e me kalak si iarapken kami engkelini kami i bas serangen musuh-musuh nari.

²¹O kalak Edom, ras Us, tawaken, tawai asa ngasupndu. Calung cilaka si ngkenai kam pe nandangi reh me, kam pe nandangi mabuk janah itangtangi kalak uisndu.

²²Enggo genep ukumen dosa Sion, lanai ndekah TUHAN mpediat kita tertaban. Tapi kam o Edom, TUHAN la banci lang ngukum kam ipetangkasNa me kerina kesalahenndu.