Read Batak Karo PERNGANDUNGEN 5 Bible Online

PERNGANDUNGEN 5 - Batak Karo bible

PERNGANDUNGEN 5

¹O TUHAN, inget min kai si enggo jadi man kami. Perdiateken min kami nehen min uga melana iakap kami.

²Tading-tadingen kami ibuat kalak si la itandai bangsa si deban nge si ngiani rumah kami.

³Bapa kami enggo ibunuhi imbang-imbang kami, e maka genduari enggo mbalu nande kami.

⁴Lau man inemen terpaksa igalari kami, kayu man ranting terpaksa itukur kami.

⁵Mekelek kami ielis-elis, alu pasangen i das kuduk kami, latih iakap kami, tapi la ipediat kalak kami ngadi.

⁶Guna ndatken pangan maka ola mate, mindo kami man bangsa Mesir ras Assur.

⁷Enggo erdosa nini-nini kami, tapi genduari lanai ia i je. Genduari mesui ate kami mersan dosa-dosana.

⁸Genduari kami iperentah bangsa budak, janah ise pe la ngasup mulahi kami i bas kuasana nari.

⁹Pemunuh gawah-gawah arah juma-juma nari. Iasamken kami kesah kami lako ndarami pangan.

¹⁰Lumben mahanca kami penakiten, seh maka kuling kami seri lasna ras ginuhur.

¹¹Ndehara kami enggo iperkosa Deleng Sion, i bas tep-tep kuta i Juda anak kami si nguda-nguda ipaksana.

¹²Peminpin-peminpin kami enggo iukum gantung pertua-pertua kami lanai iergakenna.

¹³Anak-anak perana ipaksana ngerik gandum desken budak, danak-danak jongkang perban beratna maba ranting.

¹⁴Pertua-pertua lanai ngada-ngada i bas pintu gerbang, si medanak lanai engkuit kulcapi.

¹⁵Keriahen enggo lawes i bas geluh kami nari. Paksa landek enggo salih jadi paksa ngandung.

¹⁶Kerina si iagahken kami lanai lit tading. Kami enggo erdosa, janah genduari kami enggo bene.

¹⁷Mesui kal pusuh kami, janah si e menam la teridah arah iluh kami mambur.

¹⁸Sabap Sion enggo terulang, enggo melungen, biang kerangen gawah-gawah arah runtuhenna.

¹⁹Tapi kam kap O TUHAN raja si rasa lalap, si merentah terus ku bas kedungen paksa-paksa.

²⁰Engkai maka bage dekahna kami itadingkenNdu? Ndigan denga kin kami ingetNdu?

²¹Baba kami mulihken man baNdu, O TUHAN! Baba kami mulihken! Ulihken kemulian kami si nai.

²²Ntah itulakNdu kin kami rasa lalap? La kin lit sibarna Kam merawa?