Read Batak Karo ESEKIEL 1 Bible Online

ESEKIEL 1 - Batak Karo bible

ESEKIEL 1

¹I bas wari si pelimaken, bulan si peempatken, tahun si petelupuluhken, aku, Imam Esekiel, anak Busi, tading i tepi Lau Kebar i Babilon, ras kalak Jahudi si ibuang ku je. Talang langit, e maka kuidah sada pengenehenen kerna Dibata. [1†] (

²Tupung e tahun pelimaken Raja Joyakin enggo ibaba ku pembuangen.) [2†]

³Sanga aku i tepi Lau Kebar e, kubegi TUHAN ngerana man bangku, janah tuhu-tuhu kugejap kuasaNa.

⁴Asum kutare ku das, kuidah angin kaba-kaba si megegeh rembus i Utara nari. Kilap pe erkinar i bas embun si galang nari, janah langit i sekelewetna ersinalsal. I ja kilap ndai erkinar, i je teridah erndilap-ndilap bagi tembaga.

⁵I tengah-tengah angin si megegeh e, kuidah empat rubia-rubia tempasna bagi jelma, [3†]

⁶tapi tiap rubia lit empat ayona ras empat kabengna.

⁷Nahena pinter, janah cekilina bali ras cekili jenggi lembu, erndilap-ndilap bali ras tembaga si ipelas.

⁸Tambah ayona si empat ras kabengna si empat, lit ka pe tanna bali ras tan jelma, sada i teruh teptep kabeng.

⁹Tep-tep rubia ndai, engkirbangken kabengna sepasang, janah ujungna si degesen ras kabeng si deban, seh maka jadi persegi kecibalna empatna. Asum erdalan, radu-radu ia empatna, alu la pada erkusur lebe.

¹⁰Tep-tep rubia-rubia ndai lit ka empat erbage tempas ayona: sada bagi ayo jelma arah lebe, bagi ayo singa arah kemuhen, bagi ayo jenggi lembu arah kawes, ras bagi ayo rajawali arah pudi. [4†]

¹¹Tep-tep rubia-rubia e, sepasang kabengna iangkat ku das seh maka ujungna pedeges ras kabeng rubia-rubia si pedeher ras ia. Kabengna si dua nari itutupkenna kempak dagingna.

¹²Tep-tep rubia-rubia ngala empak empat dampar, seh maka kerina ia banci erdalan ku japa pe atena alu la pada lebe erkusur.

¹³I tengah rubia-rubia ndai lit teridah, tempa-tempa bagi obor gara, si la erngadi-ngadi erdalan ku jah ku je. Gurlah apina, janah mbincar kilap i jenari. [5†]

¹⁴Rubia-rubia ndai pe kerina kiam ku jah ku je bali pedasna ras kilap.

¹⁵Tupung kupernehen rubia-rubia si empat ndai, kuidah empat roda ndeges ras taneh, sada i duru tep-tep rubia-rubia. [6†]

¹⁶Roda e seri empatna, janah sada-sadai erkilat-kilat bagi batu permata. Tep-tep roda lit ka rodana i tengah, siku percibalna ras si pemena ndai.

¹⁷Erkiteken si e roda ndai banci erdalan kempak kerina dampar.

¹⁸Lengkar roda ndai dem alu mata. [7†]

¹⁹Adi erdalan rubia-rubia ndai, roda-roda ndai pe ikut erdalan rassa, janah adi rubia-rubia ndai nangkih ku das, roda ndai pe nangkih ka.

²⁰Rubia-rubia ndai banci lawes ku japa pe atena, janah kai si ibahan rubia-rubia ndai, bage ka kal me perbahanen roda-roda ndai sabap rubia-rubia ndai nge si ngkuasaisa.

²¹Dage tep-tep kali rubia-rubia ndai erdalan, tah ngadi, tah nangkih ku awang-awang, bage ka me perbahanen roda-roda ndai.

²²I babo takal rubia-rubia ndai lit i je si tempasna bagi langit-langit, ijadiken i bas kaca kristal si mesilo ngenenca. [8†]

²³I teruh langit-langit e me rubia-rubia ndai tedis, sada-sadai engkirbangken sepasang kabengna kempak rubia-rubia si pedeher ras ia janah itutupna bana alu kabengna si sepasang nari.

²⁴Kubegi sorana kabang, bali ras sora geruhguh lawit, bagi sora gejek tentera si nterem, bali ras sora si Mada Kuasa. Adi ngadi ia kabang ikepitkenna kabengna, [9†]

²⁵tapi lit denga terbegi sora si reh i bas langit-langit si i babo takalna ndai nari.

²⁶I babo langit-langit ndai lit i je sada si tempasna bagi kursi kinirajan, i bas batu sepir nari jadina, janah si kundul i kursi kinirajan e tempasna bagi manusia. [10†]

²⁷Ia teridah ersinalsal bagi tembaga i tengah gara api. Sinalsalna harhar kal, [11†]

²⁸janah rupana erbage-bage bali ras benteha. Enda me terang si mesilo nandaken TUHAN lit i je.