Read Batak Karo ESEKIEL 10 Bible Online

ESEKIEL 10 - Batak Karo bible

ESEKIEL 10

¹Kutare ku das langit-langit si lit i babo takal kerubim e, janah kuidah lit sada si tempasna bagi kursi kinirajan si i bahan i bas batu sapir nari. [19†]

²Nina Dibata man kalak si ruis kain linen ndai, “To dahi ku kelang-kelang roda-roda si lit i teruh kerubim e, janah buat i je sengkerauk arang si gara. Kenca bage caburkenlah arang e ku kuta e.” Kuperdiateken ia lawes. [20†]

³Kerubim ndai sangana tedis arah selatan Rumah Pertoton tupung dilaki si ruis kain linen ndai bengket ku teruh kerubim e. E maka lit embun ndemi kesain Rumah Pertoton.

⁴Sinalsal si mesilo, tanda TUHAN lit i je, mbincar i bas kerubim e nari, jenari pindah ku dalan bengket Rumah Pertoton e. Kenca bage Rumah Pertoton e dem alu embun, janah kesainna dem alu sinalsal si terang.

⁵Sora kabeng kerubim ndai terbegi seh ku kesain si arah darat; bagi sora Dibata si Mada Kuasa tempasna.

⁶Tupung iperentahken TUHAN kalak si ruis kain linen ndai muat api i bas kelang-kelang roda si lit i teruh kerubim e, minter ia bengket jenari tedis deherken sada roda.

⁷Sada i bas kerubim ndai nari ndadaken tanna ku api si lit i kelang-kelang kerubim e kerina, jenari ibuatna arang, itamakenna ku tan kalak si ruisken kain linen ndai. Ialokenna arang e, jenari lawes ia.

⁸Kuidah maka kerina kerubim ndai lit tanna bagi tan jelma i teruh kabengna.

⁹[9-10] Kuidah ka pe maka empatna kerubim e lit sada roda iduruna. Roda si empat e seri kerina, janah erkilat-kilat bagi batu permata si mejile. Kenca bage i tengah-tengah tep-tep roda lit ka sada roda si deban, siku percibalna. [21†]

¹¹E maka adi erdalan kerubim e, banci ia erdalan kempak apai pe, alu la pada erkusur. Ras-ras ia kerina erdalan ku ja saja pe atena, janah la perlu ia erkusur.

¹²Dagingna, gurungna, tanna, kabengna, bage pe rodana, kerina dem alu mata. [22†]

¹³Roda enda kerina seri ras si enggo kuidah i bas pengenehenen si pemena.

¹⁴Tep-tep kerubim lit empat ayona. Si pemena bagi ayo jenggi lembu, si peduaken bagi ayo jelma, si peteluken bagi ayo singa, janah si peempatken bagi ayo rajawali. [23†]

¹⁵[15-17] Kerubim e me kap si kuidah i tepi Lau Kebar mbarenda. Adi ikirbangkenna kabengna, kabang ia ku das, tah kabang ku lebe, adi ngadi ia, roda ndai tetap ngikut, sabap kerubim ndai engkuasaisa.

¹⁸Kenca bage sinalsal si mesilo, tanda TUHAN lit i je, nadingken dalan bengket ku Rumah Pertoton e, jenari lawes ku sada ingan i babo kerubim e.

¹⁹Ikirbangkenna kabengna, jenari kabang ia i doni nari tupung aku ngenenca, janah roda ndai pe ikut kerina rassa. Ngadi ia kentisik i bas pintu kerabangen si arah kenjulu Rumah Pertoton, janah sinalsal si mesilo e teridah i babona.

²⁰Kutandai maka kerubim e, e me kerubim si kuidah i teruh Dibata nu Israel i Lau Kebar.

²¹Tep-tep kerubim lit empat ayona, empat kabengna, tan si seri ras tan jelma lit i teruh tep-tep kabengna.

²²Ayona bali kal ras ayo si enggo kuidah mbarenda i tepi Lau Kebar. Tep-tep kerubim pinter perdalanna ku lebe.