Read Batak Karo ESEKIEL 11 Bible Online

ESEKIEL 11 - Batak Karo bible

ESEKIEL 11

¹Kesah Dibata ngangkat aku, jenari ibabaNa aku ku kerabangen Rumah Pertoton si arah kenjulu. Deherken kerabangen e kuidah dua puluh lima kalak dilaki, ikut pe Jakasanya anak Asur ras Pelaca anak Benaya. Kalak enda duana peminpin bangsa e.

²Nina Dibata man bangku, “O manusia si ermasap-masap, kalak enda kerina erbahan rencana-rencana si jahat janah iberekenna pedah si la mehuli man kuta enda.

³Nina, ‘Pedas nge kita majekken rumah mulihi. Sabap kuta enda bali kap ras kudin, janah kita desken daging i bas kudin e; e maka kita labo banci kena api.’

⁴Genduari, o manusia si ermasap-masap, nubuatkenlah ukumenna.”

⁵Kesah TUHAN engkuasai aku, jenari isuruh TUHAN aku nehken berita enda man bangsa e, “O bangsa Israel, Kueteh nge kai si ikatakenndu ras si irencanakenndu.

⁶Enggo seh kal lalana jelma ibunuhindu i bas kuta enda, seh maka pasar-pasar dem alu mait.

⁷Erkiteken si e, enda me katangKu, Aku, TUHAN si Erdolat, nandangi kam. Tuhu kuta enda desken kudin, tapi kai kin daging e? Daging e, e me mait kalak si enggo ibunuhindu. Kam lanai pagi i jenda, sabap Kuambekken kam ndarat i bas kuta enda nari!

⁸Ma mbiar kin kam nandangi pedang? Kalak si erpedang me Kubaba lako merangi kam.

⁹Kubaba kam ndarat i bas kuta enda nari jenari Kubereken man bangsa si deban. Enggo Kuputusken ukumenndu ukumen mate,

¹⁰e maka mate me kam i bas perang i bas negerindu. Arah si e ieteh kalak me kerina maka Aku kap TUHAN.

¹¹Kuta enda labo pagi engkawali kam bagi kudin ngkawali daging si lit i bassa. Kuukum kam aminna i ja pa pe kam i bas negeri Israel.

¹²Jenari ietehndu me maka Aku kap TUHAN janah Kuukum kam erkiteken ilanggarndu peraturen-peraturenKu dingen la iperdiatekenndu Undang-undangKu arah kam ngikutken adat kebiasan negeri-negeri si lit i sekelewetndu.”

¹³Tupung aku melasken nubuat enda ndai, rempet mbulak Pelaca, mate ia. E maka nembah aku, ayongku seh ku taneh janahku serko ningku, “Andiko, TUHAN si Erdolat, ibunuhNdu kin atendu kerina kalak si tading i Israel?”

¹⁴Kata TUHAN seh man bangku nina,

¹⁵“O manusia si ermasap-masap, kalak si ringan i Jerusalem ncakapken kam ras senina-seninandu kalak Israel si sangana i bas pembuangen. Nina, ‘Kalak buangen e enggo ndauhsa inganna maka ia banci ersembah man TUHAN i Jerusalem enda. TUHAN enggo mereken taneh enda man sikerajangenta!’

¹⁶Genduari turikenlah man teman-temanndu si ibuang kai si Kukataken enda. Aku nge si mahanca ia ringan i tengah-tengah bangsa-bangsa si ndauh dingen Kupemerap ia i bas negeri-negeri si deban. Amin bage gia kidekah ia ringan i bas negeri inganna ibuang e, Aku nemani ia.

¹⁷E maka kataken man bana katangKu, Aku TUHAN si Erdolat. Kataken man bana maka Kupepulung nge ia i bas negeri-negeri e nari, jenari Kubereken man bana mulihi taneh Israel e.

¹⁸Kenca ia mulih, arus maka iambekkenna kerina gana-gana si macik dingen si ciga ateKu, si ijumpaina.

¹⁹Kubereken me man bana pusuh si mbaru ras perukuren si mbaru. Kuagui pusuhna si piher bagi batu, jenari Kusambari alu pusuh si erkemalangen man bangKu. [24†]

²⁰Kenca bage ipatuhina me peraturen-peraturenKu janah alu tutus iikutkenna perentahKu. Ia jadi bangsangKu janah Aku jadi Dibatana.

²¹Tapi Kuukum me kalak si ersembah man gana-gana si macik dingen si ciga ateKu. Kuukum me ia erkiteken kai si enggo ilakokenna.” Enda me kata TUHAN si Erdolat.

²²Ibenaken kerubim ndai me kabang, janah roda ndai pe kerina ikut rassa. Sinalsal si mesilo tanda Dibata nu Israel lit i je, teridah ersinalsal i babo kerubim e. [25†]

²³Kenca bage sinalsal si mesilo e lawes nadingken kuta e janah pindah ku sada deleng si lit arah kenjulu.

²⁴I bas pengenehenen e Kesah Dibata ngangkat aku, jenari ibabaNa mulih ku pembuangen i Babilon. Kenca bage masap pengenehenen e,

²⁵jenari kuturiken man kalak buangen e kai si enggo icidahken TUHAN man bangku.