Read Batak Karo ESEKIEL 13 Bible Online

ESEKIEL 13 - Batak Karo bible

ESEKIEL 13

¹Kata TUHAN seh man bangku nina,

²“O manusia si ermasap-masap, nubuatkenlah ukumen nandangi nabi-nabi Israel si mahan-mahani nubuatna jine. Suruh ia megiken kata TUHAN.”

³Enda me si ikataken TUHAN, “Cilaka me nabi-nabi si motu e! Ia ernubuat rikutken sura-sura ukurna, dingen pengenehenen si ibahan-bahanina.

⁴O bangsa Israel, nabi-nabindu sitik pe la erguna, bali ras serigala si tading i bas runtuhen kuta.

⁵La ia erjaga i bas ingan tembok si enggo runtuh janah la ipehulina pe tembok si enggo runtuh e. Erkiteken si e Israel la terperentahken adi reh pagi perang tupung wari TUHAN.

⁶Pengenehenenna la tuhu, janah nubuatna pe guak. Ikatakenna maka katangKu nge si ipesehna, tapi situhuna labo lit ia Kusuruh. Kuga banci seh bagi si inubuatkenna?

⁷Kukataken man bana, ‘Pengenehenenndu e labo tuhu, janah nubuatndu e guak nge. Ikatakenndu maka katangKu si ibelaskenndu, tapi Aku la pernah ngerana man bandu.’ ”

⁸Erkiteken si e TUHAN si Erdolat ngataken man bana kerina, “Katandu e labo tuhu, janah pengenehenenndu guak nge. E maka Kulawan kam.

⁹Kuukum me kerina nabi-nabi si pengenehenenna guak dingen nubuatna mabai kalak papak. Lanai banci kam ikut mereken keputusen i bas runggun bangsangKu; gelarndu lanai isuratken i bas gelar-gelar bangsa Israel; ndigan pe lanai kam mulih ku negerindu. Kenca bage ietehndu me maka Aku kap TUHAN si Erdolat.

¹⁰Kam mabai bangsa e papak alu ngataken maka kerinana nge sikap. Kepeken situhuna sitik pe labo sikap. BangsangKu majekken tembok alu batu si longgar-longgar, jenari reh ka kam engkapurisa. [28†]

¹¹O nabi-nabi perguak, nandangi runtuh me tembokndu e. Kupesusur me udan meder, udan baho ndabuh ku je, janah angin meter ngembuskenca.

¹²E maka runtuh me tembok e, jenari kerina kalak ngataken maka labo lit gunana tembok e ikapuri.”

¹³Genduari, enda me si ikataken TUHAN si Erdolat, “Erkiteken nembehna ateKu, Kusuruh me angin meter, udan meder, ras baho engkernepken tembok e.

¹⁴Kuruntuhken ateKu tembok si ikapurindu e, kuperperken, janah palasna nari ngenca Kupediat tading. Runtuh me ia janah mate kam ibulakina. Kenca bage ietehndu me kerina maka Aku kap TUHAN.

¹⁵Tembok e ras si ngapursa, inanamindu me uga sangatna rawangKu. Kenca bage Kukataken man bandu maka tembok e enggo getem, bali ras kam si ngapursa,

¹⁶nabi-nabi si perguak, si ngataken man Jerusalem maka kerina nge sikap, i ja si tuhuna kai pe la sikap,” bagen nina TUHAN si Erdolat.

¹⁷Nina TUHAN, “Genduari, o manusia si ermasap-masap, perdiatekenlah diberu-diberu si lit i tengah-tengah bangsandu si erbahan nubuat. Ernubuatlah kam kerna ukumen,”

¹⁸janah kataken man bana katangKu, Aku TUHAN si Erdolat nindu, “Cilaka me kam o diberu tukang nubuat! Itamakenndu ajimat i bas pergelangen tan kalak kerina, bage pe tudung penangkal i bas takal kalak, gelah alu si e banci ikuasaina geluh kalak si deban. Atendu engkuasai pate-geluh bangsa Dibata janah ipakendu kuasandu guna kepentingenndu jine.

¹⁹Ikaruskenndu Dibata i lebe-lebe bangsaNa lako ndatken piga-piga ngkerauk gandum ras piga-piga ncepik roti. Ibunuhndu kalak si la ersalah, janah kalak si patut mate ipelepasndu nggeluh. Guna si e iguakindu bangsa Dibata janah tek ka ia man bandu.”

²⁰E maka genduari bage nina TUHAN si Erdolat, “Ciga ateKu ngidah ajimat-ajimat si ipakendu i bas pergelangen tanndu e, sabap alu si e atendu engkuasai pate geluh bangsangKu. E maka Kusintapken nge pagi e i bas tanndu nari jenari Kubebasken kalak si ikuasaindu e.

²¹Kusintapken me tudung penangkalndu janah Kubere bangsangKu pulah i bas kuasandu nari seh rasa lalap. Kenca bage itehndu me maka aku kap TUHAN.”

²²“Alu kata guak si iturikenndu ceda ibahanndu kalak si bujur ukurna, selangsa Aku jine la ateKu ceda. Kalak jahat la ipelepasndu mperobahi lagu langkahna gelah ola ia terkelin.

²³Erkiteken si e pengenehenndu si guak ras nubuatndu si papak e genduari ipengadi. Kupulahi bangsangKu i bas kuasandu nari, gelah itehndu maka Aku kap TUHAN.”