Read Batak Karo ESEKIEL 14 Bible Online

ESEKIEL 14 - Batak Karo bible

ESEKIEL 14

¹Piga-piga kalak peminpin Israel reh nungkun Aku kerna kai peraten TUHAN.

²Kenca bage seh kata TUHAN man bangku nina,

³“O manusia si ermasap-masap, kalak enda kerina enggo ngendesken pusuhna man berhala-berhala janah ipelepasna berhala-berhala mabai ia kempak dosa. Akapna kin nggit Aku ngaloi penungkunenna e?

⁴Genduari kataken man bana katangKu, Aku TUHAN si Erdolat. Kasa kalak Israel si enggo ngendesken pusuhna man berhala-berhala janah iberena dirina ibabai berhala e lako erbahan dosa, jenari reh ia nungkun kempak sekalak nabi, idatca me jabapna i bas Aku nari, e me jabap si patut ialokenna i bas berhala-berhala e nari.

⁵Kerina berhala-berhala e erbanca nilah kalak Israel i bas Aku nari, tapi alu jabapKu e mbera-mbera bangsangKu banci mulihi erkemalangen man bangKu.

⁶Dage genduari turikenlah man kalak Israel kai katangKu, Aku TUHAN si Erdolat. Jeralah janah tadingken berhalandu si ciga ateKu e.

⁷Adi lit kalak Israel tah bangsa si deban si ringan i tengah-tengah bangsa Israel nadingken Aku jenari isembahna berhala, janah kenca bage reh ia nungkun sekalak nabi, maka Aku jine me si njabapsa.

⁸Kulawan ia janah Kubahan ia jadi usihen man kalak si deban. Kupeserap ia i bas bangsangKu nari, gelah ieteh bangsangKu maka Aku kap TUHAN.

⁹Adi sekalak nabi erguak seh maka iberekenna jabap si salah, si e jadi erkiteken Aku, TUHAN, enggo erguak man bana. E maka Kupeserap ia i bas bangsa Israel nari.

¹⁰Subuk nabi bage pe kalak si nungkun nabi e duana ndatken ukumen si seri.

¹¹Si e Kulakoken gelah kalak Israel ola nadingken Aku, janah gelah ola iliamina bana alu dosana. Alu bage bangsa Israel tetap jadi bangsangKu janah Aku Dibatana.” Bagenda me nina TUHAN si Erdolat.

¹²Kata TUHAN seh man bangku nina,

¹³“O manusia si ermasap-masap, adi lit sada negeri erdosa janah lanai erkemalangen man bangKu, e maka Kuukum negeri e. Kukernepken persedian panganna, Kutamaken ku je kelihen, janah Kubunuh subuk manusia bage pe asuh-asuhenna.

¹⁴Aminna pe Nuah, Daniel, ras Jop ringan i je, kiniulin kalak si telu e erguna lako ngkelini geluhna saja ngenca. Bagenda me nina TUHAN si Erdolat.

¹⁵Banci ka nge Kusuruh ku je rubia-rubia si merawa njerngem rayatna, seh maka negeri e dem alu kebiaren janah ise pe la pang mentas arah e.

¹⁶Aminna pe Nuah, Daniel, ras Jop ringan i je maka erkiteken Aku, Dibata si nggeluh, TUHAN si Erdolat, teluna ia labo ngasup ngkelini anak-anakna jine pe. Geluhna jine ngenca terkelinisa, janah negeri e salih me jadi taneh si terulang.

¹⁷Banci ka pe Kubaba perang ku negeri e, janah Kutamaken ka je pedang si ntelap lako ngkernepken subuk manusia bage pe asuh-asuhen.

¹⁸Aminna pe Nuah, Daniel, ras Jop ringan i je, maka erkiteken Aku, Dibata si nggeluh, TUHAN si Erdolat, tehna ia labo ngasup ngkelini anakna jine pe, tapi geluhna saja ngenca terkelinisa.

¹⁹Banci ka pe Kutamaken ku negeri e penakit laya-laya, janah erkiteken nembehna ateKu, melala mate subuk manusia bage pe asuh-asuhen.

²⁰Aminna pe Nuah, Daniel, ras Jop ringan i je, maka erkiteken Aku, Dibata si nggeluh, TUHAN si Erdolat teluna ia labo ngasup ngkelini anakna jine pe. Kiniulin kalak e, ngasup ngkelini geluhna saja nge ngenca.”

²¹Enda me kai si ikataken TUHAN si Erdolat, “Kudabuhken me empat ukumen si mberatna kal ku Jerusalem lako ngkernepken subuk manusia bage pe asuh-asuhen. Ukumen e, e me: kelihen, perang, rubia-rubia si merawa, ras penakit laya-laya. [29†]

²²Kune lit kalak si pulah janah ngasup ngekelini anak-anakna, perdiatekenlah ia tupung reh ku kam. Nehenlah uga jahatna ia, janah teklah kam maka ukumen si Kudabuhken ku Jerusalem e, bujur kap.

²³Jenari iertindu ka pe maka cukup nge alasen kerna kai si enggo Kulakoken e.” Bagenda me nina TUHAN si Erdolat.