Read Batak Karo ESEKIEL 16 Bible Online

ESEKIEL 16 - Batak Karo bible

ESEKIEL 16

²“O manusia si ermasap-masap, tuduhkenlah man Jerusalem uga macikna perbahanenna.”

³TUHAN si Erdolat nuruh aku nehken kataNa enda man Jerusalem nina, “O Jerusalem, kam tubuh i negeri Kanan. Bapandu kalak Amori janah nandendu kalak Heti.

⁴Tupung kam tubuh la lit kalak si ngkeret tinali pusungndu, la lit si peridi tah si engkuningi kam alu sira, janah la lit si maluti kam alu uis.

⁵La lit kalak si erkuah ate man bandu lako ndalanken si e kerina. Tupung kam tubuh la lit ise pe si erkeleng ate man bandu; kam iambekken ku tengah mbalmbal.

⁶Kenca bage mentas Aku, janah Kuidah kam ketepper-ketepper i bas darehndu, tapi la Kupelepas kam mate.

⁷[7-9] Kubuat lau, jenari Kuburihi dareh si leket i bas dagingndu. Kuminaki dagingndu alu minak saitun. Kupebelin-belin kam desken sinuan-sinuan si mehumur. Gedangndu tambah, dagingndu mbelin timbas, kam enggo jadi singuda-nguda. Tentenndu jadi mburnis, bukndu nggedang, tapi kam manjang-anjang. Tupung mentas Aku, Kuidah maka enggo seh paksana turah atendu ngena. Kupakeken jubahKu ku dagingndu si manjang-anjang e, janah erpadan Aku maka Kukelengi kam. Labo terjeng je saja, tapi kubahan iketen padan perjabun ras kam, e maka kam jadi sikerajangenKu.” Bage nina TUHAN si Erdolat.

⁸

⁹

¹⁰“Kenca bage Kupakeken man bandu baju gaun si ersulam, sepatu kulit si mejile kal, pengiket takal i bas kain linen nari, bage pe jubah sutra.

¹¹Kupakeken man bandu perhiasen si meherga gelang ras bura.

¹²Kubereken man bandu cincin igung ras kerabu, bage pe mahkota man pakenndu.

¹³Dage kam tetap make perhiasen emas ras pirak, bage pe ruisken kain linen ras sutera si ersulam. Roti si man panganndu ibahan i bas tepung si mejile nari, rikut ras tengguli bage pe minak saitun. Jilendu tuhu la teralang, janah kam jadi kemberahen.

¹⁴Kam terberita ku kerina bangsa-bangsa erkiteken jilendu si la erpandangen, sabap Aku erbahanca kam mejile.” Bagenda me nina TUHAN si Erdolat.

¹⁵“Tapi isalahgunakenndu rupandu si mejile ras gelarndu si terberita e. Kasa dilaki mentas, medem kam rassa.

¹⁶Uisndu ipergunakenndu jadi perhiasen i bas inganndu ersembah man berhala. Kam jadi diberu perlua-lua, janah man ise pe iberekenndu dagingndu.

¹⁷Perhiasen emas ras pirak si Kubereken man bandu ibahanndu jadi gana-gana dilaki, jenari erlua-lua kam ras gana-gana e.

¹⁸Uis si ersulam si Kubereken man bandu mbarenda, ipakekenndu man gana-gana e, janah ipersembahkenndu ku je minak saitun ras kumenen bekas pemerengKu.

¹⁹Kubereken man bandu pangan si ibahan i bas tepung si mejile nari, minak saitun ras tengguli, tapi kerina si e ipersembahkenndu man berhala-berhala e lako muat ukurna.” Bage nina TUHAN si Erdolat.

²⁰“Kenca bage ibuatndu anak-anakKu si ipupusndu guna Aku, subuk dilaki bage pe diberu, jenari ipersembahkenndu man berhala-berhala. Langa kin akapndu cukup ngobah i bas aku nari,

²¹maka ibuatndu denga ka anak-anakku janah ipersembahkenndu man berhala-berhala?

²²Kidekah kam nggeluhken geluhndu si macik e selaku diberu perlua-lua, sekali pe la pernah ingetndu kuga kam nai sanga danak-danak denga manjang-anjang, katepper-katepper i bas darehndu jine.”

²³Nina TUHAN si Erdolat man Jerusalem! Cilaka me kam! Cilaka me! Kerina kejahaten e enggo ilakokenndu, janah tole nari,

²⁴i tepi tep-tep dalan ipajekkenndu ingan ersembah man berhala ras man ingan erlua-lua.

²⁵Rupandu si mejile icemarkenndu, dagingndu ijadikenndu man tep-tep dilaki si mentas janah la erngadi-ngadi kam erlua-lua.

²⁶Mesir, tetanggandu si mbelin kerincuhenna e, itemanindu medem. Kam sengaja erlua-lua gelah keke rawangKu.

²⁷Genduari Kuawatken tanKu lako ngukum kam, janah Kubuat pasu-pasu si enggo Kubereken man bandu, Kuendesken kam man kalak Pilisti si ernembeh ate man bandu janah si erciga ate nandangi perbahanenndu si melket e.

²⁸Tapi langa ka bo akapndu puas. E maka iayak-ayakndu ka bangsa Assur. Kam jadi gundikna, tapi la ka bo akapndu puas ibahanna.

²⁹Jenari jadi gundik bangsa Babilon ka kam, bangsa perbinaga e, tapi ia pe la bo ka ngasup mahanca kam puas.”

³⁰Nina TUHAN si Erdolat, “Si enda kerina enggo ilakokenndu desken perlua-lua si la meteh mela.

³¹I tep-tep dalan ipajekkenndu ingan ersembah man berhala-berhala ras man inganndu erlua-lua, aminna kam la bagi perlua-lua si deban; sabap kam la perlu duit.

³²Kam bali ras sekalak ndehara si ngelukken perbulangenna gelah erlua-lua ras dilaki si deban.

³³Adi diberu perlua-lua si deban, kalak nge nggalar man bana; tapi kam, kam nge si mereken pemere man dilaki si ngena atendu, janah iendik-endikndu pe ia alu mereken duitndu gelah i ja nari pe reh ia lako medem ras kam.

³⁴Kam tuhu-tuhu sekalak diberu perlua-lua si gandil. La lit si maksa kam jadi diberu perlua-lua. Kalak la perlu nggalar man bandu tapi kam nge si nggalar. Kam gandil tuhu-tuhu.”

³⁵Genduari dage, o Jerusalem, perlua-lua, begikenlah kai si ikataken TUHAN,

³⁶janah enda kap kata TUHAN si Erdolat. Nina, “Itangtangindu uisndu, janah bagi sekalak diberu perlua-lua, iendeskenndu dagingndu man kalak si ngena atendu ras man berhala-berhala si melket e. Anak-anakndu ibunuhndu jadi persembahen man berhala-berhala e.

³⁷Erkiteken si e, Kupepulung me kerina dilaki si enggo pernah jadi temanndu, subuk si ngena atendu bage pe si ciga atendu. Kusuruh ia tedis i sekelewetndu, kenca bage Kutangtangi kerina uisndu, maka kam manjang-anjang.

³⁸Kuukum kam erkiteken erlua-lua ras munuh janah erkiteken nembehna ras rawana ateKu, Kuukum mate me kam.

³⁹Kutamaken kam iteruh kuasana, maka irontaskenna kerina inganndu erlua-lua ras nembah man berhala-berhala e. Kerina uis ras perhiasenndu irampasna, seh maka kam manjang-anjang.

⁴⁰Iajukna jelma si nterem menteri kam alu batu, jenari ikeret-keretna dagingndu alu pedang.

⁴¹Icilukna rumahndu janah isuruhna diberu-diberu ngenen uga kam iukum. Alu bage kupengadi kam erlua-lua, janah la banci ibagi-bagikenndu pemerendu man dilaki si ngena atendu.

⁴²Kenca bage ngadi me pernembeh ateKu, janah ukurKu teneng mulihi. Lanai Aku merawa ntah pe mecimberu.

⁴³Enggo kam lupa kuga nai ulina perbahanKu tupung kam nguda denga. Erkiteken si e ipekekendu rawangKu alu kai si enggo ilakokenndu. Em sabapna maka Kubalas man bandu kerina perbahanenndu e. Engkai maka lagu langkahndu si macik e itambahindu denga ka alu erlua-lua?” Bage nina TUHAN si Erdolat.

⁴⁴Nina TUHAN, “O Jerusalem, ipake kalak me kuan-kuan enda man bandu, ‘Uga nandena, bage ka nge anakna.’

⁴⁵O beru payo kal me tuhu kam anak nandendu. Nandendu ersegat ate nandangi perbulangenna ras anak-anakna. Kam bali ras senina-seninandu, si ersegat ate nandangi perbulangenna ras anak-anakna. Kam ras senina-seninandu e, e me kuta-kuta i sekelewetndu, nandendu e me kalak Heti janah bapandu kalak Amori.

⁴⁶Kakandu e me Samaria i Utara, rikut ras kuta-kutana, agindu e me Sodom i Selatan rikut ras kuta-kutana.

⁴⁷Cukup kin akapndu ngikutken lagu langkahna dingen ngusih perbahanenna si macik e! Lang; kentisik nari macik denga ka nge lagu langkahndu i bas kai si ilakokenndu.”

⁴⁸Nina TUHAN si Erdolat man Jerusalem, “Asa tuhu Aku Dibata si nggeluh, seninandu Sodom ras kuta-kutana la pernah bagi kam e jahatna.

⁴⁹Sodom ras kuta-kutana meganjang rukur, erkiteken melala nakanna janah ia nggeluh alu dame ras teneng; tapi la iperdiatekenna kalak musil ras kalak si mesera geluhna.

⁵⁰Meganjang ukurna dingen mekeng ka pe, janah ilakokenna kai si ciga ateKu; erkiteken si e Kukernepken ia bagi enggo ietehndu.

⁵¹Dosa Samaria la lit setengah asa dosandu e. Ndauh kal maciken perbahanenndu asa perbahanenna. Ngidah kerina lagu langkahndu, senina-seninandu si deban tempa-tempa la lit salahna adi ibandingken ras kam.

⁵²E maka genduari arus igengkenndu ugape melana. Dosa-dosandu ndauh kal mejinen asangken dosa senina-seninandu e seh maka tempa-tempa ia la ersalah adi ipeseri ras kam. Arus maka mela dingen kitik akapndu bandu, sabap erkiteken kam seninandu e teridah tempa bersih.

⁵³Nina TUHAN kempak Jerusalem, “Sodom ras Samaria rikut ras kuta-kuta sekelewetna Kujadiken pagi senang akapna mulihi. Tuhu kam pe senang akapndu pagi.

⁵⁴Mela pagi akapndu ngenehen dirindu, janah arah kecibalndu si man kemelanken e, ieteh senina-seninandu me pagi uga sikapna sikerajangenna.

⁵⁵Senang akapna pagi mulihi, jenari kam ras kuta-kuta sekelewetndu pe ipajekken ka pagi mulihi.

⁵⁶Ma itandaindu kin nai Sodom tupung meganjang denga ukurna,

⁵⁷ope denga kejahatenndu tereteh? Genduari kam pe bali ras ia, kam jadi pertawa-tawan man kalak Edom, kalak Pilisti ras negeri-negeri si ndeher ras kam si ernembeh ate man bandu.

⁵⁸Kam la banci lang ngenanami kiniseran erkiteken perbahanenndu si macik dingen si ciga ateKu.” Bage nina TUHAN.

⁵⁹Nina TUHAN si Mada Kuasa, “Kulakoken me man bandu sue ras perbahanenndu. Sabap lanai iperdiatekenndu sumpahndu, janah ilanggarndu perpadanenndu ras Aku.

⁶⁰Tapi Kuinget kap perpadanen si Kubahan ras kam tupung kam nguda denga, janah Kubahan ras kam sada perpadanen si tahan seh rasa lalap.

⁶¹Ingetndu me kerina perbahanenndu, janah mela akapndu tupung Kuulihken seninandu si sintua ras si nguda. Kubahan ia desken anakndu, aminna gia si e la bengkat i bas perpadanenKu ras kam.

⁶²Kupelimbarui perpadanenKu ras kam maka ietehndu maka Aku kap TUHAN.

⁶³Kualemi kerina salah si enggo ibahanndu, tapi kesalahenndu e la terlupakenndu, seh maka mela kam sumekah pe.” Bage nina TUHAN si Mada Kuasa.