Read Batak Karo ESEKIEL 17 Bible Online

ESEKIEL 17 - Batak Karo bible

ESEKIEL 17

¹Nina TUHAN man bangku,

²“O manusia si ermasap-masap, turikenlah man kalak Israel sada perumpaman,

³maka iangkana katangKu man bana, Aku TUHAN si Erdolat. Nindulah: Lit sada rajawali si galang kal; kabengna mbelang dingen paguh, mbuluna erbage-bage rupana. Kabang rajawali e ku deleng-deleng Libanon, e maka ipenggelkenna pucuk batang kayu asis si meganjangna,

⁴jenari ibabana ku sada negeri perbinaga, janah iamparkenna i bas kuta perbinaga e.

⁵Kenca bage ibuatna sada sinuan-sinuan si nguda denga i negeri Israel nari, jenari isuankenna i bas sada juma si mehumur, si cukup launa lako peturah sinuan-sinuan ndai.

⁶Turah me sinuan-sinuan ndai jadi sada batang anggur si meteruk dingen batangna njoler seh mbelang. Dahan-dahanna turah ku das kempak rajawali e, janah uratna mbages perturahna i bas taneh. Batang anggur ndai melala kal dahanna janah bulungna pe mbur.

⁷Jenari lit ka sada rajawali si deban, kabengna mbelang janah mbuluna mekapal. E maka ijolerken batang anggur ndai uratna ras bulungna ku rajawali e, alu pengarapen maka buen kari iberena lau asangken si ibereken peken inganna turah genduari.

⁸Tapi batang anggur e enggo kap isuanken i bas juma si mehumur dingen la kurang lau, gelah banci mbur bulungna janah meramis buahna, bagi sada batang anggur si mehuli.

⁹Dage, Aku TUHAN si Erdolat, nungkun: Banci kin batang anggur e turah dingen reh belinna? Banci kin la iruah rajawali si pemena ndai uratna, janah buahna iputikkenna, jenari dahanna ipenggelkenna janah ipelepasna seh melus? Sabap labo kap metahat ngeruahsa, janah labo perlu sada bangsa si megegeh ngelakokenca.

¹⁰Tuhu enggo isuanken, tapi banci kin ia turah dingen reh belinna? Banci kin ia la melus adi reh angin timur ngembussa? Banci kin ia la melus i bas inganna isuanken e?”

¹¹Nina TUHAN man bangku,

¹²“Sungkunlah pemberontak-pemberontak e, tah ietehna maun erti perumpaman e. Katakenlah man bangsa e, maka nai raja Babilon enggo reh ku Jerusalem jenari ibabana raja ras pegawai-pegawaina mulih ku Babilon. [30†]

¹³Ibuatna sekalak i bas keluarga raja nari, ibahanna perpadanen ras ia, jenari isuruhna ia ersumpah maka tetap patuh man bana. Ibuat raja Babil piga-piga kalak si erpangkat meganjang, ibahanna jadi tabanen.

¹⁴Gelah alu e bangsa e olanai pagi megegeh mulihi, janah perpadanen e ipatuhi.

¹⁵Tapi berontak kap raja Juda; isuruhna piga-piga persuruhen ku Mesir ngelegi kuda ras tentera melala. Banci kin seh sura-surana e? Banci kin ia pulah alu si e? Labo banci ilanggarna perpadanen e, janah uga pa pe iukum nge ia.

¹⁶Asa tuhu Aku nggeluh, TUHAN si Erdolat, raja Juda la banci lang mate i Babilon, erkiteken ilanggarna sumpah ras padan si ibahanna ras raja Babilon si ngangkat ia jadi raja.

¹⁷Tentera Mesir si megegeh e pe labo ngasup ngelawan tentera Babilon, si erbahan benteng-benteng ras parik-parik lako munuh nterem jelma.

¹⁸Raja Juda ngelanggar sumpah ras padanna, e maka labo banci ia pulah.

¹⁹Erkiteken Aku, Dibata si nggeluh, TUHAN si Erdolat, la banci la kuukum raja Juda si ngelanggar perpadanen si ibahanna alu sumpah i bas gelarKu.

²⁰Kupebelang me bantongKu, jenari Kutangkap ia alu bantongKu e. Kubaba ia ku Babilon janah Kuukum ia i jah, sabap la ia erkemalangen man bangKu.

²¹Tenterana si mbisana mate i bas peperangen, janah si tading denga marpar ras merap kerina. Kenca bage ietehna me maka Aku kap TUHAN, si enggo ngerana man bana.”

²²Enda me kai si ikataken TUHAN si Erdolat, “Kubuat pucuk batang asis si meganjang, Kupenggelken dahanna si nguda; Kusuanken i datas deleng si meganjang,

²³i datas deleng Israel si meganjangna. Dahan-dahanna turah, jenari erbuah, kedungenna jadi kayu si mbelin. I je ringan perik-perik si melala erbagena, cilinggem, dingen rasar i bas dahanna.

²⁴Kerina batang kayu i bas negeri e metehsa, maka Aku kap TUHAN Dibata. Kutabah batang kayu si meganjang, si meteruk, Kubahan turah jadi meganjang. Kayu si meratah, Kubahan jadi kerah, kayu kerah jadi meratah. Aku, TUHAN enggo melasken kata; bagi si Kubelasken, la banci lang bage pagi jadina.”