Read Batak Karo ESEKIEL 18 Bible Online

ESEKIEL 18 - Batak Karo bible

ESEKIEL 18

¹Ngerana TUHAN man bangku,

²nina, “Engkai maka kuan-kuan enda lalap ibelasken i negeri Israel? ‘Orang tua man buah anggur si macem nanamna, tapi anak-anak kap si ngilu ipenna.’ [31†]

³Erkiteken Aku, Dibata si nggeluh, TUHAN si Erdolat, enda lanai banci ibelasken i negeri Israel.

⁴Kesah tep-tep jelma, Aku empuna, subuk orang tua bage pe danak-danak. Ise erdosa, ia nge mate.

⁵Umpamakenlah lit sekalak jelma si tuhu-tuhu mehuli, benar dingen bujur.

⁶La isembahna berhala-berhala kalak Israel, la ipanna persembahen si ipersembahken i bas ingan persembahen man begu-begu. La pernah igodana ndehara temanna, la ipedemina diberu si sangana nguda bulanna.

⁷La pernah ise pe itipuna tah pe irampasna. Barang-barang jaminen kalak si rutang bana tetap iulihkenna; si kelihen iberena man, kalak si manjang-anjang iuisina.

⁸Adi kalak minjam duit man bana la pernah ibahanna erbunga. La ia nggit erbahan jahat, janah i bas tep-tep perubaten ibelaskenna keputusen si bujur.

⁹Kalak si bage patuh kap man perentahKu, janah alu metenget ipakena Undang-undangKu. Ia kalak benar, e maka nggeluh me ia.” Bage nina TUHAN si Erdolat. [32†]

¹⁰“Jenari umpamaken dilaki enda ndai lit sekalak anakna si rusur ngerampuk dingen munuh, si ngelakoken erbage-bage perbahanen,

¹¹si la pernah ilakoken bapana. Ipanna persembahen si ipersembahken i bas ingan persembahen man begu-begu, ndehara kalak igodana.

¹²Kalak musil itipuna, irampasina kalak, barang-barang jaminen kalak si minjam la iulihkenna. Idahina ingan-ingan ersembah kalak perbegu, gana-gana si nggesuh isembahna,

¹³janah ipebungakenna duitna. Banci kin kalak si bage nggeluh? Uga pe lang! Kerina perbahanen si melket e enggo ilakokenna, e maka ugapa pe mate ia. Ia mate erkiteken kesalahenna jine.

¹⁴Genduari umpamaken ka lit anakna. Idahna kerina dosa si ibahan bapana, tapi la iusihna.

¹⁵La isembahna berhala-berhala kalak Israel, la ipanna persembahen si ipersembahken man begu-begu. La igodana ndehara kalak,

¹⁶La ise pe itindihna, la ise pe irampasina. Barang jaminen kalak si ngeraih iulihkenna. Kalak si kelihen iberena man, janah kalak si manjang-anjang iberena uis.

¹⁷La ia nggit erbahan jahat, janah duit si ipinjamkenna la ibahanna erbunga. Ipakena Undang-undangKu, janah ipatuhina perentahKu. Kalak si bage la kap mate erkiteken dosa bapana, tapi ugapa pe nggeluh ia.

¹⁸Sebalikna, bapana nipu ras ngerampasi, janah lalap ibahanna si jahat man kerina kalak, e maka mate ia erkiteken dosa si ibahanna jine.

¹⁹Tapi nungkun kam. Engkai maka anakna la ngenanami kiniseran erkiteken dosa bapana? Jabapna e me erkiteken anakna e ngelakoken si benar ras mehuli. Ipakena Undang-undangKu, iikutkenna alu tutus, e maka erkiteken si e tentu ia nggeluh.

²⁰Ise erdosa ia nge mate. Sekalak anak labo ngenanami kiniseran erkiteken dosa bapana, bage pe bapa la ngenanami kiniseran erkiteken dosa anakna. Kalak si mehuli ndat upah erkiteken perbahanenna si mehuli, janah kalak jahat ngenanami kiniseran erkiteken kejahaten si ilakokenna. [33†]

²¹Adi kalak jahat jera, jenari ipakena Undang-undangKu, adi ilakokenna kai si benar dingen bujur, la ia mate; ia tentu nggeluh.

²²Kerina dosa-dosana ialemi, janah nggeluh ia, erkiteken ilakokenna kai si benar.

²³Akapndu kin meriah Kuakap ngidah kalak jahat mate?” nina TUHAN si Erdolat. “Lang, madin Kuakap ngidah ia jera, gelah ia nggeluh.

²⁴Tapi adi kalak bujur lanai erbahan si mehuli, jenari ibenakenna ngelakoken kasa kai si jahat dingen nggesuh bagi si nilakoken kalak jahat, banci kin ia terus nggeluh? Lang! Kerina si mehuli si pernah ilakokenna sada pe lanai iinget. Mate me ia erkiteken la ia patuh, dingen erkiteken dosana.

²⁵Tapi nindu, ‘Kai si ilakoken Tuhan la kap payo. Begikenlah o kalak Israel. Akapndu kin perbahanenKu la payo? Perbahanenndu nge si la payo.

²⁶Adi kalak benar lanai ngaloken si mehuli, jenari ibenakenna ngelakoken si jahat kenca bage mate ia, ia mate erkiteken kejahaten si ilakokenna.

²⁷Adi kalak jahat jera, jenari ilakokenna kai si benar dingen mehuli, ikelinina kap kesahna.

²⁸Ngerti ia kerna kai si ilakokenna jenari jera ia, e maka la ia mate, tapi nggeluh.’

²⁹Jenari nindu, ‘Kai si ibahan Tuhan la kap payo.’ Akapndu kin perbahanenKu la payo? Perbahanenndu nge si la payo.

³⁰O kalak Israel, genduari Aku, TUHAN si Erdolat, ngataken man bandu maka, sekalak-sekalak kam Kuadili rikutken perbahanenna. Jeralah i bas kerina kejahatenndu nari, janah ola pelepas dosandu ngkernepken kam.

³¹Olanai lakoken kejahaten si enggo biasa ibahanndu, tapi pebaruilah ukur ras pusuhndu. O kalak Israel; man kadendu kin mate?

³²La sekalak pe ateKu kam mate.” Bage nina TUHAN si Erdolat. “Erkiteken si e, jeralah maka kam nggeluh.”