Read Batak Karo ESEKIEL 19 Bible Online

ESEKIEL 19 - Batak Karo bible

ESEKIEL 19

¹Isuruh Dibata aku ngendeken ende-enden ate ceda enda man dua kalak anak raja Israel:

²Tuhu nandendu desken sada singa beru-beru si mbisa, iasuhina anakna i tengah-tengah singa si merawa.

³Ipiarana sada anakna, iajarina ngerigep rubia-rubia; kenca bage, jelma pe ijerngemna.

⁴Bangsa-bangsa megi beritana, jenari alu sada lubang iperangkapna ia. E maka ikilingna igungna ku negeri Mesir ia ibabana.

⁵Indung singa tertima-tima, seh maka dungna bene pengarapenna. Kenca bage iajarina ka anakna si debanna, seh maka anakna e jadi sada singa si merawa.

⁶Kenca enggo dem belinna, iikut-ikutna singa-singa si deban. Ia pe erlajar ngerigep rubia-rubia man panganna, jenari jelma pe ijerngemna.

⁷Benteng-benteng irontaskenna, kuta-kuta iradaskenna. Tep-tep kali terbegi sorana erdengum, gentar kalak kerina ibahanna.

⁸E maka pulung kalak kerina, i japa nari pe reh kalak ngelawanca. Ipebelangna bantona, itangkapna i bas perangkapna.

⁹Itamakenna ia ku bas kurungen singa, jenari ibabana ku Babilon ngadap raja. I je ijagai kalak ndai ia, maka sorana pe lanai terbegi i deleng-deleng Israel.

¹⁰Nandendu desken sada batang anggur, si isuanken i tepi lau maler. Erkiteken la kurang-kurang launa, merabun bulungna, meramis buahna.

¹¹Dahan-dahanna paguh, payo man tungkat kinirajan. Batangna meganjang seh ku embun, kerina ngidahsa bulungna si merabun.

¹²Alu nembeh, ia iruah, jenari isampetken ku taneh. Angin timur rembus mahan buahna jadi kerah, dahan-dahanna mesuak, kerah jenari isuluh.

¹³Genduari ia isuanken i gurun pasir, i bas taneh kerah si la erlau.

¹⁴I bas ranggas-ranggasna gurlah api njulang, buah ras dahan-dahanna keri meseng. E maka lanai lit tading dahan si megegeh, lanai lit terpake man ciken kinirajan. Enda me ende-enden ate ceda, si rusur iende-endeken.