Read Batak Karo ESEKIEL 2 Bible Online

ESEKIEL 2 - Batak Karo bible

ESEKIEL 2

¹Ngidah si e, minter aku langkem i babo taneh. Kenca bage kubegi sora nina, “O manusia si ermasap-masap, tedisken. Ngerana ateku ras kam.”

²Tupung sora ndai ngerana denga, Kesah Dibata mengketi aku, jenari ipetedisna aku. Kubegi tole sora ndai nina,

³“O manusia si ermasap-masap, Kusuruh kam ku bangsa Israel si enggo berontak ngelawan Aku. Bangsa e tetap denga nge mberontak bali ras nini-ninina nai.

⁴Mekeng ia, janah la ihamatina Aku. Erkiteken si e Aku, TUHAN si Erdolat, nuruh kam ngataken man bana kai si Kukataken man bandu.

⁵Langa tentu ibegikenna kam ntah lang, tapi gelah enggo ietehna maka lit nge nabi i tengah-tengahna.”

⁶Tapi kam, o manusia si ermasap-masap, la banci mbiar man bangsa e tah pe kerna kai si ikatakenna. Ilawanna ras igombangina me kam, seh maka akapndu bali ras nggeluh i tengah-tengah kacip gelang. Bage gia, ola kam mbiar man pemberontak-pemberontak e aminna kai pe ikatakenna.

⁷Katakenlah man bana kai si Kusuruh kam ngatakenca, subuk ibegikenna ntah lang. Inget maka pemberontak kap ia kerina.

⁸O manusia si ermasap-masap, begiken kai si Kukataken bandu. “Ola kam jadi pemberontak bali ras ia kerina. Ngangaken babahndu jenari panlah kai si Kubereken man bandu.”

⁹Kuidah sada tan ndudurken sada gulungen surat man bangku. [12†]

¹⁰Ikimbangken tan ndai gulungen surat e, janah kuidah maka dua mbelahna isurati. Si tersurat i je e me: tangis-tangis, nderkuh, ras kata-kata ate mesui.