Read Batak Karo ESEKIEL 21 Bible Online

ESEKIEL 21 - Batak Karo bible

ESEKIEL 21

¹Kata TUHAN seh man bangku nina,

²“O manusia si ermasap-masap, ngeranalah kerna Jerusalem. Ngeranalah kerna ingan-ingan kalak ersembah. Persingeti negeri Israel

³maka Aku, TUHAN, ngatakenca bagenda: Musuhndu kap Aku. Kusintak me pedangKu, jenari Kubunuh kam kerina subuk si mehuli bage pe si jahat.

⁴Kupergunaken pedangKu ngelawan kerina kalak i selatan nari terus ku utara.

⁵Kenca bage kerina kalak meteh maka Aku, TUHAN enggo nintak pedangKu i bas sembungna nari janah lanai Kusembungken mulihi.”

⁶“O manusia si ermasap-masap, ndeherenglah kam tempa-tempa pusuhndu getem erkiteken aru ate. Ndeherenglah alu ceda ate i lebe-lebe jelma si nterem.

⁷Adi isungkun kalak kam ngkai maka kam ndehereng, kataken man bana maka kam ndehereng erkiteken berita si nandangi reh. Berita e mahanca pusuhna kerina dem alu kebiaren, tanna kote, bene ukurna, janah tiwenna nggirgir. Paksana enggo seh, janah kerina si e la banci la jadi,” bage nina TUHAN si Erdolat.

⁸Kata TUHAN seh man bangku nina,

⁹“O manusia si ermasap-masap, ernubuatlah. Turiken maka Aku TUHAN ngatakenca man bangsa enda bagenda, ‘Lit sada pedang, pedang si sangana igarut, igarut dingen igus-gusi seh entelap.

¹⁰Pedang e igarut lako munuh, igus-gusi seh erndilap bagi kilap. Lanai lit keriahen man bangsangKu, sabap kasa kai kata pertenget ras ukumen la diatena.

¹¹Pedang e sangana igus-gusi, gelah sikap man paken. Igarut dingen igus-gusi seh ntelap, gelah itamaken i bas tan sekalak pemunuh.

¹²Serkolah alu ate ceda, o manusia si ermasap-masap, sabap pedang e ipake ngelawan bangsangKu. Kerina peminpin rikut ras bangsa e pe, itampul seh mate kerina. E maka temtemlah bandu,

¹³sabap sangana Kuuji bangsangKu; janah adi la ia nggit jera, kerina si ndai la banci la jadi man bana.’ ”

¹⁴“Dage, o manusia si ermasap-masap, ernubuatlah. Tepukkenlah tanndu jadi sada tanda maka pedang e mulai nampuli kalak. Pedang e tuhu-tuhu sada pedang pemunuh, sada pedang si man kebiaren.

¹⁵Bene ukur bangsangKu ibahanna jenari guling ia. Kuancam kutana alu sada pedang si erndilap bagi kilap, si enggo sikap munuh.

¹⁶O pedang si ntelap, tampullah ku kawes ras ku kemuhen, tampullah ku ja saja atendu.

¹⁷Aku pe ertepuk ka gelah surut ateKu nembeh,” bage nina TUHAN.

¹⁸Kata TUHAN seh man bangku nina,

¹⁹“O manusia siermasap-masap, bahanlah capna dua dalan si banci ibentasi raja Babilon adi ia reh maba pedangna. Dalan si dua e benanana i bas sada negeri. Bahanlah papan penuduh dalan i bas persimpangen dalan e.

²⁰Sada nuduhken man raja e dalan kempak ingan kalak Amon e me kuta Rabba, janah sada nari nuju kempak kuta Juda si erbenteng e me kuta Jerusalem.

²¹Kenca bage tedis me raja Babilon i bas persimpangen dalan deherken papan penuduh ndai. Guna meteh dalan si apai si man ikutenken, ikocokna anak panahna; ertendung ia, ipepayona ate rubia-rubia si ipersembahkenna.

²²Nehenlah! Tanna si kemuhen njemak anak panah si ercap “Jerusalem”. Si e nuruh ia berkat janah nikapken perkakas guna ngerontasken tembok, nurakken surak-surak perang, namaken perkakas ndai i lebe-lebe pintu-pintu kerabangen, erbahan benteng ras engkali parik-parik.

²³Kalak Jerusalem la tek kerna si enda erkiteken perpadanen si ibahanna. Tapi nubuat enda ibahan lako ngingetken kerna dosa-dosana janah mpersingeti maka itaban me ia.

²⁴Enda me katangKu, Aku TUHAN si Erdolat. Dosa-dosandu enggo tangkas. Kerina kalak metehsa uga belinna salahndu. I bas kerina perbahanenndu icidahkenndu kejahatenndu. Kam iukum, janah iendesken me kam ku bas tan musuh.

²⁵Janah kam o pengulu-pengulu Israel si jahat dingen keliamen! Wari pengukumenndu enggo reh.

²⁶Aku, TUHAN si Erdolat enggo melasken katangKu. Tatanglah mahkotandu ras bulangndu. Nandangi sambar me kerina. Angkatkenlah kalak musil jadi penguasa. Dabuhkenlah kalak si genduari sangana erkuasa.

²⁷Runtuh, runtuh! Tuhu Kuruntuhken me kuta e. Tapi si enda langa jadi, langa reh kalak si enggo Kupilih lako ngukum kuta e. Kenca ia reh pagi, Kubereken man bana kuta e.”

²⁸“O manusia si ermasap-masap, ernubuatlah. Momokenlah man Amon katangKu enda, Aku TUHAN si Erdolat, sabap megombang ia man Israel. Kataken man bana bagenda, ‘Pedang enggo sikap guna engkernepken; enggo igus-gusi seh erkilat bagi kilap, lako munuh. [39†]

²⁹O kalak Amon pengenehenen si iidahndu la tuhu, janah nubuat si ibahanndu guak kap. Kam jahat dingen la terpake. Warindu enggo seh, wari pengukumenndu enggo reh. Itampul pedang e me kerahungndu.

³⁰Sembungkenlah pedangndu, o kalak Amon. Kam Kuukum i bas negeri inganndu ijadiken dingen inganndu tubuh.

³¹Kutungkasken me rawangKu si gara man bandu. Kuendesken kam man kalak si la meteh mekuah, si cerdik lako engkerapken kalak.

³²Ikernepken me kam alu api. Darehndu mambur i bas negerindu jine, janah lanai ise pe nginget kam pagi.’ ” Bagenda nina TUHAN.