Read Batak Karo ESEKIEL 22 Bible Online

ESEKIEL 22 - Batak Karo bible

ESEKIEL 22

¹Kata TUHAN seh man bangku nina,

²“O manusia si ermasap-masap, enggo sikap kam ngadili kuta si dem alu pemunuh-pemunuh e? Petangkas man bana kerina perbahanen-perbahanenna si macik e.

³Kataken man kuta e katangKu, Aku TUHAN si Erdolat bagenda: Erkiteken enggo bage buena penduduk si enggo ibunuhndu, janah enggo iliamindu bandu alu nembah man berhala-berhala, e maka paksandu enggo seh.

⁴Kam ersalah erkiteken munuh, janah keliamen erkiteken gana-gana bekasndu erbahan, e maka warindu enggo seh, paksandu enggo keri. Kupelepas kam iuru-uru janah igombang-gombangi kerina bangsa ras negeri-negeri.

⁵Subuk negeri si ndauh bage pe si ndeher megombang man bandu erkiteken kejahaten ras kinigutulenndu.

⁶Kerina peminpin-peminpin Israel ernalem kempak gegehna jine, janah munuhi dahinna.

⁷La lit sada pe i bas kuta e si mehamat man orang tuana. Bangsa si deban itipuna janah idaramindu untungndu i bas kesusahen diberu balu-balu ras anak melumang. [40†]

⁸La sitik pe kam mehamat kempak ingan-ingan si badia, janah wari Sabat la iperdiatekenndu. [41†]

⁹Piga-piga kalak pendudukndu erbahan kesaksin si guak gelah kalak iukum mate. Deba ipanna persembahen-persembahen si ipersembahken man gana-gana. Deba erlua-lua.

¹⁰Deba ipedemina nande ngudana. Deba ipaksana diberu si sangana nguda bulanna medem ras ia. [42†]

¹¹Deba erlua-lua, si debanna igodana permainna tah pe turangna pedauh nande.

¹²Lit ka pe pendudukndu jadi pemunuh upahen, deba mperbungaken duit man seninana bangsa Israel janah ipebayakna bana alu muat keuntungen i bas kesusahen seninana e. Enggo ilupakenna Aku.” Bagenda me nina TUHAN. [43†]

¹³“Erkiteken si e, genduari kutepuk me kam erkiteken kam ngerampuk dingen munuh e.

¹⁴Akapndu kin kam pang denga tah pe ngasup denga ngawatken tanndu adi enggo dung kam Kuukum? Aku, TUHAN enggo melasken kata, janah Kusehken kap KatangKu.

¹⁵Kukerapken pendudukndu ku tep-tep negeri ras bangsa, janah Kupengadi kerina perbahanenndu si jahat e.

¹⁶Erkiteken si e igombangi bangsa-bangsa si deban me kam, kenca bage itehndu me maka Aku kap TUHAN.”

¹⁷Kata TUHAN seh man bangku nina,

¹⁸“O manusia si ermasap-masap, kalak Israel e tuhu-tuhu la erguna bangKu. Bangsa e desken campuren tembaga, timah, besi, timah mbiring si tading jadi sampah i bas ginuhur pengane-nganen.

¹⁹Dage, Aku, TUHAN si Erdolat, ngatakenca maka bangsa e tuhu-tuhu la erguna bali ras sampah ndai. Kupepulung me ia kerina i Jerusalem,

²⁰bali ras pirak, tembaga, besi, timah mbiring, ras timah si itamaken i bas ginuhur pengane-nganen. Pernembeh ras gara ateKu ngelebur bangsa e, bali ras api si ngelebur besi.

²¹Tuhu, Kupepulung me ia i Jerusalem. Kupegara api pernembehKu i teruhna, jenari Kulebur ia.

²²Kulebur ia i Jerusalem, bali ras timah si melebur i bas ginuhur. Kenca bage itehna maka Aku, TUHAN, enggo encurcurken pernembeh ateKu man bana.”

²³Seh kata TUHAN man bangku nina,

²⁴“Kataken man bangsa Israel maka negerina la badia. Erkiteken si e Kuukum me negeri e perban nembeh ateKu.

²⁵Peminpin-peminpinna bali kap ras singa si erdengum kenca njerngem rubia-rubia. Peminpin-peminpin e munuh bangsana, jenari ibuatna kerina duit ras erta si terbuatca. Erkiteken ia munuh, ibahanna melala pernanden jadi mbalu.

²⁶Imam-imam ngelanggar Undang-undangKu janah la lit sitik pe kehamatenna nandangi kai si badia. La lit sitik pe ibahanna lainna nandangi kai si badia ras kai si la badia. La iajarkenna kai lainna barang-barang si bersih ras si la bersih rikutken aturen agama, janah la diatena pe wari Sabat. Erkiteken si e, bangsa Israel la mehamat man bangKu. [44†]

²⁷Pegawai-pegawai kerajan bali ras serigala si encaing-caing rubia-rubia si enggo ijerngemna. Munuhi peminpin-peminpin e lako ndatken kebayaken.

²⁸Nabi-nabi muniken dosa-dosa enda ndai kerina desken kalak si encet dingding alu kapur mbentar. Idahna pengenehenen si la tuhu, janah ibahanna nubuat-nubuat si guak. Ikatakenna maka kata TUHAN si Erdolat nge si ibelaskenna, tapi Aku, TUHAN, la pernah ngerana man bana.

²⁹Kalak bayak nipu ras ngerampuk. Jahat perbahanenna nandangi kalak musil janah idaramina untung i bas kalak musil ras i bas kalak pertandang.

³⁰Kudarami kalak si ngasup majekken tembok, tah pe si ngasup tedis i bas ingan-ingan i ja tembok e enggo runtuh lako mpertahanken negeri e tupung Kukernepken ateKu negeri e alu pernembeh ateKu, tapi la lit sada pe Kudat.

³¹Erkiteken si e Kucurcurken me pernembeh ateKu man bangsa e desken sada api si ngkernepken ia perban kai si enggo ilakokenna.” Bagenda me nina TUHAN si Erdolat.