Read Batak Karo ESEKIEL 23 Bible Online

ESEKIEL 23 - Batak Karo bible

ESEKIEL 23

²“O manusia si ermasap-masap, sekali jadi lit kap dua diberu si ersenina.

³Tupung singuda-nguda denga ia, sangana ia tading i Mesir, enggo iliamina bana ras dilaki, jenari jadi diberu perdenggal ia.

⁴Sintua gelarna Ohola (ia nggambarken Samaria) janah agina gelarna Oholiba (ia nggambarken Jerusalem). Kuempoi ia duana, janah duana mupus.

⁵Aminna Ohola enggo jadi ndeharangku, tetap denga ia jadi diberu perdenggal itami-tamina kal dilaki si ngena atena si i Assur nari e.

⁶Dilaki-dilaki e, e me serdadu-serdadu si erseragam ungu, puanglima-puanglima ras pegawai-pegawai si erpangkat meganjang; kerina ia perwira-perwira tentera si erkuda si mejile rupana.

⁷Ras perwira-perwira Assur e me Ohola erlua-lua. Janah erkite-kiteken kerincuhenna, iliamina bana alu nembah man berhala-berhala Assur.

⁸Ia tetap jadi diberu perdenggal bagi si ilakokenna nai i Mesir, i ja iliamina dirina ras dilaki mulai i bas paksa singuda-nguda mbaru mbelin denga pe, ia enggo ipedemi ras ibahan kalak bagi diberu perdenggal.

⁹Erkiteken si e Kuendesken ia man dilaki atena jadi si i Assur nari e.

¹⁰Itangtangi kalak ndai uisna seh manjang-anjang, jenari ibunuhna alu pedang. I japa pe diberu-diberu encakapken nasipna si la mehuli e.

¹¹Agina, Oholiba ngidah si enda ndai kerina. Tapi amin bage gia maciken denga ka nge lagu langkahna dingen keleken kerincuhenna erlua-lua asangken Ohola.

¹²Ia pe jadi atena nandangi puanglima-puanglima ras perwira-perwira tentera kuda Assur, e me anak-perana anak-perana si mejile rupana, si erpaken seragam mejile.

¹³Kuidah seh kal macikna lagu langkah Oholiba, bali macikna ras lagu langkah kakana.

¹⁴ [14-15] Reh dekahna reh macikna lagu langkah Oholiba. Leketkal matana ngidah gambar-gambar si iukir i bas dingding si icet alu rupa megara. Gambar-gambar ndai e me gambar perwira-perwira Babilon si ergenditken gendit si mejile ras topina pe metunggung kal.

¹⁵

¹⁶Kenca idahna gambar-gambar e, dem minter pusuhna alu kerincuhen, e maka isuruhna piga-piga persuruhen ku Babilon.

¹⁷Reh kalak ndai i Babil nari, medem ia ras Oholiba. Megasgas kal kalak ndai man bana, janah mesangat kal pencemarkenna ia, seh maka kedungenna ciga ate Oholiba man kalak Babil e.

¹⁸Kenca bage alu terang-terangen ipetangkasna man jelma si nterem maka ia sekalak diberu si perlua-lua, janah ibahanna kulana jadi dedahen kalak. Erkiteken si e ciga kal ateKu ngenehen ia, bali cigana ateku ngenehen kakana.

¹⁹Reh dekahna reh rusurna ia erlua-lua, bali ras si ibahanna nai tupung ia singuda-nguda denga, i ja ia jadi diberu si pendahinna erlua-lua i Mesir.

²⁰Merincuh kal ia medem ras dilaki si bali ras ringki kuda belinna kerincuhenna. (

²¹O Oholiba, iulihindu kepeken lagu langkahndu si nggesuh sanga kam singuda-nguda denga, i ja dilaki-dilaki bangsa Mesir ngguro-nguroken kam ras encemarken kengudanndu.)”

²²“Dage o Oholiba, Aku, TUHAN si Erdolat, nehken katangKu man bandu. Genduari enggo leja kam nandangi dilaki-dilaki atendu jadi ndube; tapi Kubahan maka nembeh atena man bandu janah Kubabai gelah ikelewetina kam.

²³Kupepulung kerina kalak Babil, Kaldea, Pekod, Soa, Koa ras kerina kalak Assur e. Kubaba man bandu puanglima-puanglima, kalak si erpangkat meganjang, perwira-perwira tentera kuda si nguda denga dingen mejile rupana e.

²⁴Iperangna me kam i utara nari alu tenterana si nterem, alu gereta perang ras gereta perbekalen. Alu make ampang-ampang ras topi waja, ikepungna me kam. Kuendesken kam ku bas tanna, gelah iadilina kam rikutken undang-undangna.

²⁵Erkiteken nembeh ateKu man bandu, Kupelepas ia ngelakoken perbahanen si kejam man bandu. Ikeretna igungndu, cupingndu, janah anak-anakndu ibunuhna. Anakndu dilaki ras diberu isarenkenna i bas kam nari, kenca bage itutungna geluh-geluhen.

²⁶Uisndu isintapkenna seh kam manjang-anjang, jenari ibuatna permatandu.

²⁷Alu bage Kupengadi me kerincuhenndu erlua-lua ras lagu langkahndu si nggesuh si enggo ilakokenndu mulai kin paksa kam i Mesir denga pe mbarenda. Lanai bo pagi diatendu ngenehen berhala-berhala, lanai kam teringet pe kerna Mesir.”

²⁸Bagenda nina TUHAN si Erdolat, “Kuendesken me kam kempak kalak si ciga dingen nembeh atendu.

²⁹Janah erkiteken nembeh atena man bandu, iangkatna me kerina barang-barang si enggo latih akapndu encarikenca, tapi itadingkenna kam manjang-anjang desken sekalak diberu perlua-lua, maka mela akapndu. Kerincuhenndu si macik dingen pendahinndu erlua-lua e nge

³⁰maka jadi si enda man bandu. Kam jadi diberu perlua-lua man kerina bangsa-bangsa janah iliamindu dirindu alu berhala-berhalana.

³¹Iusih-usihndu lagu langkah kakandu, janah erkiteken si e ukumenndu pe bali Kubahan.”

³²Nina TUHAN si Erdolat tole, “Kam arus minem tare cangkir kakandu, cangkir si mbages dingen galang. Isina dem alu kata penguru-nguru ras isak-isak, si arus ialokenndu i bas kerina kalak nari.

³³ [33-34] Cangkir kakandu Samaria, isina kebiaren ras kecedan. Kenca iinemndu isina seh keri, melimber akapndu janah mabuk kam. Janah alu pecah-pecah cangkir e, ilukaindu tentendu.” Bagenda me nina TUHAN si Erdolat.

³⁴

³⁵Nina TUHAN si Erdolat, “Erkiteken ilupakenndu janah itundalkenndu Aku, la banci la kam ngenanami kiniseran erkiteken kerincuhenndu si macik dingen pendahinndu erlua-lua.”

³⁶Nina TUHAN bangku, “O manusia si ermasap-masap, enggo kin kam sikap ngadili Ohola ras Oholiba? Turikenlah man bana kerna perbahanenna si nggesuh.

³⁷Erlua-lua dingen munuh ia; erlua-lua ia ras berhala-berhala janah ibunuhna anak-anakku si ipupusna.

³⁸Tapi labo terjeng e saja. Iliamina ka pe Rumah PertotonKu janah la iperdiatekenna Sabat si enggo Kutetapken.

³⁹I bas wari ia munuh anak-anakku jadi persembahen man berhala-berhala, i bas wari e ka nge ia reh ku Rumah PertotonKu ngeliamisa.

⁴⁰La erngadi-ngadi isuruhna kalak ngundang dilaki-dilaki i bas ingan si ndauh nari, e maka reh dilaki e ndahi ia. E maka ridi ia duana, ipejile-jilena bana janahna make perhiasen-perhiasen si meherga.

⁴¹Kenca bage kundul ia i das ingan medem si mejile. I lebe-lebena lit meja si dem alu pangan-pangan si entabeh, bage pe kumenen ras minak saitun si Kubereken man bana.

⁴²Jenari terbegi me sora kalak ersurak ersenang-senang rassa. Kalak ndai itenahken i gurun pasir nari. Itamakenna gelang i bas tan diberu e duana, bage pe mahkota si mejile i bas takalna.

⁴³Ningku i bas ukurKu, ‘Uga maka nggit denga kalak enda medem ras diberu si enggo melus perbahan erlua-lua rusur dahinna?’

⁴⁴Pegancih-gancih idahina Ohola ras Oholiba, diberu perlua-lua si nggesuh e.

⁴⁵Kalak bujur tentu ngukum diberu e duana erkiteken erlua-lua dingen munuh, sabap diberu e duana tuhu kin perlua-lua ras pemunuh.”

⁴⁶Erkiteken si enda me maka ikataken TUHAN si Erdolat, “Dilolah nterem jelma pebiar-biar ras ngerampok diberu e.

⁴⁷Suruh jelma si nterem e menterisa alu batu ras nakilsa alu pedang, janah munuhi anak-anakna, ras enciluk rumahna.

⁴⁸I belang-belang negeri e kusasapken kerina perbahanen si nggesuh e, gelah jadi sada pertenget man kerina diberu-diberu maka ola erlua-lua bagi diberu si dua e.

⁴⁹Janah kam o Ohola ras Oholiba, Kuukum me kam erkiteken perlangkahndu si macik e bage pe erkiteken dosandu nembah man berhala-berhala. Jenari ietehndu me maka Aku kap TUHAN si Erdolat.”