Read Batak Karo ESEKIEL 26 Bible Online

ESEKIEL 26 - Batak Karo bible

ESEKIEL 26

¹I bas wari si pemena, bulan si tertentu tahun si pesepuluh sadaken asum kami i bas pembuangen, seh kata TUHAN man bangku nina, [50†]

²“O manusia si ermasap-masap, enda me si erbahanca maka ersurak meriah kalak Tirus. Ersurak ia nina, ‘Jerusalem enggo getem! Perbinaganna si meriah enggo mesuni. E maka lanai ia banci ngimbangi kita i bas perbinagan.’ ”

³Erkiteken si e nina TUHAN si Erdolat, “Aku kap musuhndu, o kuta Tirus. Kusuruh melala bangsa nerang kam; ia reh desken galumbang lawit.

⁴Irontaskenna me tembok-tembokndu janah ibulakkenna menara-menarandu. Kenca bage, kasa taneh si lit i je Kusasap kerina seh maka sengkibul batu si melinang nari ngenca tading.

⁵Penjala nurung engkirahken jalana i babo batu ndai, batu si tading i bas lawit. Aku TUHAN si Erdolat enggo ngerana. Irampasi bangsa-bangsa me Tirus,

⁶janah alu pedangna ibunuhna kasa kalak si ringan i bas kuta-kuta i daraten Tirus. Kenca bage ieteh Tirus me maka Aku kap TUHAN.”

⁷ TUHAN si Erdolat ngerana nina, “O Tirus, Kubaba me raja Nebukadnesar i Babilon nari nerang kam. Raja si mbelin e reh i utara nari maba tentera si nterem, rikut ras kuda gereta perang, bage pe tentera erkuda.

⁸Penduduk si ringan i bas kuta-kuta i taneh daraten mate pagi i bas perang. Musuh engkali parik-parik, erbahan benteng-benteng, janah nusun ampang-ampang desken tembok lako ngimbangi kam.

⁹Tembok-tembokndu alu perkakas mecahken tembok, janah iruntuhkenna menara-menarandu alu balok-balok besi.

¹⁰Gebuk abu si nangkih erkiteken kudana si mbue namburi kam. Sora kudana si ngerintak gereta ras gereta perang, kumetter ibahanna tembokndu asum ia mentas arah pintu kerabangen kuta si enggo runtuh e.

¹¹Kalak si ngersak kuda ngerattuh arah pasar-pasarndu, ibunuhina pendudukndu alu pedangna. Tugu-tugu batundu si paguh dingen meganjang ibulakkenna.

¹²Musuh-musuhndu e rate-ate muat kebayakenndu. Iradaskenna tembok-tembokndu janah rumahndu si mejile irontaskenna kerina. Ibuatna kerina batu, perkayunna, bage pe kerina perkakas rumah si enggo runtuh e, jenari igedapkenna ku lawit.

¹³Ku pengadi kerina ende-endenndu, janah Kupesinik sora kulcapindu. [51†]

¹⁴Batu si melinang, ingan penjala-jala engkerahken jalana, batu si sada e nari ngenca Kutadingken. Kuta e lanai ndigan pe iumban. Aku, TUHAN si Erdolat, enggo melasken katangKu.”

¹⁵Enda me kata TUHAN si Erdolat kempak kuta Tirus, “Kerina penduduk si ringan i tepi lawit gentar tupung ibegina sora nderkuh erkiteken ketalunndu, bage pe sora serko kalak si ibunuhi musuhndu.

¹⁶Ngidah si e, raja-raja si erkuasa i daerah tepi lawit nusur i bas kursi kinirajanna nari. Itangtangina jubah kinirajanna ras bajuna si ersulam, jenari nggirgir ia kundul i taneh. Perban bage biarna ngidah kecedan si reh man bandu, la erngadi-ngadi ia nggirgir. [52†]

¹⁷Kenca bage iendekenna ende-enden penguburen enda man bandu: Enggo getem kal kuta si terberita! I lawit pe enggo ilesapken kerina kapalna. Mbarenda lawit ikuasai pendudukna, janah kalak si ringan i tepi lawit gentar ibahanna.

¹⁸Genduari tupung paksana ia italuken musuhna, penduduk pulo-pulo nggirgir kerina. Sengget kal kap ia, ngidah kuta e enggo seh getemna.”

¹⁹Nina TUHAN si Erdolat, “Kubahan kam jadi kuta si terulang, bali ras kuta-kuta si la lit pendudukna, Kutamburi kam alu lau lawit si mbages.

²⁰Kusuruh kam lawes kempak doni kematen, maka ersada ras kalak si nggeluh i bas paksa si nai. Kubahan kam tetap ringan i bas doni kematen e, i tengah-tengah keruntuhen si rasa lalap, erteman ras kalak si enggo mate. E maka ngasa ndigan pe tanehndu lanai iingani, janah kam lanai tama beligan i bas kalak si nggeluh.

²¹Kam enggo dung, janah ngidah perbahanenKu man bandu, gentar kalak kerina. Idarami kalak gia kam, tapi asa ndigan pe la ia jumpa.” Bagenda me nina TUHAN si Erdolat. [53†]