Read Batak Karo ESEKIEL 27 Bible Online

ESEKIEL 27 - Batak Karo bible

ESEKIEL 27

¹Kata TUHAN seh man bangku nina,

²“O manusia si ermasap-masap, endekenlah ende-enden penguburen man kuta Tirus,

³kuta si ingani i tepi lawit, si erbahan perbinagan ras kerina kalak si ringan i tepi lawit. Turiken man bana katangKu, TUHAN si Erdolat, bagenda: O Tirus, alu ukur meganjang nindu ngerana, ‘KinijilenKu la lit ngelawanca.’

⁴Rumahndu tempa-tempa i lawit, kam ipanteki desken sada kapal si mejile.

⁵Dingdingndu e me kayu aras Deleng Hermon, tiang layarndu kayu cemara Libanon.

⁶Si ibahan jadi dayung-dayungndu, kayu jati i Basan nari. Geladakndu kayu cemara i Siprus nari, ihiasi alu gading si meherga.

⁷Layarndu, linen sulamen i Mesir nari, i dauh nari pe murah nandaisa. Tenda-tendandu kain alus si mejile, kain ungu i Kiprus nari.

⁸Tukang dayungndu i Sidon ras Arwad nari. Anak buahndu, pelaut-pelaut si beluh.

⁹Tukang-tukang kayu i bas kapal e, e me pande tua i Bablas nari. Pelaut i bas tep-tep kapal, reh nukuri barang-barangndu.

¹⁰Serdadu-serdadu Persia, Lidia ras Libia ikut jadi tenterandu. Isangketkenna ampang-ampangna ras topi wajana i bas ingan tenterandu. Italukenna musuh-musuhndu tama kemuliandu.

¹¹Serdadu-serdadu i Arwad nari engkawal tembokndu, kalak Gamat erjaga i bas menarandu. Isangketkenna ampang-ampangna i bas tembok-tembokndu. Kalak ndai me erbahanca maka seh kal jilendu.

¹²Erbinaga kam i Sepanyol, jenari ibuatndu pirak, besi, timah, ras timah mbiring tukar barang-barangndu si mbue la teralang.

¹³Erbinaga kam i Junani, i Tubal ras i Mesek, janah barang-barangndu itukarkenndu ras budak-budak bage pe barang-barang tembaga.

¹⁴Itukarkenndu barang-barangndu ras kuda pengerintak gereta, kuda perang, bage pe kuda baban i Bet-Togarma nari.

¹⁵Penduduk Rodus pe reh erbinaga ku kam; penduduk si ringan i daerah tepi lawit nukur barang-barangndu alu gading ras kayu mbiring.

¹⁶Perbinaga i Siria nari nukur barang-barangndu ras ulih tanehndu si melala e. Iberekenna bandu jadi penukur barang-barangndu e batu permata, uis meherga, uis si enggo isulam, linen alus, batu permata karang, batu permata rubia.

¹⁷Juda ras Israel mereken gandum, tengguli, minak saitun ras rempah-rempah jadi penukur barang-barangndu.

¹⁸[18-19] Perbinaga i Damaskus nari nukur binagandu ras ulih tanehndu, janah jadi galarna iberekenna bandu anggur i Helbon nari bage pe mbulu biri-biri i Sahar nari, bage pe besi si enggo itepa ras rempah-rempah.

²⁰Perbinaga i Dedan nari nukarken kain pelana ras barang-barangndu.

²¹Perbinaga Arab ras raja-raja negeri Kedar nukur barang-barang binagandu alu anak biri-biri ras kambing.

²²Saudagar-saudagar i Syeba ras Raama nari nukur barang-barangndu alu permata, emas ras rempah-rempah si mejilena.

²³Kuta-kuta Haran, Kane, Eden, saudagar-saudagar Syeba, kuta-kuta Assur ras Kilmad kerina erbinaga ras kam.

²⁴Idayakenna man bandu uis si la tanggung jilena, uis si meherga, uis si enggo i sulam, permadani si erbage-bage rupana bage pe nali si nteguh.

²⁵Barang-barangndu ibaba tare kapal-kapal barang si galang. Kam desken kapal i tengah lawit, dem alu barang-barang si mberat. [54†]

²⁶Tupung kam ikayuhken ku tengah lawit, angin timur nggedapken kam ndauh i daraten nari.

²⁷Kerina barang-barang kebayakenndu, kerina anak kapalndu, tukang kayu kapal ras saudagar-saudagarndu, kerina serdadu-serdadundu si lit i bas kapal, la lit si tading-tading, kerina gedap ku lawit, tupung kam karam.

²⁸Sora nderkuh anak kapal si karam e, terbegi erlolingen i tepi lawit.

²⁹Genduari kerina kapal e enggo itadingken, kerina anak kapal enggo seh i daraten.

³⁰Kam ingandungina tangis ia, ceda atena. Icaburkenna abu ku takalna, i babo taneh erguling-guling ia.

³¹Erkiteken kam itakal-tabukenna bana, ipakena uis guni tanda ate ceda. Tangis ia kerina erkiteken kam, ingandungina kam alu pusuh si getem.

³²Kenca bage iendekenna man bandu, ende-enden penguburenndu, ‘O Tirus, ise kin terpeseri ras kam, Tirus si genduari sinik i teruh lawit?

³³Tupung barang-barangndu lawes ngepari lawit, icukupindu kerina keperlun bangsa-bangsa. Raja-raja ibahanndu bayak, erkiteken barang-barang kebayakenndu.

³⁴Genduari kam enggo karam, enggo gedap i bas lawit si mbages. Barang-barangndu ras si erdahin ras kam, bene ras kam i bas lawit si mbages.’

³⁵Kerina kalak si ringan i tepi lawit sengget megiken kejadin si ngkenai kam. Subuk raja-rajana pe gentar; arah ayona teridah maka mbiar kal ia.

³⁶Kam enggo kernep, masap seh rasa lalap. Janah kerina saudagar-saudagar i belang-belang doni gentar, sabap mbiar ia tahsa ia pe jumpa cilaka bagi kam e.”