Read Batak Karo ESEKIEL 28 Bible Online

ESEKIEL 28 - Batak Karo bible

ESEKIEL 28

¹Kata TUHAN seh man bangku nina,

²“O manusia si ermasap-masap, turikenlah katangKu, Aku, TUHAN si Erdolat, man raja Tirus, bagenda: Erkiteken ukur meganjang, ikatakenndu maka kam dibata. Ikatakenndu maka kam kundul i bas kursi kemulian si ikeleweti lawit, bali ras dibata. Banci saja nge ipekulah-kulahndu bandu dibata, tapi situhuna labo kam dibata, tapi manusia si ermasap-masap.

³Iakapndu pentaren kam asangken Daniel, iakapndu la lit rahasia terbuni bandu.

⁴Kepentarenndu ras kebeluhenndu mahanca kam bayak, bayak emas ras pirak.

⁵Tuhu seh kal beluhndu, erbinaga, seh maka genduari enggo bayak kal kam. Janah erkiteken kebayakenndu enggo meganjang ukurndu.

⁶Dage genduari enda me katangKu, Aku, TUHAN si Erdolat: Erkiteken iakapndu bali pentarndu ras dibata,

⁷Kusuruh me musuh si kejam nerang kam. Kerina barang-barang si mejile si enggo ipepulungndu arah kebeluhenndu ras kepentarenndu, ikernepkenna kerina.

⁸Ibunuhna kam jenari itamakenna i bas kuburen si erlau.

⁹Adi enggo reh kalak lako munuh kam, banci denga kin ikatakenndu maka kam dibata? Adi enggo kam petala-tala ras kalak si munuh kam, kam pe manusia biasa nge, manusia si ermasap-masap.

¹⁰Mate me kam desken biang erkiteken ibunuh kalak si deban si la nandai Dibata.” Aku, TUHAN si Erdolat, Aku kap si ngataken si enda.

¹¹Seh ka tole kata TUHAN man bangku nina,

¹²“O manusia si ermasap-masap, erceda atelah kam kerna cilaka si enggo nggempangi raja Tirus. Turiken man raja e katangKu, Aku TUHAN si Erdolat; bagenda nindu, ‘Nai pernah kam jadi usihen si mejile kal. Andiko, seh kal mbarenda pentarndu ras jilendu.

¹³Kam ringan i bas peken Eden, peken Dibata. Ipakendu perhiasen si erbage-bage rupana; umpama: rubia ras intan; topas batu pirus, karnelia, ratna, batu sapir, zamrut, batu permata si megara. Barang perhiasen emasndu pe melala.

¹⁴Kerina si e ibahan man gunandu, i bas paksa mula jadindu nari. Malekat si rejin Kusuruh engkawali kam. Kam ringan i bas delengKu si badia janah erdalan i tengah-tengah batu permata si erndilap-ndilap.

¹⁵Tangtang tubuhndu nari lagu langkahndu seh kal ulina. Tapi dungna jahat perbahanenndu.

¹⁶Kuskas kam nukur ras erdaya i bas perbinaganndu, janah si enda mabai kam erdosa janah mahan ate kalak mesui. E maka Kupaksa kam nadingken delengKu si badia, janah malekat si njagai kam ndai mpelawes kam i tengah-tengah permata si erndilap-ndilap e nari.

¹⁷Meganjang ukurndu erkiteken jilendu, janah gelarndu si terberita e mahanca kam ngelakoken lagu langkah si bodoh. Erkiteken si e Kudampesken kam ku taneh janah Kubahan kam jadi sada pertenget man raja-raja.’

¹⁸Erkiteken kejahatenndu i bas perbinaganndu, keliamen ibahanndu inganndu ersembah. E maka kuciluk kam, o kuta Tirus, seh rata ras taneh. Genduari kasa kalak si ngenehen kam, abu nari ngenca idahna.

¹⁹Kam enggo lesap, masap seh rasa lalap. Kerina bangsa-bangsa si pernah nandai kam gentar kerina, sabap mbiar ia, ntahsa ia pe jumpa cilaka si enggo engkenai kam.”

²⁰Kata TUHAN seh man bangku nina,

²¹“O manusia si ermasap-masap, sumpahilah kuta Sidon.

²²Kataken man penduduk kuta e katangKu, Aku TUHAN si Erdolat, bagenda: Aku kap musuhndu, o Sidon. Ipuji kalak me Aku erkiteken perbahanenKu man bandu. Tupung Aku ngukum pendudukndu, ietehna me maka Aku kap TUHAN si Badia si ersegat ate nandangi kasa kai si jahat.

²³Kutamaken ku je penakit, janah kupelepas dareh maler arah pasar pasarndu. Iserang me kam i ja nari pe janah pendudukndu mate ibunuh. Kenca bage ietehndu me maka Aku kap TUHAN.”

²⁴Nina TUHAN, “Negeri-negeri si pernah megombang man Israel, si lit i sekelewetna, lanai ndigan pe bagi suga ntah duri si nakiti Israel. Ieteh bangsa-bangsa maka Aku kap TUHAN si Erdolat.”

²⁵Nina TUHAN si Erdolat, “Kubaba me bangsa Israel mulih i bas negeri-negeri si ndauh nari ku ja mbarenda ia Kukerapken. E maka kerina negeri-negeri meteh maka badia kap Aku. Ringan me bangsa Israel i bas tanehna jine, negeri si Kubereken man Jakup, suruh-suruhenKu.

²⁶Alu teneng ringan ia i je. Ipajekkenna rumahna, isuanina peken anggur. Kuukum me kerina negeri-negeri sekelewetna si megombang man bana. E maka dame me Israel; kenca bage ietehna me maka Aku kap TUHAN, Dibatana.” [55†]