Read Batak Karo ESEKIEL 29 Bible Online

ESEKIEL 29 - Batak Karo bible

ESEKIEL 29

¹I bas wari sepuluh dua, bulan si pesepuluhken, tahun si pesepuluhken sanga kami i bas pembuangen, seh kata TUHAN man bangku nina, [56†]

²“O manusia si ermasap-masap, sumpahilah raja Mesir. Turiken man bana uga ia ras negerina i ukum.

³Kataken man bana maka enda me katangKu, Aku TUHAN si Erdolat, man raja Mesir: Aku kap musuhndu, o naga raksasa, si gempang i bas lau belin. Ikatakenndu maka Lau Nil kam empuna, janah nindu kam erbahanca.

⁴Kutamaken me kawil si galang i bas isangndu, janah Kubahan maka nurung si lit i bas lau belinndu e leket ku dagingndu. Kenca bage kurintak me kam i bas Lau Nil e nari, rikut ras kerina nurung si leket i bas dagingndu.

⁵E maka Kusampetken kam ras kerina nurung e ku gurun pasir. Badanndu ndabuh ku taneh, janah ikuburken, jenari Kubereken man pangan perik-perik ras rubia-rubia kerangen.

⁶Kenca bage kerina kalak Mesir meteh maka Aku kap TUHAN.” Nina TUHAN, “O kalak Mesir! Kalak Israel ernalem man penampatndu, tapi kam la lebih asangken ciken si medate. [57†]

⁷Adi icikenken kam, minter kam penggel, tercucuk kikikna ibahanndu, janah tersiher awakna.

⁸Dage, genduari Aku TUHAN si Erdolat, ngatakenca man banndu maka Kusuruh me tentera lako nerang kam alu pedang, janah ibunuhna rayatndu, ras asuh-asuhenndu.

⁹Mesir nandangi salih me jadi negeri si lume dingen terulang. Kenca bage itehndu maka Aku kap TUHAN. Perban ikatakenndu maka Lau Nil kam empuna dingen kam si mahanca:

¹⁰e maka Aku kap musuhndu ras musuh Lau Nilndu e. Kubahan Mesir jadi negeri si lume dingen terulang, mulai kuta i Mikdol nari seh ku kuta Aswan i Selatan terus ku perbalengen Sudan.

¹¹La lit manusia tah rubia-rubia si ndalani negeri e. Empat puluh tahun dekahna la lit kai pe si nggeluh i je.

¹²I bas kerina negeri-negeri si melungen, Mesir ngenca Kubahan negeri si melungunna. Empat puluh tahun dekahna kuta-kuta Mesir runtuh, janah i bas kerina kuta si enggo runtuh, kuta-kuta Mesir ngenca si mesangatna. Kalak Mesir Kubahan jadi pengungsi. Merap ia ku kerina negeri, jenari ringan i tengah-tengah bangsa si deban.”

¹³Nina TUHAN si Erdolat, “Kenca lepas empat puluh tahun kalak Mesir Kubaba mulih i bas negeri-negeri si deban nari inganna Kukerapken,

¹⁴janah Kubere ia ringan i Mesir selatan, ingan pengulihenna. I bas ingan e, ia jadi kerajan si la megegeh,

¹⁵janah e me si la megegehna i tengah-tengah kerina kerajan. Ngayak ndigan pe lanai ia erkuasa nandangi bangsa si deban. La sitik pe ia Kubahan meherga seh maka la ia ngasup maksaken sura-surana man bangsa apai pe.

¹⁶Ngayak ndigan pe Israel lanai ernalem kempak penampat Mesir. Mara si enggo jadi man Mesir mereken pertenget man Israel maka lepak kal tuhu-tuhu ernalem man Mesir. Kenca bage ieteh Israel me maka Aku kap TUHAN si Erdolat.”

¹⁷I bas wari si pemena, bulan si pemena, tahun si peduapuluh pituken sanga kami i bas pembuangen, kata TUHAN seh man bangku nina,

¹⁸“O manusia si ermasap-masap, nai Raja Nebukadnesar mahan serangen nandangi Tirus, Isuruhna tenterana maba baban si mberat seh maka takal tentera e enggo megusgus jadi melinang janah barana meculaken. Tapi subuk raja e bage pe tenterana la rulih sitik pe i bas kerina kelatihenna e.

¹⁹Dage genduari enda me katangKu, Aku TUHAN si Erdolat: Kubereken me negeri Mesir man Raja Nebukadnesar. Irampok ras irampasna me kerina kebayaken Mesir jadi upah tenterana.

²⁰Taneh Mesir Kubereken jadi ulih latihna, erkiteken tenterana erdahin guna Aku. Bagenda me nina TUHAN si Erdolat.

²¹Kenca jadi pagi si e, Kubahan bangsa Israel jadi megegeh, janah erkiteken si e o, Esekiel Kubere kam ngerana i ja kerina kalak banci megiken kam, maka itehna Aku kap TUHAN.”