Read Batak Karo ESEKIEL 30 Bible Online

ESEKIEL 30 - Batak Karo bible

ESEKIEL 30

¹Jenari seh kata TUHAN man bangku,

²“O manusia si ermasap-masap ernubuatlah kam janah momoken kai si Kukataken: Andiko, enggo reh wari cilaka,

³enggo ndeher warina TUHAN nehken ukumenNa. Wari geltem, embun seh kapalna, e me wari kiniseran man bangsa-bangsa,

⁴Kesusahen reh man Sudan. I Mesir pecah peperangen. Nterem i je kalak maten, negeri e irampasi janah ibahan jadi runtuhen.

⁵I bas perang e melala mate tentera upahen i Sudan nari, Libia, Lidia, Arab, Kub, janah bangsangKu jine pe.”

⁶Nina TUHAN si Erdolat, “Mulai i Migdol nari i Utara terus ku Aswan i Selatan, kerina kalak si mpertahanken Mesir mate i bas peperangen. Tentera kemegahen Mesir ikernepken. Aku, TUHAN si Erdolat ngatakenca.

⁷Negeri e jadi sada negeri si melungen kal i bas kerina negeri-negeri, janah kuta-kutana keri kal runtuh.

⁸Tupung Mesir Kuciluk janah kerina si mpertahankenca mate, jenari ietehna me maka Aku kap TUHAN.

⁹Adi wari e enggo seh, janah Mesir enggo ikernepken, Kusuruh me persuruhen tare kapal nengget Sudan; la iarapna jadi si e man bana, e maka gentar ia kerina. Wari e enggo reh!”

¹⁰Nina TUHAN si Erdolat, “Kupake Raja Nebukadnesar i Babilon nari lako engkeriken kebayaken Mesir.

¹¹Nebukadnesar ras tenterana si la meteh mekuah reh engkernepken negeri e. Iserangna Mesir alu pedang, janah amparen me mait i belang-belang negeri e.

¹²Lau Nil Kukerahi janah Kutamaken Mesir i teruh kuasa kalak jahat. Bangsa si deban mahanca getem kerina negeri e.” Bagenda nina TUHAN.

¹³Nina ka TUHAN tole, “Kukernepken me gana-gana ras dibata-dibata palsu i Mempis. Lanai lit ise pe si ngerajai Mesir, janah gentar kerina bangsa e Kubahan.

¹⁴Terulang Kubahan Mesir selatan, janah Kuciluk Kuta Soam i utara. Ibukotana, Tebe Kuukum,

¹⁵janah kebayakenna Kukernepken. Kutelkasken nembeh ateKu man Pelusium, kuta si jadi benteng negeri Mesir.

¹⁶Kuciluk negeri Mesir maka mesui kal ate Pelusium. Runtuh me tembok kuta Tebe, jenari banjir me kuta e.

¹⁷Anak perana kuta Heliopolis ras Bubastis mate i bas perang e, janah kalak si debanna ibaba jadi tabanen.

¹⁸Kenca kuasa Mesir Kuruntuhken janah gegeh si iagahkenna Kukeriken, gelap me Tahpanhes. Embun mekapal nutupi Mesir, janah kerina penduduk kuta-kutana ibaba jadi tabanen.

¹⁹Kenca bagenda pengukumKu Mesir, itehna maka Aku kap TUHAN.”

²⁰I bas wari pitu, bulan si pemena, tahun si pesepuluh sadaken, sanga kami i pembuangen, seh kata TUHAN man bangku nina:

²¹“O manusia si ermasap-masap, enggo Kupenggelken tan raja Mesir. La lit ise pe si malutisa, la lit ise pe si ngerempuisa tanna si penggel e gelah malem, maka megegeh mulihi ngawatken pedang.

²²Dage enda me katangKu, Aku TUHAN si Erdolat: Aku kap imbang raja Mesir. Kupenggelken tanna duana, subuk si langa penggel genduari, bage pe si enggo penggel, gelah ndabuh pedang e i bas tanna nari.

²³Kukerapken me kalak Mesir e ku belang-belang doni.

²⁴Kenca bage megegeh Kubahan tan raja Babilon, jenari Kutamaken pedangKu i bas tanna. Tapi Kupenggelken tan raja Mesir maka ia ndehereng dingen mate i lebe-lebe musuhna.

²⁵Tuhu, Kupekote me ia, janah Kupegegehi raja Babil. Kenca Kubereken bana pedangKu, janah iawatkenna kempak Mesir, kerina kalak metehsa maka Aku kap TUHAN.

²⁶Kukerapken kalak Mesir ku belang-belang doni. Kenca bage ietehna maka Aku kap TUHAN.”