Read Batak Karo ESEKIEL 31 Bible Online

ESEKIEL 31 - Batak Karo bible

ESEKIEL 31

¹I bas wari si pemena, bulan sipeteluken, tahun si pesepuluh sadaken, sanga kami i bas pembuangen, kata TUHAN seh man bangku nina,

²“O manusia si ermasap-masap, kataken man raja Mesir ras rayatna bagenda: Mbelin kal tuhu kuasandu! Ras kai kin terpeseri kemulianndu?

³Kam bali kap ras cemara Libanon, dahan-dahanna mejile dingen merabun. Tuhu meganjang kal kepeken, pucukna seh ku embun.

⁴Perturahna mejile perban cukup launa, lau belin i teruh taneh mereken nakanna. Taneh inganna turah erlau ibahanna, maler pe i bas kerangen ku kayu-kayu si debanna.

⁵Erkiteken launa la kurang-kurang, batangna turah jadi meganjang. Ganjangen ia asa kayu si debanna, dahanna galang dingen seh gedangna.

⁶Perik-perik si melala erbagena, kerina rasar i bas dahan-dahanna. Rubia-rubia kerangen nubis i teruh batangna, bangsa-bangsa doni cilinggem i bas endemna.

⁷Andiko kayu e, seh kal tuhu jilena, batangna meganjang, dahanna pe gedang ka. Uratna mbages ku teruh, seh ku lau belin si lit i teruh taneh,

⁸La lit cemara i bas paken Dibata, terpeseri ras cemara si sada enda. La lit kayu si bage paguhna dahanna, la lit kayu i bas paken Dibata bage jilena. [58†]

⁹Aku kap mahanca ia mejile, rikut ras dahanna gedang dingen mbue. Kerina kayu si lit i bas paken Dibata kerina kayu i bas Eden iri ngidahsa.

¹⁰Dage, Aku TUHAN si Erdolat, genduari nuriken man bandu kai si nandangi jadi man kayu si pucukna seh ku embun e. Reh ganjangna ka ukurna.

¹¹Erkiteken si e Kutulak ia dingen Kubereken man bangsa si deban. Sue ras kejahatenna, bage me perbahan bangsa si deban ndai man kayu e.

¹²Sada bangsa si la meteh ate mekuah reh nabah kayu e, jenari itadingkenna. Ranggasna ras dahanna si enggo penggel ndabuh ku kerina deleng ras baluren i belang-belang negeri e. Kerina bangsa-bangsa si gelgel nari ringan i teruhna, lawes me.

¹³E maka rehen me perik-perik, jenari ningger i bas kayu si enggo mbulak e, janah rubia-rubia merjaki dahan-dahanna.

¹⁴Dage mulai genduari nari, lanai lit ndigan pe batang kayu turah bage ganjangna; ndigan pe lanai lit batang kayu si pucukna seh ku embun aminna uga gia buena lau si idatca. Kerinana la banci lang mate, bali ras manusia si ermasap-masap, jenari pulung ras kerina kalak si enggo nusur ku doni kematen.”

¹⁵Enda me tole si ikataken TUHAN si Erdolat, “Tupung batang kayu e nusur ku doni kematen, Kusuruh lau si lit i teruh taneh namburisa, gelah e jadi tanda erceda ate. Lau belin la Kubere maler, janah Kupelepas lau si kitik-kitik malerken launa. Erkiteken batang kayu e enggo mate, Deleng Libanon Kubahan jadi gelap, dingen kerina batang kayu i bas kerangen e jadi melus.

¹⁶Tupung batang kayu e Kupesusur ku doni kalak mate, sorana mbulak erbahanca nggirgir bangsa-bangsa. Kerina batang kayu Eden, bage pe kerina kayu pilihen i Libanon si ndat lau cukup, si enggo lawes kempak doni si i teruh, ermeriah ukur erkiteken kayu e enggo mbulak.

¹⁷Radu ras me kerina berkat ku doni kematen gelah pulung ras si enggo leben mbulak. Janah kerina kalak si ringan i teruh linggemna ikerapken ku tengah bangsa-bangsa.

¹⁸Batang kayu ndai nggambarken raja Mesir ras kerina rayatna. Batang kayu si turah i Eden pe la lit bage ganjangna ras jilena. Tapi genduari, nusur me ia ku doni kematen bali ras kayu-kayu Eden, jenari pulung ras kalak si la erdibata bage pe si mate i bas peperangen. Enda me katangKu,” nina TUHAN si Erdolat.