Read Batak Karo ESEKIEL 32 Bible Online

ESEKIEL 32 - Batak Karo bible

ESEKIEL 32

¹I bas wari si pemena, bulan sepuluh dua, tahun si pesepuluh duaken sanga kami i bas pembuangen, seh kata TUHAN man bangku nina:

²“O manusia si ermasap-masap, persingetilah raja Mesir. Peseh man bana katangKu enda: Kam erlagak bagi singa i tengah-tengah bangsa-bangsa, tapi situhuna buaya nge kam, si erlangi i bas lau belin. Megembur ibahanndu lau alu nahendu, janah melket bandu lau belin e.

³Sanga pulung pagi bangsa-bangsa Kutangkap kam alu jala-ngKu, janah Kusuruh bangsa-bangsa e ngerintaksa ku duru.

⁴Kudampesken me kam ku taneh, jenari Kupepulung kerina perik-perik ras rubia-rubia doni enda mangani dagingndu.

⁵Jenari deleng ras Baluren Kutambusi alu bangkendu si macik.

⁶Darehndu Kuamburken maka megara ibahanna kerina deleng-deleng, janah lau mbelin dem ibahanna.

⁷Tupung kam Kukernepken, langit Kutamburi dingen bintang-bintang Kupemagem. Matawari ketamburen ibahan embun, bulan pe la ersinalsal. [59†]

⁸Kunimpeti kasa si terang i das langit janah doni Kubahan jadi gelap tuhu-tuhu. Enda me katangKu, Aku TUHAN si Erdolat.

⁹Tupung Kupembar berita kerna kebenenndu i tengah-tengah bangsa-bangsa si la pernah ibegindu pe, mbue bangsa-bangsa keharun.

¹⁰PerbahanenKu man bandu mahanca sengget melala bangsa. Tupung Aku ngawatken pedangKu, raja-raja nggirgir perban biarna. I bas warina kam guling dingen ampar, kerina raja-raja nggirgir perban aru atena kerna kesahna.”

¹¹Nina TUHAN si Erdolat, “Pedang raja Babilon iawatken kempak kam.

¹²Kusuruh serdadu bangsa-bangsa si kejam ngawatken pedangna, jenari ibunuhna kerina rayatndu. Kerina rayatndu, bage pe si debanna si iagahkenndu, ikernepken me kerina.

¹³Kubunuh kerina asuh-asuhenndu deherken pelolonna, maka lanai lit manusia tah pe rubia-rubia si nggemburi lau e.

¹⁴Kupelepas lau e kenden maka meciho mulihi, bage pe lau belinndu maler alu teneng. Aku TUHAN si Erdolat enggo melasken katangKu.

¹⁵Kenca Kukernepken kasa si nggeluh i Mesir dingen negeri e Kubahan jadi terulang, ietehna me maka Aku kap TUHAN.

¹⁶Kata persinget enda, jadi ende-enden penguburen me pagi. Diberu i bas bangsa-bangsa ngendeken ende-enden e, lako nangisi Mesir ras kerina rayatna.” Bagenda me nina TUHAN si Erdolat.

¹⁷I bas wari sepuluh lima, bulan si pemena, tahun si pesepuluduaken, sanga kami i bas pembuangen, kata TUHAN seh man bangku nina,

¹⁸“O manusia si ermasap-masap, ngandunglah kam erkiteken kalak Mesir si nterem e. Peberkat ia ku doni kalak mate radu ras bangsa-bangsa si deban si megegeh.

¹⁹Kataken man bana kerina; bagenda, ‘Akapndu kin jilen kam asa kerina kalak si deban? Berkat me kam ku doni kalak mate, janah ampar i je ras kalak si la erdibata.’

²⁰Ndabuh me kalak Mesir radu ras kalak si mate i bas perang. Enggo sikap sada pedang lako munuhisa kerina.

²¹Puanglima-puanglima si mbisa bage pe kalak si erperang nampati Mesir, kerina ngalo-ngalo kalak Mesir e i bas doni kematen. Ersurak ia nina, ‘Kalak si la erdibata si mate i bas perang, enggo nusur ku jenda janah enggo ampar ijenda!’

²²Assur pe enggo i je, rikut ras kuburen serdaduna i sekelewetna. Kerina ia mate i bas peperangen.

²³Kuburenna i bas ingan si mbagesna kal i doni kematen. Kerina serdaduna mate i bas perang, janah kuburenna lit i sekelewetna. Tupung nggeluh denga nai, mbiar kerina doni ibahanna.

²⁴Elam pe i je, rikut ras kuburen serdaduna i sekelewetna. Kerina ia mate i bas peperangen, janah alu la isunat, nusur ia ku doni kematen. Asum ia nggeluh denga, mbiar kalak kerina ibahanna, tapi genduari enggo ampar ia, la lit ergana.

²⁵Elam ampar ras kalak si mate i bas peperangen, janah kuburen serdaduna lit i sekelewetna. Kerina ia la isunatken, kerina mate i bas perang. Sanga nggeluh mbiar kalak kerina ibahanna, tapi genduari enggo ampar la lit ergana, janah ngenanami nasip si seri ras kerina kalak si mate i bas perang.

²⁶Mesek ras Tubal pe i je, rikut ras kuburen serdaduna i sekelewetna. Kerina ia la isunatken, kerina mate i bas peperangen. Tapi nai asum nggeluh denga, mbiar kalak kerina ibahanna.

²⁷Kalak enda la mehaga penguburenna bagi puanglima-puanglima si adi, si berkat ku doni kematen maba kerina senjatana; pedang itamaken i teruh takalna, janah ampang-ampangna i babo badanna. Tupung nggeluh denga, puanglima-puanglima enda erkuasa tuhu-tuhu seh maka mbiar kalak kerina ibahanna.

²⁸Bage me Mesir ikuburken ras iamparken i tengah-tengah kalak si la isunatken, si mate i bas perang.

²⁹Edom pe i je ras raja-raja bage pe peminpin-peminpin. Sanga nggeluh denga, kalak enda serdadu si mbisa, tapi genduari enggo ampar i babo doni kematen ras kalak si la isunatken, si mate i bas peperangen.

³⁰Kerina raja-raja i Utara nari, bage pe kalak Sidon lit i je. Nai kuasana mahan kalak mbiar, tapi genduari lanai erguna janah nusur ku doni kalak mate alu la isunat, ras kalak si mate i bas peperangen. I je bali nasipna ras kerina kalak si nusur ku doni kematen.

³¹Ngidah kerina kalak si mate i bas peperangen e terapul ukur raja Mesir ras serdaduna,” bage nina TUHAN si Erdolat.

³²“Mbarenda Kubahan ipebiar-biar raja Mesir kalak si nggeluh i doni, tapi ibunuh me ia ras serdaduna, jenari ikuburken i bas pengadi-ngadinna ras kerina kalak si la ersunat, si mate i bas peperangen,” Bagenda me nina TUHAN si Erdolat.