Read Batak Karo ESEKIEL 33 Bible Online

ESEKIEL 33 - Batak Karo bible

ESEKIEL 33

¹Kata TUHAN seh man bangku nina,

²“O manusia si ermasap-masap kataken man bangsandu maka enda me si jadi adi Kubahan perang i bas sada negeri. Rayat negeri milih sekalak jelma jadi si erjaga.

³Kenca idahna musuh reh, ibahanna tanda bahaya gelah kerina kalak metenget.

⁴Adi ibegi kalak sora ndai tapi la diatena pe, jenari reh musuh e ibunuhna ia, adi bage ia nge si salah kerna kematenna.

⁵Kematenna erkiteken kesalahenna jine, sabap la diatena persinget ndai. Adi iperdiatekenna, tentu pulah nge min ndai ia.

⁶Tapi adi penjaga ndai ngidah musuh reh, tapi la ibahanna tanda bahaya, kenca bage reh musuh e, jenari ibunuhna kalak perdosa e kerina, si erjaga e Kubahan ertanggung jawab kerna kematen kalak ndai.

⁷Dage, o manusia si ermasap-masap, Kuangkat kam jadi si erjaga i bas bangsa Israel. La banci lang isehkenndu man bana kata pertenget si Kubereken arah kam.

⁸Adi Kupebetehken man kalak jahat maka mate me ia, tapi la ipersingetindu ia gelah iperobahina lagu langkahna maka ia terkelin, jenari mate ia i bas dosana, kam arus ertanggung jawab kerna kematenna.

⁹Tapi adi ipersingetindu, janah la ingadikenna erbahan dosa, mate me ia i bas dosana, tapi kam terkelin.”

¹⁰Kata TUHAN seh man bangku nina, “O manusia si ermasap-masap, kataken mulihi man kalak Israel cakap si belaskenna, e me, ‘Mberat akap kami nahanken dosa ras kesalahen kami. Daging kami reh kertangna. Uga banci kami nggeluh?’

¹¹Kataken man bana maka asa tuhu Aku nggeluh, Aku TUHAN si Erdolat, la ukurKu meriah ngidah sekalak perdosa mate. Riahen ukurKu ngidahsa ia ngadi erbahan dosa gelah ia nggeluh. “O Israel, ngadikenlah kejahatenndu. Engkai maka nggiten kam mate?”

¹²Dage, o manusia si ermasap-masap, kataken man kalak Israel maka adi lit sekalak bujur erbahan dosa, si mehuli si enggo ibahanna labo banci engkelini ia. Adi kalak jahat ngadi erbahan si jahat, la ia iukum, tapi kalak bujur ibenakenna erbahan dosa, la banci ia pulah i bas ukumen nari.

¹³Banci jadi Aku enggo erpadan mereken kegeluhen man kalak bujur, tapi adi mulai ia rukur maka kiniulinna i bas paksa-paksa si enggo lepas enggo bias jenari ibenakenna erbahan dosa, la Kuinget sada pe kiniulinna si enggo lepas. La banci lang mate ia erkiteken dosa-dosana.

¹⁴Banci jadi enggo Kukataken man kalak jahat maka nandangi mate me ia, tapi adi ingadikenna erdosa, jenari ilakokenna kai si benar dingen bujur,

¹⁵umpama: iulihkenna barang jaminen kalak si ngeraih duit man bana, tah pe iulihkenna barang si itangkona, adi ingadikenna erbahan dosa jenari ikutkenna undang-undang si mereken kegeluhen, e maka la ia mate, tapi nggeluh.

¹⁶Kualemi dosa si ibahanna, janah nggeluh me ia sabap enggo benar dingen bujur perbahanenna.

¹⁷Tentu ikataken bangsandu maka perbahanenKu e la bujur! Lang, perbahanenna e nge si la bujur.

¹⁸Katawari kalak bujur ngadi erbahan si bujur, jenari ibenakenna erbahan jahat, mate ia erkiteken kejahatenna.

¹⁹Katawari kalak jahat ngadi erbahan dosa, jenari ibahanna kai si benar dingen bujur, enggo ikelinina kesahna.

²⁰Tapi ikataken kalak Israel maka kai si Kulakoken e la bujur. Kai gia nina, Kuukum nge ia rikutken perbahanenna.”

²¹I bas wari pelimaken, bulan si pesepuluhken, tahun si pesepuluh duaken, sanga kami i pembuangen, lit sekalak dilaki lompat i Jerusalem nari, jenari iturikenna man bangKu maka kuta e enggo talu. [60†]

²²Karabenna ope denga ia reh, enggo kugejapken kuasa TUHAN rembak ras aku. Kenca kalak ndai reh, lanai aku pekak, tapi enggo banci ngerana.

²³Kata TUHAN seh man bangku nina,

²⁴“O manusia si ermasap-masap; kalak si ringan i bas kuta-kuta Israel si enggo runtuh ngerana nina, ‘Abraham nai sekalak ngenca, tapi kerina taneh e ibereken man bana. Kita genduari enggo nterem, e maka taneh e kita empuna.’

²⁵Erkiteken si e turikenlah man bangsa e katangKu, Aku TUHAN si Erdolat, bagenda: Ipanndu daging si lit denga darehna. Isembahndu berhala; munuh kam. Kai sabapna maka iakapndu taneh e kam empuna?

²⁶Ernalem kam man pedangndu. Lagu langkahndu ciga ate. Kerina kam erlua-lua. Engkai maka pang kam ngatakenca maka taneh e kam empuna?

²⁷Asa tuhu Aku nggeluh, TUHAN si Erdolat, kerina kalak si ringan i daraten kuta ipan rubia-rubia kerangen. Kalak si cebuni i das deleng ras i bas gua-gua, mate ibahan penakit.

²⁸Kubahan negeri e jadi ingan si terulang, janah kuasa si iagahkenna masap me. Deleng-deleng Israel terulang seh maka la ise pe ngasup mentas arah e.

²⁹Kenca Kuukum bangsa e erkiteken dosa-dosana janah Kubahan negeri e terulang, jenari ietehna maka Aku kap TUHAN.”

³⁰Nina TUHAN, “O manusia si ermasap-masap, kam enggo jadi percakapen i tengah-tengah bangsandu, asum ia pulung deherken tembok-tembok kuta tah i bas kerabangen rumahna. Nina sapih-sapih ia, ‘Ota si dengkehken kai nina TUHAN sendah.’

³¹E maka pulung bangsangKu ndengkehken kata si man katakenndu, tapi la idalankenna kai si isuruhndu. I bas biberna nari luar kata kekelengen, tapi i bas pusuhna untungna saja ngenca iturikenna.

³²Kam bali akapna ras sekalak perkolong-kolong si mejile sorana rende, ngendeken ende-enden ate ngena, janah beluh ka pe ngkuit kulcapi. Ibegina kerina katandu, tapi sada kal pe la iikutkenna.

³³Tapi kenca jadi pagi kerina si ikatakenndu e, sabap ugapa pe jadi nge, kenca bage ietehna me maka pernah lit sekalak nabi i tengah-tengahna.”