Read Batak Karo ESEKIEL 34 Bible Online

ESEKIEL 34 - Batak Karo bible

ESEKIEL 34

¹Kata TUHAN seh man bangku nina,

²“O manusia si ermasap-masap, momokenlah kesalahan peminpin-peminpin Israel. Ernubuatlah kam man bana, janah pesehlah man bana katangKu, Aku TUHAN si Erdolat, bagenda: ‘Cilaka me kam, o permakan-permakan Israel! Dirindu saja ngenca ipekena-kenandu.

³Susuna inemndu, uisndu mbulu biri-biri, apai biri-biri si mburna igelehndu man panganndu. Tapi biri-biri e la pernah ipekena-kenandu.

⁴Biri-biri si la megegeh la iarak-arakndu, si sakit la itambarindu, janah si luka la ibalutindu, si papak la iembarindu, janah si bene la idaramindu. Tapi kejam kal perbahanenndu man biri-biri e.

⁵Erkiteken biri-biri e la lit permakanna, merap ia kerina, janah rubia-rubia si merawa njerngemsa manca. [61†]

⁶E maka biri-biringKu papak ku uruk-uruk si meganjang ras deleng-deleng. Merap ia kerina i belang-belang doni enda, janah la lit si ndaramisa tah pe si nulu-nulusa.

⁷Dage genduari, o permakan-permakan, dengkehken katangKu bandu, Aku TUHAN si Erdolat.

⁸Asa tuhu Aku nggeluh, perdiatekenlah katangKu enda. Biri-biringKu enggo ijerngem rubia-rubia si merawa janah ipanganina erkite-kiteken la lit permakanna. Permakan-permakanku la diatena pe ndarami biri-biri e. Dirina nge si ipekena-kenana, labo biri-biri e.

⁹Dage, dengkehkenlah aku, o permakan-permakan.

¹⁰Aku TUHAN si Erdolat ngatakenca maka Aku kap imbangndu. Kubuat biri-biringKu e i bas kam nari, janah asa ndigan pe lanai Kubere kam jadi permakanna; asa ndigan pe la nai Kubere kam pekena-kena dirindu saja. Kupulahi biri-biringKu i bas kam nari, janah la Kupelepas ia jadi panganndu.’ ”

¹¹Nina TUHAN si Erdolat, “Aku jine kap si ndarami biri-biringKu ras si ngasuhisa,

¹²bali ras sekalak permakan ndarami ras pepulung biri-birina si enggo merap, jenari ngasuhisa. I bas wari si gelap dingen cilaka e, biri-biringKu enggo merap; e maka genduari Kupepulung ia mulihi kerina.

¹³Kubaba ia ndarat i bas negeri si ndauh nari, jenari Kupepulung dingen Kubaba mulih ku negerina jine. Kutaruhken ia mulihken ku deleng-deleng ras lau Israel, janah Kupermakani ia i bas mbalmbal si meratah.

¹⁴Kubere ia nggagat alu teneng i bas dukut si mbur i deleng-deleng ras baluren-baluren ras i bas kerina mbalmbal si meratah si lit i taneh Israel.

¹⁵Aku jine kap si mpermakani biri-biringKu, janah Kubahan ingan pengadi-ngadinna. Enda me katangKu, Aku TUHAN si Erdolat.

¹⁶Kudarami biri-biri si bene, si papak Kutaruhken mulihi, si luka Kubaluti, janah si sakit Kutambari. Tapi si mbur dingen megegeh Kubunuh, sabap Aku kap permakan si ngelakoken si bujur.

¹⁷Dage genduari o biri-biringKu, begikenlah! Aku, TUHAN si Erdolat ngatakenca man bandu maka Kuadili me kam sada-sadai. Si mehuli Kusirangken i bas si jahat, bage pe biri-biri i bas kambing nari.

¹⁸Lit i bas kam si la akapndu puas terjeng nggagati dukut si mburna saja, tapi iperjakindu pe dukut si la terkerikenndu. Lau si meciho inemndu, tapi igemburindu pe lau si la inemndu.

¹⁹Erkiteken si e biri-biringKu si deban terpaksa nggagati dukut si enggo iperjakindu, janah minem lau si enggo igemburindu.

²⁰E maka Aku, TUHAN si Erdolat ngatakenca man bandu aku jine kap jadi hakim i tengah-tengah biri-biri si megegeh ras si la megegeh.

²¹Ijembakenndu biri-biri si sakit ku duru jenari iegasndu maka ndarat ia i bas rarasen e nari.

²²Tapi Kukelini kap biri-biringKu, janah lanai Kubere ia ipesega-sega. Kuadili biri-biringKu e sada-sadai, jenari Kupeserap si mehuli i bas si jahat nari.

²³Kubereken man bana sekalak raja si mpermakanisa bali ras Daud jadi permakanna, e maka ipekena-kenana me ia. [62†]

²⁴Aku, TUHAN jadi Dibatana, janah sekalak raja si bali ras suruh-suruhenKu Daud nai, jadi rajana. Enda me katangKu. [63†]

²⁵Kubahan sada perpadanen ras ia si jadi jaminen kerna keselamatenna. Kupelawes kerina rubia-rubia si merawa i bas taneh e nari, gelah biri-biringKu banci ringan alu teneng i bas mbalmbal, janah medem i bas kerangen.

²⁶Kupasu-pasu ia, janah Kubere ringan i sekelewet delengKu si badia. I je Kupasu-pasu alu udan katawari ia perlu.

²⁷Batang kayu erbuah, janah mereken ulihna, janah kerina kalak nggeluh alu teneng i bas tanehna. Kenca kuretapken rante si ngiket bangsangKu, janah Kupulahi i bas kalak si mperbudak ia nari, kenca bage ietehna me maka Aku kap TUHAN.

²⁸Bangsa-bangsa perbegu lanai ngerampasi ia, janah rubia-rubia si merawa lanai munuh ras manganisa. Nggeluh me ia alu teneng, janah la lit ise pe si pebiar-biar ia.

²⁹Kubereken man bana juma si mehumur janah lanai lit kelihen i bas negeri e. Bangsa-bangsa si deban lanai megombang man bana.

³⁰Iteh kalak me pagi kerina maka Kukawali kap Israel, janah bangsangKu kap ia. Enda me katangKu, Aku TUHAN si Erdolat.

³¹O kam biri-biringKu, rarasen si Kuasuhi; kam kap bangsangKu, janah Aku kap Dibatandu.” bage nina TUHAN si Erdolat.