Read Batak Karo ESEKIEL 35 Bible Online

ESEKIEL 35 - Batak Karo bible

ESEKIEL 35

¹Kata TUHAN seh man bangku nina, [64†]

²“O manusia si ermasap-masap, sumpahilah negeri Edom.

³Kempak rayatna kataken katangKu, Aku TUHAN si Erdolat, bagenda: Aku kap musuhndu, o deleng-deleng Edom! Kubahan me kam jadi taneh si terulang.

⁴Kubahan kuta-kutandu jadi runtuh-runtuhen, janah tanehndu jadi melungen. Kenca bage ietehndu maka Aku kap TUHAN.

⁵Nai nari imusuhindu kap lalap Israel, janah ipelepasndu ia ibunuhi tupung ia jumpa cilaka, i bas paksa ia ndatken ukumen si perpudina erkiteken dosa-dosana.

⁶Erkiteken si e, asa tuhu Aku nggeluh, Aku TUHAN si Erdolat, kematen me jadi sikerajangenndu, janah la banci kam pulah ije nari. Kam enggo ersalah munuh, e maka pemunuh lalap ngayak-ngayak kam.

⁷Kubahan taneh deleng-deleng Edom terulang, janah kasa kalak si mentas arah e Kubunuh.

⁸Deleng-deleng Kutamburi alu mait, janah mait kalak si mate i bas peperangen namburi deleng-deleng ras baluren-baluren.

⁹Kubahan maka rasa lalap kam jadi taneh si melungen janah asa ndigan pe lanai lit kalak ringan i bas kuta-kutandu. Kenca bage itehndu me maka Aku kap TUHAN.

¹⁰Juda ras Israel rikut ras tanehna, ikatakenndu kam empuna, janah nindu ibuatndu e man bandu, aminna gia Aku, TUHAN kap Dibatana.

¹¹Erkiteken si e, asa tuhu Aku nggeluh, Aku TUHAN si Erdolat, Kubalas me man bandu pernembeh atendu, cian atendu, bage pe elem-elem atendu nandangi bangsangKu. Ieteh bangsangKu maka kam Kuukum erkiteken perbahanenndu man bana.

¹²E maka ietehndu me maka Aku, TUHAN, enggo megi kata-kata megombang si ibelaskenndu nindu, “Deleng-deleng Israel enggo melungen, janah enggo ibereken jadi sikerajangenta.”

¹³O Edom, enggo Kubegi rananndu si la erluhu, cakapndu si meganjang ngelawan Aku.”

¹⁴Nina TUHAN si Erdolat, “Kerina doni ermeriah ukur, erkiteken negerindu Kubahan jadi taneh terulang,

¹⁵bali ras sanga kam ermeriah ukur ngidah Israel, ertangKu si meherga e ikernepken. Deleng-deleng Seir, kerina taneh Edom pe jadi terulang me. Kenca bage kerina kalak meteh maka Aku kap TUHAN.”