Read Batak Karo ESEKIEL 36 Bible Online

ESEKIEL 36 - Batak Karo bible

ESEKIEL 36

¹Nina TUHAN, “O manusia si ermasap-masap, ngeranalah kam ku deleng-deleng Israel janah suruhlah ia megiken katangKu,

²Aku TUHAN si Erdolat. Enda me katangKu: Nina musuh-musuh Israel, ‘Genduari deleng-deleng si nuria enggo ajangta!’

³Erkiteken si e, ernubuatlah kam, momoken kai si Kukataken, Aku TUHAN si Erdolat. Tupung bangsa-bangsa i sekelewetna naluken dingen ngerampasi deleng-deleng Israel, kerina ia nggombangi Israel.

⁴Dage genduari begikenlah o deleng-deleng ras uruk-uruk, o kam lau maler ras baluren, bage pe kam o kuta-kuta si irampasi ras iuru-uru bangsa-bangsa si lit i sekelewetndu.

⁵I bas pernembeh ateKu si gara, Aku TUHAN si Erdolat, enggo ngerana man negeri-negeri sekelewetndu, terlebih-lebih man Edom. Alu ukur puas rikut ras gombangna irebutna tanehKu janah iperajangna mbalmbalna.

⁶E maka ernubuatlah kam man taneh Israel; kataken man deleng-deleng, uruk-uruk, lau maler, ras man baluren-baluren, kerna cimberu ateKu, Aku TUHAN si Erdolat si dem alu ate nembeh erkiteken penggombangi ras penguru-nguru bangsa-bangsa e man bana.

⁷Ersumpah Aku, TUHAN si Erdolat, maka bangsa-bangsa si lit i sekelewet Israel la banci lang mela akapna Kubahan.

⁸Tapi i das deleng-deleng Israel, batang-batang kayu la banci lang erbulung ka mulihi jenari erbuah man guna bangsangKu Israel. Pedas me kam mulih ku kutandu.

⁹Aku kap ras kam, janah Aku netapkenca maka tanehndu e la banci lang iperjumai ras ierdangi ka mulihi.

¹⁰Bangsandu ertambah-tambah Kubahan. Kam ringan i bas kuta-kuta, janah kasa kai siruntuh nai ipajekkenndu mulihi.

¹¹Subuk manusia bage pe rubia-rubiandu reh buena tetap Kubahan. Nai nari langa pernah bage pagi teremndu, sabap nterem pagi anakndu. Kubere kam nggeluh i bas negerindu bagi semalna kam nggeluh, janah ndauh akapndu senangen asangken si nggo-nggona. Kenca bage ietehndu me maka Aku kap TUHAN.

¹²O bangsangKu Israel, Kubaba kam mulihken gelah ringan ibas taneh e. Taneh e jadi tanehndu jine, janah asa ndigan pe anak-anakndu lanai kelihen ibahan tanehndu e .”

¹³Aku, TUHAN si Erdolat ngatakenca, “Tuhu taneh e igelari kalak taneh pengatah manusia dingen pengerampok anak-anak bangsa si ngianisa.

¹⁴Tapi mulai genduari nari taneh e lanai pengatah manusia, janah lanai irampokna anak-anakndu.

¹⁵Lanai perlu taneh e megiken penggombangi ras penguru-nguru kalak. Taneh e lanai ngerampok anak-anak bangsa e.” Bagenda me nina TUHAN si Erdolat.

¹⁶Kata TUHAN seh man bangku nina,

¹⁷“O manusia si ermasap-masap; mbarenda, tupung kalak Israel ringan i bas tanehna, taneh e iliami alu lagu langkah ras perbahanenna. Lagu langkahna e bali Kuakap melketna ras diberu si sangana nguda bulanna.

¹⁸Taneh e iliami erkiteken ia munuh dingen nembah man berhala i je. E maka Kucurcurken pernembeh ateKu si gara man bana.

¹⁹Kuukum ia erkiteken lagu langkah ras perbahanenna; Kukerapken ia ku belang-belang negeri si ndauh.

²⁰Ku ja ia lawes, i je gelarKu si badia igombangi kalak, sabap ikataken kalak, ‘Bangsa enda terpaksa nadingken negeri si ibereken Dibatana man bana.’

²¹Si e erbahanca ceda ateKu, sabap ku ja saja pe kalak e lawes meling ibahanna gelarKu.

²²Dage genduari pesehlah katangKu enda, Aku TUHAN si Erdolat, kempak kalak Israel: Kai si nandangi Kulakoken labo erkiteken kam kalak Israel, tapi guna gelarKu si Badia, si enggo ibahanndu meling i bas tep-tep negeri si idahindu.

²³Kenca Kucidahken kebadian gelarKu si mbelin, gelar si enggo icemarkenndu i tengah bangsa-bangsa, kenca bage ieteh bangsa-bangsa e maka Aku kap TUHAN, si Erdolat enggo melasken rananKu. Kupake me kam lako encidahken man bangsa-bangsa maka badia kap Aku.

²⁴Kubuat kam i bas kerina bangsa ras negeri nari, Kubaba mulih ku tanehndu jine.

²⁵Kupirpirken man bandu lau meciho janah Kubersihken kam i bas berhala-berhala ras kerina perkara-perkara si debanna si enggo ngeliami kam.

²⁶Kubereken man bandu pusuh si mbaru ras perukuren si mbaru. Kuagui pusuhndu si batu-batun, jenari Kubereken man bandu pusuh si lembut si nggit patuh. [65†]

²⁷KesahKu Kutamaken i bas pusuhndu, janah tetap Kuperdiateken maka ikutkenndu undang-undangKu, janah patuh man perentah si Kubereken man bandu.

²⁸Kenca bage ringan me kam i bas taneh si Kubereken man nini-ninindu. Kam jadi bangsangKu, janah Aku jadi Dibatandu.

²⁹Kukelini kam gelah olanai lit kai pe si ngeliami kam. Kuperentahken man gandum gelah mbuah ia, gelah olanai kam kelihen.

³⁰Kutambahi buah batang kayundu bage pe ulih jumandu, gelah olanai lit kelihen si erbahanca mela akapndu i tengah bangsa-bangsa.

³¹Teringet me kam nandangi lagu langkahndu si jahat dingen kesalahen si ilakokenndu, e maka ciga atendu ngenehen dirindu jine erkiteken dosa-dosa ras perbahanenndu si nggesuh.

³²O Israel, perlu kuakap ietehndu maka kerina si e Kulakoken labo erkiteken kam. AteKu gelah igejapndu uga melana ras uga medunguna Aku erkiteken kai si ilakokenndu. Aku, TUHAN si Erdolat, enggo melasken katangKu.”

³³ TUHAN si Erdolat ngatakenca nina, “Kenca Kubersihken kam i bas dosa-dosandu nari, Kubere ka kam ringan mulihi i bas kuta-kutandu janah Kupelepas ipajekkenndu mulihi si enggo runtuh e.

³⁴Kerina kalak si biasa mentas arah jumandu ngidahsa uga perenna ras rambahenna juma e, tapi Kubere iperjumaindu ka mulihi kerina.

³⁵Mamang pagi ate kalak kerina ngidah negeri si pernah jadi taneh si mesawang e, sabap enggo salih bagi Peken Eden, janah kuta-kuta si nai irontasken, irampasi, si enggo radas, genduari enggo iiani ras ibahan tembokna.

³⁶Kenca bage negeri-negeri si pedeher, si lit denga tading, ietehna me maka Aku TUHAN, Aku kap si majekkenca mulihi kuta-kuta si enggo runtuh dingen nuani juma-juma si enggo terulang. Aku, TUHAN enggo melasken katangKu, janah la banci lang Kusehken katangKu e.”

³⁷ TUHAN si Erdolat ngatakenca nina, “Kalak Israel Kubere ka mulihi mindo penampat man bangKu, janah Kubere ia ertambah-tambah teremna desken sada rarasen biri-biri.

³⁸Kuta-kuta si genduari runtuh dem pagi i je jelma, bali ras Jerusalem si nai dem alu biri-biri si nandangi ipersembahken i bas paksa wari raya. Kenca bage ieteh Israel me maka Aku kap TUHAN.”