Read Batak Karo ESEKIEL 37 Bible Online

ESEKIEL 37 - Batak Karo bible

ESEKIEL 37

¹Kugejap kuasa TUHAN, janah KesahNa maba aku nusur ku sada baluren. Baluren ndai dem alu tulan-tulan.

²Ibabai TUHAN aku niar-niar i baluren e, janah i je kuidah seh kal buena tulan-tulan, janah tulan-tulan ndai kerah kal.

³Nina TUHAN man bangku, “O manusia si ermasap-masap, banci kin tulan-tulan enda nggeluh mulihi?” Ngaloi aku, “O TUHAN si Erdolat, Kam ngenca metehsa.”

⁴Nina TUHAN, “Ngerana kam kempak tulan-tulan e. Kataken man tulan-tulan si enggo kerah e gelah ibegikenna katangKu.

⁵Turiken man bana katangKu enda, Aku, TUHAN si Erdolat, bagenda: Kuembusken KesahKu ku bas kam maka kam nggeluh mulihi.

⁶Kutamaken uratndu ras dagingndu jenari Kubahan kulingndu. Kutamaken kesah i bas kam, e maka nggeluh kam mulihi. Kenca bage ietehndu me maka Aku kap TUHAN.”

⁷E maka ernubuat aku sue ras si iperentahken TUHAN. Tupung aku sanga ngerana denga, kubegi sora erderak-derak, janah tulan-tulan ndai mulai ersada.

⁸Sanga kuperdiateken, tulan-tulan ndai itutupi urat ras daging, jenari kuling. Tapi kula ndai la sada pe erkesah.

⁹Kenca bage nina Dibata man bangku, “O manusia si ermasap-masap, ngeranalah kam kempak angin. Kataken man angin maka Aku, TUHAN si Erdolat merentahken ia gelah reh i japa nari pe guna ngembusken kesah kempak kula si mate enda kerina, maka nggeluh ka ia mulihi.”

¹⁰E maka ernubuat aku sue ras si iperentahken TUHAN man bangku. Bengket me kesah ku kula ndai, e maka nggeluh dingen tedis ia kerina, janah perban teremna, bias jadi sada bala serdadu si mbelin. [66†]

¹¹Nina Dibata bangku, “O manusia si ermasap-masap, bangsa Israel bali kap ras tulan-tulan ndai. Ikatakenna maka ia enggo kerah, pengarapenna enggo bene, enggo peltep.

¹²Dage ernubuatlah man bangsangKu, Aku TUHAN si Erdolat; Kutalangi me kuburenna, Kupedarat ia, jenari Kubaba mulih ku taneh Israel.

¹³Kenca Kutalangi kuburen ingan bangsangKu ikuburken, janah Kupedarat ia i jenari, ietehna me maka Aku kap TUHAN.

¹⁴Kutamaken kesahKu i bas ia, maka nggeluh ia mulihi, jenari Kubere ia ringan i bas negerina jine. Kenca bage ietehna me maka Aku kap TUHAN. Aku, TUHAN enggo melasken katangKu, janah la banci lang Kusehken bagi si Kukataken e.”

¹⁵Kata TUHAN seh ka man bangku nina,

¹⁶“O manusia si ermasap-masap, buatlah sada ciken kayu, suratken i je kata-kata enda: “Kerajan Juda”. Kenca bage buat ka ciken si deban, jenari suratken i je kata-kata: “Kerajan Israel”.

¹⁷Kenca bage cikep duana ciken ndai, persada ujung-ujungna seh maka tempa-tempa ia sada ciken.

¹⁸Adi isungkun bangsandu kam kai ertina si e,

¹⁹kataken man bana, Aku, TUHAN si Erdolat, nandangi muat ciken si nggambarken Israel, jenari Kupersada ras ciken si nggambarken Juda. I bas ciken si dua e nari Kubahan sada ciken janah Kucikep i bas tanKu.

²⁰Cikeplah duana ciken e maka idah bangsandu.

²¹Kenca bage kataken man bana maka Aku, TUHAN si Erdolat, nandangi muat kerina bangsangKu i bas negeri-negeri e nari, ku ja ia enggo lawes. Kupepulung ia, e maka Kubaba ia mulihi ku tanehna jine.

²²Kubahan ia jadi sada bangsa i bas taneh e, i deleng-deleng Israel. Sada ngenca pagi rajana kerina, janah lanai ia terbagi i bas dua bangsa, tah pe terpecah i bas dua kerajan.

²³Lanai iliamina bana alu erbahan dosa dingen nembah man berhala-berhala ras gana-gana si nggesuh. Kupulahi ia kerina i bas perbahanen-perbahanen dosa si mabai ia nilah i bas Aku nari. Kubersihken ia kerina; ia jadi bangsangKu, janah Aku jadi Dibatana.

²⁴Alu tutus iikutkenna Undang-undangKu. Ersada pagi ia i teruh pemerentahen sekalak raja, sekalak raja si bali ras suruh-suruhenKu Daud nai. [67†]

²⁵I bas taneh si Kubereken man suruh-suruhenKu Jakup, taneh si iiani nini-ninina nai, i je me pagi bangsangKu tading seh rasa lalap, terus ku anak-anakna bage pe kerina kesusurenna. Raja si bali ras suruh-suruhenKu Daud e, merentah ia pagi seh rasa lalap.

²⁶Kubahan sada perpadanen ras ia gelah jadi sada jaminen kerna keamanenna seh rasa lalap. Kupasu-pasu ia, janah Kubahan maka ertambah-tambah teremna. Rumah PertotonKu Kutamaken i bas tanehna, janah i je me pajek seh rasa lalap.

²⁷I je me Aku ringan ras ia; Aku jadi Dibatana, ia jadi bangsangKu. [68†]

²⁸Kenca Kutamaken Rumah PertotonKu e i tengah-tengahna alu nteguh seh rasa lalap, kenca bage kerina bangsa-bangsa meteh maka Aku, TUHAN, enggo milih Israel jadi bangsangKu.”