Read Batak Karo ESEKIEL 38 Bible Online

ESEKIEL 38 - Batak Karo bible

ESEKIEL 38

¹Kata TUHAN seh man bangku nina,

²“O manusia si ermasap-masap, sumpahilah Gog, raja si mbelin i negeri Mesek ras Tubal i taneh Magog. [69†]

³Kataken man bana maka Aku, TUHAN si Erdolat, Aku kap musuhna.

⁴Kukusurken me ia, Kukawit isangna, jenari Kurintak ia lawes ras kerina tenterana. Lanai kal langlang teremna tentera kudana si erpaken seragam, janah kerina tenterana e maba ampang-ampang dingen erpedang.

⁵Si jadi teman raja e me kalak Persia, Sudan ras Libia, janah kerina ia make ampang-ampang ras topi waja.

⁶Kerina dilaki si ngasup erperang i negeri Gomer ras Bet Togarma nari i utara, kerina teman raja, bage pe mbue bangsa-bangsa si debanna.

⁷Suruhlah ia ersikap-sikap, janah perentahken kerina tenterana maka sikap ndalanken perentahna.

⁸Piga-piga tahun nari Kuperentahken me ia nerang sada negeri si pendudukna enggo ibaba mulih i bas piga-piga negeri nari, janah enggo ringan i bas negeri e alu la lit kebiarenna. Iserang Gog me deleng-deleng Israel, si enggo terulang bage dekahna, tapi genduari sangana iiani rayat si nggeluh alu teneng.

⁹Ia ras tenterana rikut ras nterem bangsa si jadi temanna lawes me nerang negeri e desken angin kaba-kaba rikut ras udan, e maka itamburina me negeri e bagi embun.”

¹⁰Enda me si ikataken TUHAN si Erdolat kempak Gog, “Adi enggo seh paksana, mulai me kam rukur kerna sura-sura si jahat.

¹¹Itetapkenndu me nerang sada negeri si la ergegeh i ja pendudukna nggeluh alu dame ras teneng i bas kuta si la ertembok, si la lit pertahanenna.

¹²Irampok ras irampasindu me penduduk si ringan i bas kuta-kuta si nai pernah runtuh. Pendudukna si nai ipepulung i bas erbage-bage negeri nari genduari enggo melala ertana ras asuh-asuhenna, janah ia ringan i bas pusat doni enda.

¹³Kalak Syeba ras Dedan bage pe saudagar-saudagar i bas kuta-kuta Sepanyol nari isungkunna kam nina, ‘Atendu kin ngerampas ras ngerampok emas, pirak, asuh-asuhen, ras erta-erta si debanna, dingen ngangkatsa kerina, maka ipepulungndu tenterandu?’ ”

¹⁴Dage TUHAN si Erdolat nuruh aku, gelah kupeseh man Gog kata enda, “Tupung bangsangKu Israel sangana nggeluh alu teneng, tupung si e me kam lawes nerangsa.

¹⁵Kam berkat i bas inganndu nari, ndauh i utara, minpin tentera si nterem dingen megegeh, kerina tentera si erkuda i bas erbage-bage bangsa nari.

¹⁶E maka iserangndu me bangsangKu Israel, desken angin kaba-kaba nderpa taneh. Kenca enggo seh paksana, Kusuruh kam nerang tanehKu lako encidahken man bangsa-bangsa ise kin Aku si tuhuna, encidahken kebadianKu alu perkara si Kulakoken arah kam.

¹⁷Ma kerna kam kin si Kukataken nai arah suruh-suruhenKu nabi-nabi Israel? Nabi-nabi e enggo ernubuat nai maka i bas paksa si reh Kusuruh me sekalak si nerang Israel.” Bagenda me nina TUHAN si Erdolat.

¹⁸Nina TUHAN si Erdolat, “Tapi i bas warina Gog nerang Israel, ngamuk me Aku.

¹⁹I bas pernembeh ateKu si gara, Kukataken maka i bas wari e lit me linur si mehantu i Israel.

²⁰Kerina nurung ras perik-perik, kerina rubia-rubia si kitik bage pe si galang, kerina manusia i babo doni enda, nggirgir perban biarna ngenehen Aku. Deleng-deleng runtuh, lingling meruhruh, janah kasa kai tembok mbulak kerina.

²¹Alu erbage-bage cilaka Kubahan maka Gog jadi gentar. Aku, TUHAN si Erdolat enggo melasken katangKu. Anak buahna sitakilen sapih-sapih ia alu pedangna.

²²Kuukum ia alu penakit ras dareh mambur. Udan si meder ras baho, rikut ras api ras kertah, icurcurken i das nari kempak ia ras tenterana bage pe kempak bangsa-bangsa si nterem si jadi temanna.

²³Alu dalan si enda ateKu encidahkenca man bangsa-bangsa maka Aku si erkuasa ras si badia. Kenca bage ieteh bangsa-bangsa maka Aku kap TUHAN.”