Read Batak Karo ESEKIEL 4 Bible Online

ESEKIEL 4 - Batak Karo bible

ESEKIEL 4

¹Nina Dibata, “O manusia si ermasap-masap, buat batu bata, tamaken arah lebendu, jenari garislah batu e lako nggambarken kuta Jerusalem.

²Kenca bage, lako nggambarken pengepungen nandangi kuta e, bahanlah parik-parik taneh si ergun-gun, perkemahen-perkemahen, ras perkakas ngeruntuhken tembok i sekelewet batu bata e.

³Buatlah sada panci besi, jenari pajekken e desken tembok kelang-kelang kam ras kuta e. Alakenlah kuta e. Kuta e sangana ikepung, janah kam si ngepungsa. Enda me jadi sada tanda man bangsa Israel.

⁴ [4-5] Kenca bage, medemlah alu nindihi tan si kawes, maka Kutamaken man bandu kesalahen negeri Israel. Kam arus tading i je telu ratus siwah puluh wari dekahna janah ngenanami kiniseran erkiteken kesalahenna. Sada wari kam medem i je ndalani ukumen nggambarken sada tahun ukumen si Kusehken man Israel.

⁶Kenca enggo dung idalanindu si e, erkusur kam nindihi tan si kemuhen, janah Kam ngenanami kiniseran erkiteken kesalahen Juda, empat puluh wari dekahna sada wari nggambarken ukumen sada tahun.

⁷Pernehenlah kempak pengepungen kuta Jerusalem. Awatken tinju-tinjundu kempak kuta e, jenari ernubuatlah.

⁸Kuiket kam seh maka la banci erkusur ku kawes tah ku kemuhen seh enggo dung pengepungen e.

⁹Genduari buatlah gandum, sorgum, kacang, kacang megara, dawa, dawa cur. Campurken kerina, jenari bahan jadi roti. Em bahan man nakanndu kidekah kam medem nindihi tan si kawes telu ratus siwah puluh wari dekahna.

¹⁰Nakan si banci ipanndu setengah gantang ngenca sada wari, janah sekali ngenca kam man sada wari.

¹¹Lau si man inemenndu tep-tep wari pe ersibar; dua cangkir ngenca sada wari.

¹²Pegaralah api, rantingna kotor manusia si enggo kerah, janah i bas api e kam manggang roti. Jenari panlah roti e i lebe-lebe jelma si nterem.”

¹³Nina TUHAN, “Bage me pagi kalak Israel man pangan si ipantangken rikutken Undang-undang, tupung Kukerapken ia ku negeri-negeri si deban.”

¹⁴Tapi erjabap aku, “Lang, o TUHAN si Erdolat! La pernah kuliami diringku. Mulai kin kitik-kitikku nari la pernah kupan daging bangke asuh-asuhen tah pe si ijerngem rubia-rubia si merawa. La pernah kupan si pantang rikutken Undang-undang.”

¹⁵E maka nina Dibata, “Mehuli. Adi bage banci ibahanndu kotoren lembu jadi rantingna, janah i je me ipanggangndu rotindu e.”

¹⁶Tole nina Dibata, “O manusia si ermasap-masap, Kubeneken ateKu kerina persedian pangan i Jerusalem. Suhsah dingen bene pagi ukur kalak si ringan i je erkiteken terpaksa itimbang panganna janah isukati inemenna.

¹⁷Bene pagi ukurna perban keri pangan ras inemenna, janah kedungenna mate ia erkiteken dosa-dosana.”