Read Batak Karo ESEKIEL 42 Bible Online

ESEKIEL 42 - Batak Karo bible

ESEKIEL 42

¹Kenca bage ibabai dilaki ndai aku ku kesain si arah darat, jenari iteguna aku ku gedung si deban arah Utara Rumah Pertoton e, la ndauh i bas gedung si galang si lit jahen Rumah Pertoton.

²[2-3] Sada dampar gedung enda ndai ngala kempak beranda si belangna sepuluh meter e, janah dampar si deban ngala kempak lante batu si lit i kesain si arah darat. Gedung e ertingkat telu; tep-tep tingkat njurnjur ku lebe dauhen asa tingkat si arah datasna.

⁴I lebe kamar-kamar e, arah bas, lit lorong si belangna lima meter, gedangna lima puluh meter. Pintunna kerina ngala ku Utara.

⁵Kamar-kamar i tingkat si arah datas kitiken asa kamar-kamar si lit i tingkat si arah teruhna, sabap lorong-lorong i lebe-lebe kamar-kamar si arah datas ndai belangen asangken si lit iteruhna.

⁶Kamar-kamar ndai ertingkat telu janah la lit binangunna bagi gedung-gedung si lit deher kesain e.

⁷[7-8] Sada bagin i tingkat si arah teruh, si gedangna dua puluh lima meter jadi tembok saja ngenca, si lebihna, gedangna dua puluh lima meter lit kamar-kamarna. I tingkat si arah datasna kal lit kamar-kamarna gedang-gedang gedung e.

⁹[9-10] I teruh kamar-kamar, i ujung si arah kenjulu gedung e, e me bena tembok, lit sada pintun ku kesain si arah darat. Arah dampar Selatan Rumah Pertoton e lit gedung si bali tempasna, inganna la ndauh i bas gedung si arah kenjahe ndai.

¹¹I lebe-lebe kamar-kamarna lit sada lorong bali ras lorong-lorong gedung si arah Utara. Sibar-sibarna, tempasna, pintunna, kerina seri.

¹²I teruh kamar-kamar si lit i bas dampar Selatan, i bas bena tembok si arah kenjulu, lit sada pintun.

¹³Nina dilaki ndai man bangku, “Gedung enda duana, badia kap. I bas gedung e me imam-imam si banci ngadap ku adep-adepen TUHAN, man persembahen si badiana kal. Erkiteken kamar-kamarna pe badia, imam-imam namaken persembahen si badiana kal i je. Persembahen e, e me: persembahen buah gandum ras persembahen pengalemi dosa tah pe persembahen ganti rugi.

¹⁴Kenca imam-imam dung ndahiken dahinna i bas Rumah Pertoton, janah adi lawes atena ku kesain si arah darat, maka paken imam si ipakena arus itadingkenna i bas kamar-kamar e. Imam-imam e arus make paken si deban maka banci ia lawes ku ingan pulung jelma si nterem.”

¹⁵Kenca enggo dung isibarina bagin bagin si arah bas Rumah Pertoton e, ibabana aku ndarat arah kerabangen si arah kenjulu; kenca bage isibarina bagin sekelewet Rumah Pertoton e.

¹⁶Ibuatna galah penibar, jenari isibarina bagin si arah kenjulu, gedangna lit 250 meter.

¹⁷[17-19] Kenca bage isibarina ka bagin si arah Utara, Selatan ras si arah kenjahe; gedangna kerina seri, e me 250 meter.

²⁰Dage pertapaken Rumah Pertoton e empat segi tempasna, janah ikeleweti tembok si seri gedangna ras belangna, e me 250 meter. Tembok e lakonna e me mpeserap apai si badia, apai lang.