Read Batak Karo ESEKIEL 45 Bible Online

ESEKIEL 45 - Batak Karo bible

ESEKIEL 45

¹Tupung taneh negeri e ibagi-bagiken man suku-suku jadi pusakana, lebe arus iserapken sada bagin man TUHAN, Taneh e gedangna sepuluh dua setengah kilometer, belangna sepuluh kilometer. Taneh si e badia kerina.

²I je me ibahan taneh pertapaken Rumah Pertoton; gedangna ras belangna 250 meter. Pertapaken e arus ikeleweti taneh kosong, belangna 25 meter;

³setengah i bas taneh ndai si belangna lima ras sepuluh dua setengah kilometer arus isikapken man ingan Rumah Pertoton, janah e me ingan si badiana kal.

⁴Si e me bagin si badia i bas negeri e si iserapken man imam-imam si erdahin guna TUHAN i bas Rumah PertotonNa. I je me ipajekken rumah imam-imam e ras pertapaken guna Rumah Pertoton.

⁵Setengahna nari ka iserapken jadi sikerajangen kalak Lewi, si ndahiken dahin-dahin kelatihen i bas Rumah Pertoton. I je me ibahan kuta kalak Lewi e.

⁶Deherken taneh si badia ndai, arus ka isikapken sada taneh si deban gedangna sepuluh dua setengah kilometer, belangna dua setengah kilometer, jadi sada kuta. I bas kuta e banci ringan ise pe i bas bangsa Israel.

⁷Man raja si sangana erkuasa pe arus isikapken taneh. Taneh e mulai i bas baleng si arah kenjahe taneh si badia terus ku Lawit Tengah i bas baleng si arah kenjulu nari terus ku perbalengen negeri si arah kenjulu, seh maka taneh si man raja e bali gedangna ras taneh si ibagiken man sada suku Israel.

⁸Si e me jadi sikerajangen raja si sangana erkuasa i negeri Israel, gelah olanai itindasna rayat, tapi iberekenna bagin-bagin si deban i bas negeri e man suku-suku Israel.

⁹Nina TUHAN si Erdolat, “Enggo bias, o penguasa-penguasa Israel. Olanai isega-sega ras itindasndu bangsangKu. Dalankenlah kai si mehuli ras bujur. Ndigan pe olanai ipelawesndu bangsangKu i bas tanehna nari. Aku, TUHAN si Erdolat, Aku kap merentahken si enda man bandu.

¹⁰Pakelah timbangen ras sukat-sukat si bujur; [87†]

¹¹Sada epa sukat-sukat gandum arus bali isina ras sada bat sukat-sukat minak saitun. Patoken sukat-sukatna e me homer (+) alu bage sukat-sukat ndai bagenda jadina: 1 homer = 10 epa = 10 bat

¹²Timbangenndu arus bagenda: 1 sikal = 20 gera 1 mina = 60 sikal

¹³ [13-15] Enda me patokan si ipake i bas erbahan persembahen: gandum = 1/60 i bas ulih peraninndu nari dawa = 1/60 i bas ulih peraninndu nari minak saitun = 1/100 i bas buah saitunndu nari (Sukatilah e alu bat = 10 bat = 1 homer = 1 kor.) biri-biri: 1 i bas 200 biri-biri nari. Kam arus mpersembahken buah gandum, asuh-asuhen man persembahen tutungen ras persembahen persadan, gelah dosa-dosandu ialemi. Aku, TUHAN si Erdolat, Aku kap si merentahken si enda.

¹⁶Kerina rayat negeri e arus ngembahken persembahen e man raja si sangana erkuasa i Israel.

¹⁷Tugasna me nikapken asuh-asuhen man persembahen tutungen, persembahen buah gandum, ras persembahen lau anggur man kerina negeri Israel tupung wari Raya Bulan si mbaru, wari-wari Sabat, ras wari-wari raya si deban. Persembahen pengalemi dosa, persembahen buah gandum, persembahen tutungen, persembahen persadan e arus isikapken raja lako nangtangi dosa Israel.”

¹⁸Nina TUHAN si Erdolat, “I bas wari si pemena, bulan si pemena arus ipersembahkenndu sada jenggi lembu si la lit sitik pe man pandangen lako pebadiaken Rumah Pertoton e.

¹⁹Dareh persembahen pengalemi dosa arus ibuat imam sitik, jenari itamakenlah ku binangun pintun Rumah Pertoton, i bas empatna suki batar-batar, ras i bas binangun-binangun kerabangen ku kesain si arah bas.

²⁰I bas wari si pepituken pe arus ka bage perbandu, guna kerina kalak si erdosa alu la sengaja, tah pe erkiteken kebodohenna. Alu bage tetap badia Rumah Pertoton e ibahanndu.

²¹I bas wari sepuluh empat, bulan si pemena, benakenlah ngerayaken Wari Raya Paskah. Pitu wari dekahna kerina arus man roti si la itama ragi. [88†]

²²I bas wari si pemena tupung perayan e, raja si sangana erkuasa arus mpersembahken sada jenggi lembu jadi persembahen kerna dosa-dosana ras dosa kerina rayatna.

²³Kidekah perayan si pitu wari e, tep-tep wari arus ipersembahkenna man TUHAN pitu jenggi lembu ras pitu bajar biri-biri si nguda denga si la lit man pandangen, janah kerina arus itutung. Tep-tep wari arus ka pe ipersembahkenna sada bajar kambing jadi persembahen pengalemi dosa.

²⁴Tambah si e, arus ka pe ipersembahkenna gandum 17,5 liter, guna tep-tep jenggi lembu, bage pe man tep-tep bajar biri-biri si nguda denga, rikut ras telu liter minak saitun.

²⁵Guna Wari Raya Sapo-sapo, si ibenaken i bas wari sepuluh lima, bulan si pepituken, dekahna pitu wari, arus ka pe ipersembahken raja persembahen si seri buena, e me persembahen pengalemi dosa, persembahen tutungen, ras persembahen buah gandum ras minak saitun.” [89†]