Read Batak Karo ESEKIEL 46 Bible Online

ESEKIEL 46 - Batak Karo bible

ESEKIEL 46

¹Nina TUHAN si Erdolat, “Kerabangen si arah Timur, dalan bengket ku kesain si arah bas arus tetap itutup enem wari erdahin, tapi arus italangi tupung wari Sabat ras wari Raya Bulan si Mbaru.

²Raja si erkuasa arus bengket i kesain si arah darat nari ku ruang si mbelin i bas kerabangen e jenari tedis deherken binangun kerabangen e. Sanga raja i je, imam-imam nutung persembahen tutungen, dingen mereken persembahen persadan si ibereken raja. I bas kerabangen e me raja arus erjimpuh nembah man TUHAN, jenari mulihken ia ndarat. Kerabangen e la banci ipintu ngayak ben.

³Tep-tep wari Sabat ras tep-tep Wari Raya Bulan si Mbaru bangsa e pe kerina arus erjimpuh nembah man TUHAN i lebe-lebe kerabangen e.

⁴I bas wari Sabat raja arus mpersembahken man TUHAN enem anak biri-biri ras sada bajar biri-biri si la lit sitik pe man pandangen, jadi persembahen tutungen.

⁵Rikut ras sada bajar biri-biri arus ka pe ipersembahkenna sepuluh pitu setengah liter gandum, janah radu ras sada anak biri-biri arus ka pe ipersembahkenna rikutken ukurna meriah. Raduken tep-tep erbage persembahen buah gandum arus pe ipersembahkenna telu liter minak saitun.

⁶Tupung Wari Raya Bulan Mbaru arus ipersembahken sada jenggi lembu, enem anak biri-biri, ras sada bajar biri-biri, sitik pe la lit man pandangen.

⁷Rikut ras tep-tep jenggi lembu ras tiap bajar biri-biri arus pe ipersembahken sepuluh pitu setengah liter gandum, janah sada anak biri-biri banci ipersembahken raja radu ras kai sura-sura pusuhna. Tep-tep persembahen buah gandum arus ipersembahken rikut ras telu liter minak saitun.

⁸Tupung raja bengket ku Rumah Pertoton, arus ia bengket arah rumah mbelin janah mulihna pe arah e ka.

⁹Tapi adi jelma si nterem bengket ku kesain Rumah Pertoton lako ngerayaken wari-wari raya si apai gia, maka kalak si bengket arah kerabangen Utara, arus ndarat arah kerabangen Selatan kenca dung ersembah. Janah kalak si bengket arah kerabangen Selatan arus ndarat arah kerabangen Utara. La banci ise pe ndarat arah dalanna bengket ndube, tapi arus arah kerabangen si petala-tala ras si e.

¹⁰Raja arus bengket tupung jelma si nterem bengket, janah mulih tupung jelma si nterem mulih.

¹¹Tupung kerja man-man ras wari-wari Raya, persembahen buah gandum arus sepuluh pitu setengah liter raduken sada jenggi lembu tah sada bajar biri-biri, janah radu ras sada anak biri-biri, banci kasa kai pe rikutken sura-sura kalak si ersembah. Rikut ras tep-tep persembahen buah gandum, arus ipersembahken telu liter minak saitun.

¹²Adi raja si sangana erkuasa erbahan persembahen man TUHAN erkiteken pusuhna ersuruh, subuk persembahen tutungen tah pe persembahen persadan, maka kerabangen si arah kenjulu dalan bengket ku kesain si arah bas arus italangi man bana. Persembahen si ibahanna arus bali ras persembahen si ibahanna tupung wari Sabat, janah kerabangen e arus ipintu kenca ia mulih ndarat.”

¹³Nina TUHAN, “Tep-tep erpagi-pagi sada anak biri-biri umur sada tahun arus itutung jadi persembahen man TUHAN. Persembahen enda arus ibahan tep-tep wari.

¹⁴Tambah si e arus ka pe ipersembahken dua kilo tepung tep-tep erpagi-pagi radu ras sada liter minak saitun si icampur ras tepung ndai. Enda me peraturen persembahen buah gandum man TUHAN si arus ipatuhi seh rasa lalap.

¹⁵Anak biri-biri, tepung, ras minak saitun arus ipersembahken man TUHAN tep-tep erpagi-pagi seh rasa lalap.”

¹⁶ TUHAN si Erdolat ngatakenca nina, “Adi raja si erkuasa mereken sada bagin tanehna man sekalak anakna si dilaki, taneh e enggo anak ndai empuna jadi sikerajangen keluargana.

¹⁷Tapi adi raja mereken sada bagin tanehna man sekalak pegawaina taneh e arus ka mulih man raja adi Tahun Kemulihen enggo seh. Taneh e sikerajangenna kap, janah ia ras anak-anakna si dilaki ngenca banci jadi empuna seh rasa lalap. [90†]

¹⁸Raja si erkuasa la banci muat taneh rayatna si apai pe. Taneh si iberekenna man anakna arus sada bagin i bas taneh si enggo iserapken man bana, gelah ola sada pe bangsangKu itindasna alu muat tanehna.”

¹⁹Kenca bage ibaba dilaki ndai aku arah pintun si lit i duru kerabangen Selatan, ku kamar-kamar si badia si ngala kempak Utara. Kamar-kamar enda isikapken man imam-imam. I je ituduhken dilaki ndai man bangku sada ingan i ujung lorong si arah kenjahe.

²⁰Janah nina, “I jenda me imam-imam nanggerken daging persembahen pengalemi dosa ras persembahen ganti rugi, bage pe ingan nasakken tepung persembahen gelah kasa kai si badia ola lit ibaba ndarat ku kesain si arah darat, maka jelma si nterem ola kena cilaka.”

²¹ [21-22] Kenca bage ibabaina ka aku ku kesain si arah darat. Ituduhken man bangku maka i bas empatna sukina, lit ka kesain si terkitiken, gedangna duapuluh meter, belangna sepuluh lima meter.

²³Tep-tep kesain lit tembok sekelewetna, dingen lit ka pe dapurna i bas tembok e.

²⁴Nina dilaki e man bangku, “I jenda me kalak si erdahin i bas Rumah Pertoton e nanggerken persembahen-persembahen si ibereken jelma si nterem.”