Read Batak Karo ESEKIEL 47 Bible Online

ESEKIEL 47 - Batak Karo bible

ESEKIEL 47

¹Kenca bage ibabai dilaki ndai aku mulih ku kerabangen Rumah Pertoton. I bas dalan bengket ku Rumah Pertoton e kuidah lau ndarat i teruh pintu nari, janah maler ku kenjulu sue ras pengala Rumah Pertoton e. Lau e maler arah teruh Rumah Pertoton bagin Selatan mentasi dampar Selatan batar-batar. [91†]

²Kenca bage ibabai dilaki ndai aku ndarat i bas kesain Rumah Pertoton e nari arah kerabangen Utara, jenari ku kerabangen si ngala kempak Timur. I je lau si kitik-kitik ndai maler ndarat arah kemuhen kerabangen e.

³Janahna nibarisa alu sibar-sibar ibabai dilaki ndai aku lima ratus meter ku kenjulu ngikutken paleren lau e. Isuruhna aku ngeparisa, janah i bas ingan e, launa terjeng gedap tapak-tapak ngenca bagesna.

⁴Kenca bage isibarina ka limaratus meter nari; lau enggo seh ngayak tiwenku. Limaratus meter nari ka kuberneh, launa enggo seh terjeng awakku.

⁵Isibarina ka lima ratus meter nari, janah i je launa enggo mbages, seh maka lanai terdalani ngepar. Adi ngepar ate kalak terpaksa ia erlangi.

⁶Nina dilaki e bangku, “O manusia si ermasap-masap, perdiatekenlah kerina si e alu mehuli.” Kenca bage ibabaina aku mulih arah tepi lau belin e,

⁷janah kuidah gedang-gedang tepi lau e melala kal batang kayu.

⁸Nina man bangku, “Lau enda maler arah negeri e ku kenjulu, jenari ku Baluren Lau Jordan, terus ku Lawit Mate. Kenca seh i Lawit Mate, lau masin si lit i je isambarina jadi lau malem.

⁹Kujapa pe lau e maler, melala i je rubia-rubia ras nurung. Lau e mahanca maka lau si lit i Lawit Mate jadi malem, janah ku japa pe ia maler, i je minter lit kegeluhen.

¹⁰Mulai i Sumbul En-Gedi nari terus ku Sumbul En-Eglaim, nterem penjala nurung engkerahken jalana i tepi lawit e. Erbage-bage nurung lit i je, bali ras si lit i Lawit Tengah.

¹¹Tapi lau si lit i bas paya-paya ras kolam-kolam si gedang-gedang tepi lawit e la isambari jadi lau malem. Lau e tetap i je gelah banci man ingan muat sira.

¹²I gedang-gedang tepi lau e, arah kawes ras kemuhen turah erbage-bage batang kayu si man pangan buahna. Bulungna la melus-melus janah buahna la erkeri-kerin. Tep-tep bulan lit buahna si mbaru, erkiteken launa e me si maler i bas Rumah Pertoton e nari. Buahna man pangan, bulungna jadi tambar.” [92†]

¹³Nina TUHAN si Erdolat, “Enda me perbalengen taneh si man bagi-bagindu man suku-suku si sepuluh dua e, i je suku Jusup ngaloken dua bagin.

¹⁴Nai erpadan Aku man nini-ninina maka Kubereken taneh e man sikerajangenna; e maka genduari begikenlah alu bujur sapih-sapih kam.

¹⁵Balengna si arah Utara mulai i Lawit Tengah nari ku kenjulu arah kuta Hetlon, Hamat terus ku kuta Sedad,

¹⁶jenari ku kuta-kuta Berota ras Sibraim (inganna kelang-kelang kerajan Damaskus ras kerajaan Hamat), terus ku kuta Tikon (inganna i bas perbalengen kerajan Hauran).

¹⁷Dage balengna si arah Utara mulai i Lawit Tengah nari ku kenjulu seh ku kuta Hasar-Enon; alu bage daerah Damaskus ras Hamat lit i Utara perbalengen e.

¹⁸Balengna si arah kenjulu mulai i bas sada ingan kelang-kelang daerah Damaskus ras Hauran, jenari terus ku Selatan ngikut-ngikut Lau Jordan seh ku Tamar i Lawit Mate. Dage jahen Lau Jordan e me taneh Israel, janah julunna Gileat.

¹⁹Balengna si arah Selatan mulai i Tamar nari ku kenjahe, terus ku Kades, kenca bage sider ku Utara ngikutken perbalengen ras Mesir seh ku Lawit Tengah.

²⁰Balengna si arah kenjahe e me Lawit Mate terus ku Utara ngayak seh i bas sada ingan jahen dalan ku Hamat.

²¹Bagikenlah taneh enda sapih suku-sukundu,

²²janah e me sikerajangenndu seh rasa lalap. Bangsa si deban si ringan i tengah-tengahndu janah anak-anakna si tubuh i bas negeri e, arus dat bagin tupung taneh e ibagi-bagikenndu. Man bana pe arus bali ibahan ras man kalak Israel.

²³Man kerina bangsa si deban arus ibereken taneh radu ras kalak Israel i ja ia ringan. Aku TUHAN si Erdolat enggo melasken katangKu.”