Read Batak Karo ESEKIEL 6 Bible Online

ESEKIEL 6 - Batak Karo bible

ESEKIEL 6

¹Kata TUHAN seh man bangku nina,

²“O manusia si ermasap-masap, tataplah kempak deleng-deleng Israel janah ernubuatlah kerna ukumen.

³Enda me katangKu, Aku TUHAN si Erdolat, janah suruhlah deleng-deleng Israel, uruk-uruk, embang-embang, ras baluren-baluren megikenca. Nehenlah, Kusuruh me sada pedang ngeradasken kerina ingan ersembah man gana-gana.

⁴Batar-batar iruntuhken janah batar-batar ingan mpersembahken kumenen iperperken. Kerina kalak si ersembah i je, mate i lebe-lebe gana-gana e.

⁵Merap Kubahan mait-mait kalak Israel, tulan-tulanna kukerapken i belang-belang batar-batar e.

⁶Kerina kuta Israel ikernepken, maka kerina batar-batarna ras gana-ganana meripuk seh getem, batar-batar ingan kumenen perper, janah kasa si ibahanna masap kerina.

⁷Ijapa pe jelma ibunuhi, janah kasa kalak si nggeluh denga ngaku me maka Aku kap TUHAN.

⁸Tapi deba Kupulahi i bas pembunuhen e nari jenari Kupemerap ku tengah bangsa-bangsa,

⁹janah i je me ia nggeluh jadi buangen. I je ingetna me Aku, janah ietehna maka enggo Kuukum ras Kupeteruk ia, erkiteken pusuhna enggo ngelupaken Aku, sabap ulin akapna nembah man berhalana asangken man bangKu. E maka ciga atena ngenen dirina erkiteken kejahaten ras lagu langkahna si macik si enggo ilakokenna.

¹⁰Ietehna me maka aku kap TUHAN, janah persinget si Kubereken e labo si sia-sia.”

¹¹Nina TUHAN si Erdolat, “Temtemilah bandu, serkokenlah! Ngandunglah erkiteken kerina kejahaten ras kerina si nggesuh si enggo ilakoken kalak Israel. E maka mate me ia i bas perang, erkiteken kelihen, ras penakit.

¹²Kalak si ndauh kena penakit, kalak si ndeher mate i bas perang; kalak si tading denga mate erkiteken kelihen. Inanamina me uga sangatna pernembeh ateKu man bana.

¹³Mait amparen i tengah gana-gana i sekelewet batar-batar, merap i bas tep-tep uruk meganjang, i datas tep-tep deleng, iteruh tep-tep batang kayu si merabun bulungna, iteruh kayu si galang, i bas tep-tep ingan i ja itutungna persembahen-persembahen man gana-gana. Kenca si e kerina me kalak meteh maka Aku kap TUHAN.

¹⁴Sabap la banci lang Kuawatken tanKu, jenari Kukernepken negerina, seh maka melungen, mulai i gurun pasir selatan nari seh ku kuta Ripla i Utara. Kasa kuta-kuta si iiani kalak Israel la lit sada pe ketadingen. Kenca si e kerina me kalak metehsa maka Aku kap TUHAN.”