Read Batak Karo ESEKIEL 7 Bible Online

ESEKIEL 7 - Batak Karo bible

ESEKIEL 7

¹Kata TUHAN seh man bangku nina,

²“O manusia si ermasap-masap, Aku TUHAN si Erdolat, janah enda me katangKu nandangi negeri Israel: Enda me kedungen man kerina negeri e!

³O Israel, kam enggo dung. Inanamindu me pernembeh ateKu, perban Kuukum kam kerna kai si enggo ibahanndu. Kubalas man bandu kerina lagu langkahndu si melket.

⁴La Kupelepas kam pulah janah la ateKu mekuah man bandu. Kuukum me kam erkiteken kerina perbahanenndu si melket e, gelah itehndu maka Aku kap TUHAN.”

⁵Tole bagenda nina TUHAN si Erdolat, “Tambah tindih mara reh ndumpang kam.

⁶Enggo kam dung. Bene me kam. Enggo seh paksandu.

⁷Bene me kam, o kam kerina kalak si ringan i negeri e. Paksana enggo seh i ja lanai lit pesta-pesta i bas batar-batar si i das deleng. Keguluten nari ngenca kerina.

⁸Genduari pedas me inanamindu uga sangatna rawangKu man bandu. Kuadili kam sue ras kai si enggo ilakokenndu, janah Kubalas man bandu kerina lagu langkahndu si melket.

⁹La kam Kupulahi, la ateKu mekuah man bandu. Kuukum me kam erkiteken perbahanenndu si melket, gelah ietehndu maka Aku kap TUHAN, janah Aku me si ngukum kam.”

¹⁰Wari cilaka enggo reh ku Israel. I jah i je nterem kalak si bunuh-bunuhen. Ukur meganjang enggo seh ku tampuk si meganjangna.

¹¹Erkiteken perbahanen si kejam, enggo turah melala kejahaten. Kai pe lanai pagi lit tading i bas ia, subuk kebayaken bage pe kehagan ras kemulianna.

¹²Paksana enggo seh. Warina enggo ndeher i ja si erbinaga ras si nukur lanai lit ertina, erkiteken ukumen Dibata ndabuh man kerina kalak, apai pe la erndobah.

¹³La lit perbinaga si sempat ndatken kai si enggo idayakenna, sabap pernembeh ate Dibata engkenai kerina jelma. Kalak jahat la banci terkelin.

¹⁴Terompet ersora, kerina kalak ersikap. Tapi la lit ise pe si lawes erperang, sabap pernembeh ate Dibata ngkenai kerina kalak, apai pe la erndobah.

¹⁵I pasar-pasar rubati kalak, janah i bas rumah lit penakit ras kelihen. Kasa kalak si lit i bas juma mate erkiteken rubat, janah kalak si lit i kuta mate erkiteken penakit ras kelihen.

¹⁶Deba lompat ku deleng-deleng desken ndukur si sengget i bas baluren. Kerina ndehereng erkiteken dosa-dosana.

¹⁷Tan kalak jadi kote, janah tiwenna nggirgir.

¹⁸Ipakena uis guni, dagingna pe nggirgir kerina. Takalna melinang erkiteken icukur janah kerina kalak ipemela-melaken.

¹⁹Emas ras pirakna ibenterkenna ku pasar-pasar desken menterken sampah-sampah, erkiteken subuk emas bage pe pirak la ngasup ngkelini ia tupung TUHAN nehken pernembeh ateNa. Sabap si e lanai terpake guna nehken sura-surana, la banci mesuri beltekna. Emas ras pirak enggo mabai ia kempak dosa.

²⁰Mbarenda megah kal akapna kerna batu-batu permatana si mejile. Tapi erkiteken ipakena si e guna mahan gana-gana si ciga ate ngenenca, e maka ibahan TUHAN ertana e jadi sampah-sampah.

²¹Nina TUHAN, “Kupekendit dalan bangsa si deban ngerampok kam. Penjahat-penjahat muati kebayaken, jenari iliamina.

²²Tupung RumahKu si meherga iliami, tupung perampok-perampok bengket ku bas jenari iliamina, sinik saja Aku.

²³Kerinana serbut dingen rontang, negeri e dem alu pemunuh-pemunuh, janah i bas kuta e melala kal si bunuh-bunuhen.

²⁴Kusuruh ku jenda bangsa-bangsa si ganasna kal janah Kupediat iinganina rumahndu. Kalak si megegehna i bas kam bene ukurna tupung Kupelepas bangsa-bangsa e ngeliami ingan-inganndu ersembah.

²⁵Reh me aru ate. Idaramindu kedamen, tapi ndigan pe la datndu.

²⁶Mara iikuti mara si deban, janah berita-berita si la mehuli la erngadi-ngadi reh man bandu. Meseksek pemindonndu man nabi-nabi gelah ernubuat, tapi la ia ngasup. Imam-imam pe la lit si man ajarenkenna man bangsa e, janah pertua-pertua la lit pedah si man berenkenna.

²⁷Raja erceda ate, anak raja peltep pengarapenna, janah bangsa e kerina nggirgir perban biarna. Kuukum kam erkiteken kai si enggo ilakokenndu, janah Kusalahken kam bagi kam enggo nalahi kalak. Arah e teridah man bandu maka Aku kap TUHAN.”