Read Batak Karo ESEKIEL 8 Bible Online

ESEKIEL 8 - Batak Karo bible

ESEKIEL 8

¹I bas wari pelimaken, bulan si peenemken, tahun si peenemken kenca kami i bas pembuangen, peminpin-peminpin kalak si ibuang i Juda nari, kundul ras aku i bas rumahku. E maka rempet aku ikuasai tan TUHAN si Erdolat.

²Kutare ku datas, janah kuidah sada si tempasna bagi manusia. I bas awakna nari ku teruh teridah bagi api, janah i bas awakna nari ku das erkilat-kilat bagi tembaga si ipelas alu kertas pasir. [16†]

³Idadakenna man bangku si tempasna bagi tan, jenari itangkapna bukku. Kenca bage i bas pengenehenen enda Kesah Dibata ngangkat aku meganjang jenari ibabaNa aku ku Jerusalem, ku pintu kerabangen si arah utara. I je lit sada gana-gana si nembeh kal ate Dibata ngenenca.

⁴I bas ingan e teridah man bangku terang si mesilo tandana Dibata nu Israel reh ku je, bali ras kuidah tupung aku i tepi Lau Kebar. [17†]

⁵Nina Dibata man bangku, “O manusia si ermasap-masap tataplah ku utara.” Kutatap ku utara, janah deherken batar-batar si lit i duru pintu kerabangen e kuidah gana-gana si nembeh kal ate Dibata ngenenca.

⁶Nina Dibata man bangku, “O manusia si ermasap-masap, idahndu ka nge kai si jadi? Perdiatekenlah perbahanen-perbahanen si melket si ilakoken kalak Israel i jenda, si erbahanca Aku lalap reh dauhna i bas inganKu si Badia e nari. Nandangi idahndu denga me tole perkara-perkara si ndauh melketen asa si enda.”

⁷Kenca bage ibabaNa aku ku dalan bengket ku kesain Rumah Pertoton, jenari icidahkenNa man bangku sada lubang i bas tembok.

⁸Nina man bangku, “Nusuklah kam arah lubang e,” jenari kuidah sada pintun.

⁹Nina man bangku, “To ku bas janah pernehenlah kejahaten ras perbahanen si macik si ilakokenna i je.”

¹⁰E maka bengket aku, janah kuidah dingdingna dem alu gambar nipe ras rubia-rubia si deban si ipantangken, bage pe barang-barang si deban si isembah kalak Israel tupung si e.

¹¹Peminpin-peminpin kalak Israel lit pitupuluh kalak i je, ikut pe Jahasanya anak Sapan. Sekalak-sekalak njemak ingan nutung kumenen, janah cimber kumenen ndai erdipul ku das.

¹²Isungkun Dibata aku nina, “O manusia si ermasap-masap, ma enggo idahndu kai si ibahan peminpin-peminpin Israel e alu erbuni-buni? Kerina ia sanga nembah man sada ingan si dem alu gana-gana. Alasenna e me, ‘ TUHAN labo ngidah kita. Enggo itadingkenNa negeri enda.’ ”

¹³Kenca bage nina ka TUHAN man bangku, “Idahndu denga me tole perbahanenna si termelketen asa si enda.”

¹⁴E maka ibabaNa aku ku pintu kerabangen si arah utara Rumah Pertoton. I je icidahkenNa man bangku piga-piga kalak diberu sangana nangisi kematen dibata-dibata Tammus.

¹⁵IsungkunNa aku nina, “Ma enggo idahndu e? Idahndu denga me tole perbahanen si termelketen asa si e.”

¹⁶E maka ibabaNa aku ku kesain si i tengah Rumah Pertoton. Deherken dalan bengket ku bas ingan si badia, kelang-kelang batar-batar ras labah, lit i je kira-kira dua puluh lima kalak dilaki. Ipudikenna ingan si badia e, mungkuk ia ku Timur lako nembah man matawari si sangana nangkih.

¹⁷Ikataken TUHAN man bangku nina, “O manusia si ermasap-masap ma enggo idahndu e? Kalak Juda enda la puas alu ngelakoken kerina perbahanen si melket si enggo idahndu e saja; la puas akapna arah ngelakoken pemerasen i belang-belang negeri e, tapi arus ka kepe ia reh ku Rumah Pertoton enda ngelakoken si e kerina, si mahanca tambah kal ateKu nembehna. Nehenlah uga sangatna penggombangina Aku alu dalan si macikna kal.

¹⁸Erkiteken si e inanamina me uga sangatna pernembeh ateKu man bana. La Kupulahi ia, janah la sitik pe ateKu mekuah man bana. Serko-serko me ia ertoto man bangKu asa gangna, tapi la Aku nggit megikenca.”