Read Batak Karo ESEKIEL 9 Bible Online

ESEKIEL 9 - Batak Karo bible

ESEKIEL 9

¹Kenca bage kubegi Dibata erlebuh alu sora megang nina, “Mari o kam kerina si ngukum kuta e, baba senjatandu.”

²E maka minter reh enem kalak dilaki arah pintu kerabangen si arah utara Rumah Pertoton, sekalak-sekalak maba senjatana. Radu ras kalak ndai lit sekalak dilaki, uisna linen, ibabana perkakasna guna nurat. Reh ia kerina jenari tedis deherken batar-batar tembaga e.

³Kenca bage sinalsal si mesilo tandana Dibata Israel lit i je, nangkih i bas kerubim e nari, jenari pindah i bas inganna si gel-gel e nari ku dalan bengket ku Rumah Pertoton e. Jenari erlebuh TUHAN man kalak si ruis linen ndai nina,

⁴“To siar-siari kerina kuta Jerusalem, janah tamaken capna i perdempaken tep-tep kalak si erndele ate ras susah erkite-kiteken kerina perbahanen si macik si ilakoken i bas kuta e.” [18†]

⁵E maka kubegi ka Dibata ngerana man kalak si debanna nina, “Ikutken ia niar-niar kuta e; bunuh, ola sada pe pulahi, ola ise pe atendu mekuah.

⁶Bunuh kerina tua-tua, anak perana, singuda-nguda, pernanden, bage pe danak-danak. Tapi ola kuit kalak si lit capna i perdempakenna. Benakenlah i jenda, i bas RumahKu enda nari.” E maka ibenakenna munuhi peminpin-peminpin si tedis i bas Rumah Pertoton e.

⁷Nina Dibata man kalak ndai, “Bahanlah maka Rumah Pertoton e keliamen. Demilah kesainna alu mayat. Benakenlah!” E maka ibenaken kalak ndai me munuhi i bas kuta.

⁸Tupung pemunuhen e sangana erdalan, aku sisada ngenca i je. Nembah aku, ayongku seh ku taneh janah kuserkoken ningku, “O TUHAN si Erdolat, nembeh kal kin ateNdu man Jerusalem seh maka ibunuhiNdu ateNdu kerina kalak si tading i Israel?”

⁹Erjabap Dibata nina, “Kalak Israel ras Juda mbelin kal dosana. Munuh dahinna i belang-belang negeri e, janah idemina kuta Jerusalem alu kejahaten. Ikatakenna maka Aku, TUHAN, enggo nadingken negerina janah la Kuidah ia.

¹⁰E maka la ateKu mekuah man bana; uga perbahanenna man kalak si deban, bage ka me perbahanenKu man bana.”

¹¹Kenca bage dilaki si ruis kain linen ndai mulih, jenari ikatakenna man TUHAN nina, “Enggo kudalanken perentahNdu.”