Read Batak Karo DANIEL 1 Bible Online

DANIEL 1 - Batak Karo bible

DANIEL 1

¹I bas tahun si peteluken sangana Joyakim jadi raja Juda, kuta Jerusalem iserang Nebukadnesar, raja Babilon. Kuta e ikepungna, [1†]

²janah ipelepas TUHAN ia naban Raja Joyakim ras ngerampas sada bagin erta-erta Rumah Pertoton. Ibabana piga-piga kalak tabanen ku rumah pertoton dibata-dibatana i Babilon, janah erta-erta si irampasna ndai isimpanna i kamar perbendaharan rumah pertoton e. [2†]

³Kenca bage isuruh raja me si Aspenas, e me penghulu juak-juakna, lako milih piga-piga anak perana i bas kalak Israel si ibuang e nari, si kesusuren raja ras sibayak.

⁴Kalak si ipilih e arus mejile rupana pentar kal, mbages pemetehna, pedas nangkap pelajaren, janah la lit sitik pe man pandangen i bas kulana, gelah banci ia atan erdahin i bas istana raja. Aspenas arus ngajari kalak ndai ngoge ras nuratken cakap Babilon.

⁵Iperentahken raja ka pe tole maka tep-tep wari arus ibereken man kalak e pangan ras anggur, seri ras si ibereken man kalak si ringan i bas istana raja. Kenca telu tahun ndalani latihen si bage, kalak ndai arus ngadap i lebe lebe raja.

⁶I bas kalak si terpilih e ikut me Daniel, Hananya, Misael, ras Asaria. Kalak enda kerina i bas suku Juda nari.

⁷Gelar kalak enda empatna isambari pengulu juak-juak jadi Beltasar, Saderah, Mesah ras Abednego.

⁸Enggo itetapken Daniel i bas ukurna maka la ia nggit ngelanggar aturen agamana aminna pe man bana isikapken pangan ras inemen lau anggur i bas istana. E maka ipindona penampat man Aspenas,

⁹janah bekas jujuren Dibata, melias ras mesayang kal Aspenas man Daniel.

¹⁰Tapi amin bage pe, erkiteken mbiar Aspenas kempak raja, ikatakenna man Daniel nina, “Enggo itetapken raja kai si man pangan ras inemenndu, janah adi la pagi mbestang dagingndu bagi anak perana si deban, tentu ibunuh raja aku erkiteken kam.”

¹¹E maka ijumpai Daniel penjaga si enggo isuruh Aspenas ngurus Daniel ras temanna si telu kalak nari.

¹²Nina Daniel man penjaga e, “Pepayolah kami i bas sepuluh wari enda. Bereken gule-gulen saja pangan kami dingen lau saja inemen kami.

¹³Kenca bage pepayo apai si mbestangna: kami ntah anak perana si man pangan si isikapken i bas istana e. Jenari bahanlah keputusenndu rikutken pengidahenndu kerna kami.”

¹⁴Nggit ia ngaloken pemindon kalak ndai gelah icubaken i bas sepuluh wari.

¹⁵Kenca enggo seh si sepuluh wari ndai, teridah maka ulin rupana dingen mbestangen dagingna asangken kerina kalak si man pangan raja ndai.

¹⁶E maka mulai i bas paksa e nari ibere penjaga ndai ia terus man gule-gulen saja. Pangan raja ras lau anggur lanai ibereken man bana.

¹⁷Man anak perana si empat e, Dibata mereken pemeteh ras kebeluhen kerna erbage-bage surat rikut ras kepentaren si deban. Tambah si e man Daniel ibereken Dibata pe kebeluhen lako ngertiken pengenehenen ras nipi.

¹⁸Kenca seh paksana si telu tahun ndai, ibaba Aspenas kerina anak perana e ngadap man Raja Nebukadnesar.

¹⁹Ercakap-cakap raja ras ia kerina, janah i bas si e, si ngenana kal ate raja e me Daniel, Hananya, Misael ras Asaria. E maka ialoken me ia jadi pegawai istana.

²⁰Ola kenca la kai gia penungkunen raja tah persoalen si kuga gia si ibahan raja, anak perana si empat e beluhen njabapsa sepuluh kali lipat asangken kerina guru-guru si beluh ngoge nasip ntah pe guru-guru permangmang si lit i bas kerajan e.

²¹Daniel tetap ringan i bas istana seh ngayak Kores, raja Persia naluken Babilon.