Read Batak Karo DANIEL 10 Bible Online

DANIEL 10 - Batak Karo bible

DANIEL 10

¹( [1] I bas tahun si peteluken kenca Kores jadi raja Persia, ipetangkas sada berita man Daniel, si igelari ka pe Beltasar. Berita e, e me berita si tuhu-tuhu, kerna sada peperangen si mbelin. Si e ituriken man bana i bas sada pengenehenen.)

²I bas paksa e aku erceda ate telu minggu dekahna.

³La sitik pe kupan pangan si entabeh tah daging, lau anggur pe la kuinem, janah la aku ersuri seh enggo lepas si telu minggu e.

⁴I bas wari dua puluh empat, bulan si pemena i bas tahun e, aku tedis i tepi Lau Tigris si mbelin.

⁵Kutare ku das janah kuidah sekalak si erpaken uis linen dingen ergenditken gendit emas tulen. [22†]

⁶Dagingna ersinalsal desken permata si meherga. Ayona erndilap desken kilap si erkinar, janah matana bali ras api si gurlah. Tanna ras nahena desken tembaga si ipelas, janah sorana pinger desken pernderkuh jelma nterem.

⁷Aku ngenca sisada ngidah pengenehenen e. Kalak si ras aku tupung si e la idahna kai pe, tapi mbiar kal ia kerina, e maka kiam ia, janah cebuni.

⁸Tading aku i je sisada, ngenen pengenehenen si mejin e. Aku lanai sitik pe ergegeh, janah sambar kal ayongku seh maka ise pe lanai nandai aku.

⁹Tupung kubegi sorana, guling aku ku taneh, pingsan, janah langkem aku i bas taneh.

¹⁰Kenca bage lit sada tan nangkap aku, jenari ipekekena aku; kucikenken tanku dingenku erjimpuh, janah kerina dagingku nggirgir denga.

¹¹Nina malekat e man bangku, “O Daniel, keleng kal ate Dibata man bandu. Tedisken, jenari begikenlah alu mehuli kai si kukataken man bandu. Aku isuruh njumpai kam.” Kenca ikatakenna si enda, minter aku tedis, tapi nggirgir denga aku.

¹²E maka nina, “O Daniel, ola kam mbiar. Dibata enggo megiken pertotonndu mulai i bas wari si pemena nari kam netapken ukur lako mpeteruk dirindu gelah ndatken pengertin. Kerehenku erkiteken pertotondu.

¹³Malekat pengawal kerajan Persia ngelawan aku dua puluh sada wari dekahna. Kenca bage Mikhael, e me sekalak i bas pengulu-pengulu malekat, reh nampati aku, e maka kutadingken ia i je ras malekat kerajan Persia. [23†]

¹⁴Aku reh ku jenda gelah banci iertindu kai si nandangi jadi man bangsandu i bas paksa si reh. Enda me pengenehenen kerna paksa si reh e.”

¹⁵Kenca ikatakenna si enda minter aku tungkuk, lanai aku ngasup ngerana.

¹⁶Kenca bage, malekat ndai, si tempasna bagi manusia, dudurken tanna, jenari ikuitna biberku. Ningku man bana, “O tuan, kote kal aku ibahan pengenehenen enda, seh maka la erngadi-ngadi aku nggirgir.

¹⁷Aku bali ras sekalak budak tedis i lebe-lebe tuanna. Kuga banci aku ngerana man bandu? Gegehku lanai lit, kesahku pe enggo keri.”

¹⁸Ijemakna ka aku sekali nari, e maka enggo ergegehna aku.

¹⁹Nina, “Dibata erkeleng ate man bandu, e maka ola kam mbiar, ola atendu aru.” Kenca ikatakenna si enda, reh gegehna kuakap bangku, e maka ningku, “Tuan, katakenlah kai si man katankenndu, sabap enggo reh gegehna aku ibahanndu.”

²⁰ [20-21] Nina, “Ietehndu kin ngkai maka aku reh ndahi kam? Kerehenku mpetangkas kai si tersurat i bas Kitap Ketuhutuhun. Genduari aku arus mulih maka kulawan malekat pengawal Persia. Kenca bage, reh ka malekat pengawal Junani. La lit ise pe si nampati aku seakatan Mikhael, malekat pengawal Israel.