Read Batak Karo DANIEL 12 Bible Online

DANIEL 12 - Batak Karo bible

DANIEL 12

¹Nina malekat si make uis linen e, “Tupung paksa e, keke me Mikhael, malekat si mbelin si ngkawali bangsandu. Kenca bage lit me paksa kesusahen si mberat si la pernah bage jadi kidekah bangsa-bangsa ijadiken. Adi enggo seh paksa si e, bangsandu si tersurat gelarna i bas kitap Dibata, terkelin me. [26†]

²Nterem kalak si enggo mate nggeluh mulihi: deba ngenanami keriahen kegeluhen si rasa lalap, deba mela akapna seh rasa lalap. [27†]

³Peminpin-peminpin si pentar ersinalsal bali ras langit si harhar. Janah kalak si enggo mabai nterem kalak ndalanken kai si benar ersinalsal rasa lalap bali ras bintang-bintang.”

⁴Nina malekat e man bangku, “Dage genduari Daniel, tutuplah kitap e janah tama meterena i je seh ku bas pendungi doni enda. Kidekah si e, nterem pagi jelma ngelatihi bana alu sia-sia alu ncubaken ngertiken si jadi.” [28†]

⁵Kenca bage kuidah dua kalak dilaki tedis i tepi lau belin, pekepar-kepar ia duana.

⁶Sekalak nungkun man malekat si tedis arah gugung nina, “Asa kai nari dekahna maka ngadi kejadin-kejadin si mejin enda ndai?”

⁷Iangkat malekat ndai tanna duana kempak langit janah erpadan ia i bas gelar Dibata si Nggeluh Rasa Lalap. Janah kubegi ikatakenna nina, “Dekahna lit telu setengah tahun nari. Kenca bangsa Dibata lanai pagi iayak-ayak, kerina si enda enggo pagi jadi.” [29†]

⁸Kubegi kai si ikatakenna, tapi la kuerti. E maka nungkun aku, “Tapi, o tuan, kuga banci si e kerina ngadi?”

⁹Erjabap ia nina, “Kam arus lawes genduari Daniel, sabap kata-kata enda arus irahasiaken ras ibuniken seh paksa pendungi e.

¹⁰Nterem pagi kalak si ibersihken. Kalak jahat la ngerti ia, e maka tetap ia erbahan jahat; kalak pentar ngenca pagi ngerti. [30†]

¹¹Mulai i bas paksa persembahen si tep-tep wari e ipengadi, e me i bas paksa Gana-gana si Mejin e, mentas pagi lebe 1.290 wari. [31†]

¹²Malem me ate kalak si tetap patuh seh mentas 1.335 wari.

¹³Janah kam Daniel, patuhlah kam seh ku pendungina. Kenca bage mate me kam, tapi keke me kam ngaloken upahndu i bas paksa pendungina.”