Read Batak Karo DANIEL 2 Bible Online

DANIEL 2 - Batak Karo bible

DANIEL 2

¹I bas tahun si peduaken kenca Nebukadnesar jadi raja, ernipi ia. Aru kal atena erkiteken nipina e seh maka lanai tertunduhkenca.

²E maka ipepulungna guru-guru si beluh ngoge nasip, guru permangmang, guru pertendung, ras guru si baso, lako nuriken man bana kai erti nipina e. Kenca ngadap kerina i lebe-lebe raja,

³nina raja man bana, “Suhsah ukurku kerna nipingku, e maka mesikel aku meteh antusenna!”

⁴Ngaloi kalak ndai i bas cakap Aram nina, “Rasa lalaplah raja nggeluh! Turiken nipindu e, maka ituriken kami antusenna.”

⁵Nina raja man bana, “Enggo kutetapken i bas ukurku maka arus iturikenndu bangku nipingku e, jenari turiken pe antusenna. Adi la kam ngasup nurikenca, la banci lang kam itampul dingen dagindu ikeret-keret, janah rumahndu irontasken.

⁶Tapi adi ngasup kam nurikenca nipi e ras antusenna kubereken bandu upah si mbelin rikut ras kehamaten. Dage, turikenlah genduari kai nipingku e ras kai antusenna.”

⁷Ngaloi ka kalak ndai man raja nina, “O Raja, adi iturikenndulah nipindu e man kami, tentu banci ituriken kami antusenna.”

⁸Megi si e, ngerana raja, “Enggo kueteh maka atendu pedekah-dekahsa saja. Sabap itehndu maka enggo kutetapken ukurku,

⁹lako mereken ukumen si seri man bandu kerina adi la iturikenndu nipingku e. Enggo ersada arihndu kerina terus-terusen nuriken kata guak man bangku, sabap ngarap kam kenca ndekah kari banci sambar ukurku. Genduari turiken kai nipingku e, gelah kueteh kengasupenndu nuriken antusenna.”

¹⁰Erjabap guru-guru e kerina nina, “O Raja, labo lit ise i babo doni enda si ngasup nurikenca si merincuh kam metehsa e. Lenga pernah lit sekalak raja pe, subuk raja si mbelinna, tah pe raja si erkuasana, si erbahan pemindon si bagenda man guru-guru si beluh ngoge nasip, guru permangmang, tah guru pertendung.

¹¹Meserasa pemindonndu e, raja; e maka labo lit ise pe ngasup ngelakokenca seakatan dibata-dibata, janah si bage la lit ringan i tengah-tengah manusia.”

¹²Erkiteken si e merawa kal raja, janah iperentahkenna munuh kerina penasehat kerajan i Babil.

¹³Dage luar me perentah gelah kerina kalak ndai ibunuh, janah i bas si e ikut pe Daniel ras teman-temanna.

¹⁴Kenca bage ijumpai Daniel si Ariok, komendan pengawal raja, si iperentahken ndalanken pemunuhen e.

¹⁵Alu manjar-anjar Daniel ngorati Ariok ngkai maka luar perentah raja si bage kejamna. E maka ituriken Ariok man Daniel kai si enggo jadi.

¹⁶Minter lawes Daniel ku istana mindo kesempaten sitik nari gelah banci iturikenna kai erti nipi e.

¹⁷Kenca bage mulih Daniel ku rumahna. E maka iturikenna man teman-temanna Hananya, Misael, ras Asaria kai si enggo jadi.

¹⁸Isuruhna kalak e ertoto man Dibata nu langit mindo perkuah ateNa gelah iturikenNa kai antusen nipi raja maka ola ia ibunuh radu ras guru-guru Babilon si deban.

¹⁹Kenca bage i bas berngi e ka, ipetangkas Dibata man Daniel kerina rahasia e arah sada pengenehenen. E maka ipujina Dibata nu langit nina,

²⁰“Dibata tuhu-tuhu pentar ras erkuasa; rasa lalap pujilah Ia.

²¹Wari-wari Ia ngaturkenca, paksa-paksa Ia ngobahsa. Ia nge si ngangkat raja-raja, Ia ka nge si pengadisa. Ia si mereken kepentaren, Ia ka nge si mereken pengertin.

²²IpetangkasNa perkara si mbages dingen rahasia. Ia ikeleweti terang, tapi si terbuni i bas gelap ietehNa.

²³Kupuji dingen kupehaga Kam, o Dibata nu nini-niningku, sabap enggo iberekenNdu kepentaren ras gegeh bangku. Pertotonku enggo ibegikenndu, si man turinken kami man raja enggo icidahkenNdu.”

²⁴E maka lawes Daniel njumpai Ariok, si enggo iperentahken raja munuhi penasehat-penasehat kerajan. Nina Daniel bana, “Ola bunuhndu kalak e. Baba aku ngadap man raja maka kuturiken man bana kai antusen nipina e.”

²⁵Minter ibaba Ariok si Daniel ku adep-adepen Raja Nebukadnesar, janah nina man raja, “O Raja, enggo jumpa aku ras sekalak tabanen kalak Jahudi si ngasup nuriken antusen nipindu e.”

²⁶Nina raja kempak Daniel (si igelari ka pe Belsasar), “Ngasup kam nurikenca kai nipingku e ras kai antusenna?”

²⁷Ngaloi Daniel, “O Raja, labo lit guru si baso, guru permangmang, guru pertendung tah pe ahli bintang si ngasup nurikenca man bandu.

²⁸Tapi lit kap Dibata i Surga si mpetangkas rahasia-rahasia. Man bandu, o Raja, enggo iturikenNa kai si nandangi jadi i bas paksa si reh. E maka genduari kuturiken me man bandu nipindu e, pengenehenen si iidahndu tupung kam tunduh.

²⁹Tupung kam tunduh, o Raja, ernipi kam kerna paksa si reh; janah Dibata, si mpetangkas rahasia-rahasia, encidahkenca bandu kai si nandangi jadi.

³⁰Rahasia e enggo ipetangkasNa man bangku, labo erkiteken aku pentaren asangken kalak si deban, tapi gelah ietehndu antusen nipindu e, janah iertindu perukuren si lit i bas kam.

³¹O Raja, i bas pengenehenndu e iidahndu tedis i lebe-lebendu sada gana-gana si mbelin kal, erndihawa dingen ersinalsal, janah tempasna mejin kal man tatapen.

³²Takal gana-gana e emas murni, tentenna ras tanna pirak, beltekna, awakna ras buta-butana, tembaga;

³³pahana besi, janah nahena deba besi, deba taneh dah.

³⁴Tupung ipernehenndu gana-gana e, lit sada batu megulang i bas lingling nari, tapi labo manusia si nggulangkenca. Itendengna tapak-tapak gana-gana si ibahan i bas besi ras taneh dah nari e, minter pecah.

³⁵Rempet, besi, taneh dah, tembaga, pirak, ras emas ndai meripuk, e maka enggo bali ras abu i bas ingan pengeriken paksa perlego. Iembusken angin abu ndai, bekasna pe lanai lit. Tapi batu megulang si nendeng gana-gana ndai jadi sada deleng si meganjang nggemgemi doni enda kerina.

³⁶Enda me kap nipi ndai. Genduari kuturiken bandu antusenna.

³⁷O Raja, kam kap raja si mbelinna i bas kerina raja-raja. Dibata nu langit enggo ngangkat kam jadi raja, janah iberekenNa bandu kuasa, gegeh, ras kemulian.

³⁸IendeskenNa ku bas kuasandu kerina doni si ingani manusia, bage pe perik-perik ras rubia-rubia si deban. Kam kap takal emas e.

³⁹Kenca kam, lit me piga kerajan si deban, la bagi kerajanndu e belinna; kenca si e kerajan si peteluken, kerajan tembaga, si ngkuasai kerina doni enda.

⁴⁰Kenca bage lit kerajan si peempatken, bali mersikna ras besi, si ngeripukken ras merperken kerinana, iripukkenna me kerina kerajan-kerajan si enggo lit leben.

⁴¹Iidahndu pe maka tapak-tapak ras jari-jari gana-gana e deba taneh dah, deba ka besi. Enda ertina kerajan e erbelah-belah. Deba bagi besi mersikna, sabap bagi si iidahndu e lit campurna besi ras taneh dah.

⁴²Jari-jari nahena deba besi, deba taneh dah; enda ertina deba kerajan e enteguh deba merampek.

⁴³Iidahndu ka pe maka besi campur ras taneh dah. Enda ertina peminpin-peminpin kerajan e icubakenna mpersadaken keluarga-keluargana arah perjabun sapih-sapih ia, tapi labo banci jadi, bali ras besi la banci ersada ras taneh dah.

⁴⁴Tupung paksa penguasa-penguasa ndai, ipanteki Dibata nu langit me sada kerajan si la ermasap-masap. Ndigan pe la tertaluken, tapi ikernepkenna me seh keri kerajan-kerajan si deban, janah kenca bage pajek ia rasa lalap.

⁴⁵Iidahndu maka lit sada batu naktak i bas lingling nari amin gia la lit si ngkuitca, jenari ipecahkenna gana-gana si ibahan i bas besi, tembaga, taneh dah, pirak, ras emas e. Arah e Dibata si mbelin ngataken man bandu, o Raja, kai si nandangi jadi i bas paksa si reh. Dage enggo kuturiken man bandu sue kal ras nipindu e, bage pe antusenna rikutken si tuhu-tuhuna.”

⁴⁶Kenca bage nembah mungkuk Raja Nebukadnesar i lebe-lebe Daniel, ayona seh ku taneh. Jenari minter iperentahkenna erbahan persembahen dingen nutung kumenen man Daniel.

⁴⁷Nina raja, “Dibatandu me Dibata si mbelinna i babo kerina dibata-dibata, Tuhan i babo raja-raja, janah Ia kap si mpetangkas rahasia-rahasia. Si enda kueteh sabap ngasup kam nuriken rahasia enda.”

⁴⁸Kenca bage iberekenna pangkat meganjang man Daniel, janah ipersembahkenna bana erbage-bage pemere si mejile. Iangkatna ia jadi penguasa propinsi Babilon, janah ibahanna jadi kepala kerina penasehat kerajan Babilon.

⁴⁹Arah pemindon Daniel, iangkat raja pe Saderah, Mesah, ras Abednego njujurken propinsi Babilon, tapi Daniel tetap ringan i bas istana kerajan.