Read Batak Karo DANIEL 4 Bible Online

DANIEL 4 - Batak Karo bible

DANIEL 4

¹Raja Nebukadnesar nenahken berita si tersena arah teruh enda man kerina bangsa, suku ras cakap i bas doni enda, “Mejuah-juah!”

²Mehuli kuakap ibegikenndu turi-turin kerna tanda si mejin ras tanda kuasa si icidahken Dibata si Meganjangna man bangku.

³Mbelin kal tanda si ibahan Dibata, mamang kal ate ngenehen kembisanNa. KinirajanNa lalap lit asa si ndekah-ndekahna, ersundut-sundut Ia tetap erkuasa.

⁴Senang kuakap nggeluh i bas istanangku, ngenanami kebayakenku si mbelin.

⁵Tapi sanga aku tunduh lit nipingku si mahanca aku tersengget bage pe pengenehenen si mahanca aku mbiar.

⁶Kusuruh gelah ibaba ngadap kerina penasehat kerajan Babilon maka banci iturikenna antusen nipi e.

⁷Kenca bage kerina guru-guru si ngoge nasip, guru permangmang, guru si baso, ras ahli bintang, ibaba ngadap man bangku. Kenca kuturiken nipingku man bana, sada pe ia la ngasup mereken antusenna.

⁸Kenca bage ngadap me si Daniel. (Ia igelari pe Belsasar, sue ras gelar dibatangku.) I bas ia lit kesah dibata-dibata si badia, e maka kuturiken bana nipingku. Ningku man bana,

⁹“O Belsasar, pengulu guru-guru si ngoge nasip, kueteh maka kesah dibata-dibata si badia lit i bas kam, janah ietehndu kerina rahasia-rahasia. Enda me nipingku; turikenlah antusenna.

¹⁰Tupung aku tunduh, lit kuidah i bas pengenehenen sada batang kayu lanai kal langlang belinna i tengah-tengah doni.

¹¹Reh dekahna reh belinna batang kayu e janah dungna seh ku langit dingen kerina kalak i doni enda banci ngidahsa.

¹²Bulungna mejile, buahna meramis, seh maka bias man pangan kerina doni enda. Rubia-rubia si meliar cilinggem i teruhna, perik-perik rasar i bas dahanna, janah kasa kai si nggeluh atan mangani buahna.

¹³Tupung aku rukur-rukur i bas pengenehenen e, kuidah malekat nusur i Surga nari, sada malekat penjaga.”

¹⁴Imomokenna alu sora megang nina, “Tabahlah batang kayu e, tektek dahan-dahanna. Agui bulungna seh keri, kerapkenlah buahna. Gera rubia-rubia e i teruhna nari bage pe perik-perik i bas dahan-dahanna nari.

¹⁵Tapi pelepas tongkehna i bas taneh, dingen iket alu besi ras tembaga, i tengah mbalmbal si meratah. Pelepas namur nusur ku ia, pelepas ia nggeluh ras rubia-rubia ras dukut-dukut.

¹⁶Pitu tahun dekahna perukurenna lanai bagi perukuren manusia, tapi perukuren rubia-rubia.

¹⁷Enda me keputusen i bas kerina malekat penjaga e. Dage ieteh manusia min i japa pe, maka Dibata si Meganjangna erkuasa nandangi kerajan-kerajan manusia janah banci iberekenna man ise atena ngena, subuk man kalak si musilna pe.”

¹⁸Enda me nipingku ndai nina Raja Nebukadnesar, “Genduari o Belsasar, turikenlah bangku kai antusenna. La lit sekalak pe i bas penasihatku si ngasup nurikenca; tapi kam tentu ngasup, sabap kesah dibata-dibata si badia lit i bas kam.”

¹⁹Megi si e, Daniel, si igelari pe Belsasar, seh kal biarna, e maka la ia ngasup melasken sengkebabah kata pe. Nina raja man bana, “O Belsasar ola pelepas nipi e ras antusenna mahanca kam mbiar.” Erjabap Belsasar, “O Raja kerna musuhndu min ndai kata nipi e ras antusenna, ola kerna kam.

²⁰Batang kayu si meganjang, si seh ku langit, si banci iidah kerina kalak i doni.

²¹Bulungna si mejile, buahna si meramis bias man pangan kerina doni, batang kayu si man ingan cilinggem rubia-rubia si meliar i teruhna, dingen perik-perik i bas dahanna,

²²batang kayu e, kam kap e raja, raja si meganjang ras megegeh. Kam enggo jadi meganjang seh ku langit, janah kuasandu seh ku kerina tampuk doni.

²³Tupung ipernehen kam, o Raja, lit sada malekat nusur i Surga nari janah nina, ‘Tabah batang kayu e, kernepkenlah, tapi pelepas tongkehna i bas taneh. Rempu tongkehna e alu besi ras tembaga, janah pelepas ia i bas mbalmbal ras dukut si meratah. Pelepas namur nusur ku ia, janah berelah ia nggeluh ras rubia-rubia pitu tahun dekahna.’

²⁴Enda kap antusenna si e, o Raja, janah enda kap si ikataken Dibata si Meganjangna nandangi jadi bandu.

²⁵I pedarat me kam i tengah-tengah manusia nari, jenari ringan me kam ras rubia-rubia si meliar. Pitu tahun dekahna kam man dukut bali ras lembu, janah medem i tengah mbalmbal, i ja namur nusur ku kam. Kenca bage iakuindu me maka Dibata si Meganjangna kap si ngaturken kerina kerajan manusia, janah banci iberekenNa man ise atena.

²⁶Isuruh malekat ndai maka tongkeh kayu e itadingken i bas taneh. Enda ertina kam jadi raja ka pagi mulihi kenca iakuindu maka Dibata kap si ngerajai kerina doni enda.

²⁷Dage o raja ikutkenlah nasihatku enda. Olanai kam erbahan dosa, lakokenlah si bujur, janah mekuahlah atendu man kalak musil. Kenca bage maka tetap senang geluhndu.”

²⁸Si ndai tuhu-tuhu jadi man Raja Nebukadnesar.

²⁹Sepuluh dua bulan kenca si ndai, tupung ia erdalan-dalan i das loteng tarum istanana i Babil,

³⁰nina, “Nehenlah uga belinna Babil! Kupajekken e jadi ibu kuta alu kuasa ras gegehku, guna kemulian ras kehaganku.”

³¹Lenga denga luar pe kata-kata e i bas babahna nari, lit sada sora i Surga nari nina, “O Raja Nebukadnesar, begiken katangku! Genduari kinirajanndu ibuat i bas kam nari.

³²Kam ipedarat i tengah-tengah manusia nari, nggeluh kam ras rubia-rubia si meliar, janah dukut jadi panganndu bali ras lembu. Kenca bage iakuindu me maka Dibata si Meganjangna erkuasa nandangi kerajan manusia, janah banci iberekenNa kerajan e man ise ateNa.”

³³E maka minter jadi bagi kata ndai, Nebukadnesar ipedarat i tengah manusia nari, ipanna dukut bali ras lembu. Namur nusur ku dagingna, bukna turah seh asa mbulu rajawali gedangna, bage ka pe silu-siluna bali ras silu-silu perik.

³⁴Nina Raja Nebukadnesar, “Kenca lepas si pitu tahun ndai, kutare ku langit e maka enggo jore ukurku mulihi. Kupuji Dibata si Meganjangna, janah kupehaga dingen kupemuliaken Ia si nggeluh rasa lalap. Rasa lalap Ia erkuasa, kinirajanNa tahan asa si ndekah-ndekahna.

³⁵Manusia i bas doni la kai pe akapNa; malekat i Surga ras manusia i doni Ia ngatursa. La ise pe ngasup ngelawan peratenNa la ise pe banci nungkun, ‘Kai si ibahanNdu e?’

³⁶Kenca jore ukurku mulihi, dolatku, kehaganku, ras kemulianku iberekenNa man bangku mulihi. Pegawai-pegawaiku ras kalak mbelin ngalo-ngalo aku, janah kuasa kerajanku ibereken mulihi man bangku, janah lebihen pe asa dolatku si nggo-nggona.

³⁷E maka genduari, aku, Nebukadnesar, kupuji, kupehaga, ras kupermuliaken Raja Surga. Kai si ibahanNa benar ras bujur kap, janah ngasup Ia mpeteruk ise si erbahan alu ukur meganjang.”