Read Batak Karo DANIEL 5 Bible Online

DANIEL 5 - Batak Karo bible

DANIEL 5

¹I bas sada berngi Raja Belsasar ngundang kalak si mbelin-mbelin seribu kalak, ku kerja man-man si meriah, dingen minem-minem lau anggur ras-ras.

²Tupung minem-minem ndai Belsasar nuruh kalak ngelegi cangkir emas ras pirak si iangkat bapana Nebukadnesar i bas Rumah Pertoton si i Jerusalem nari. Isuruh raja ngelegi cangkir-cangkir e kerina gelah ia ras kalak si mbelin-mbelin ras ndeharana kerina, bage pe gundik-gundikna banci minem tare cangkir e.

³Minter ibaba kalak cangkir emas ras pirak e ku bas, e maka minem anggur ia kerina taresa,

⁴dingenna muji dibata-dibata si ibahan i bas emas, pirak, tembaga, besi, kayu ras batu nari.

⁵Rempet reh sada tan manusia, ndarat i bas dingding istana, i ja terang lampu seh kal harharna. Raja ngidah tan ndai sangana nurat.

⁶Mbulan ayo raja perban biarna, tiwenna nggirgir.

⁷Serko ia nuruh kalak gelah ngelegi guru permangmang, guru si baso, ras ahli bintang. Kenca bengket guru-guru e nina raja man bana, “Ise beluh ngoge ras ngataken erti surat enda man bangku, ia kuuisi alu jubah si meherga dingen mehaga, iburai alu rante emas, dingen man bana ibereken kuasa si peteluken i bas kerajan enda.”

⁸E maka rehen guru-guru si jadi penasehat raja e, tapi la lit sada pe beluh ngogesa tah ngataken ertina man raja.

⁹Perban biarna, reh mbulanna ayo Raja Belsasar. Kalak si mbelin-mbelin si ras ia pe lanai itehna kai si man bahanen.

¹⁰Nande raja megi sora gejek si ibahan raja ras kalak si mbelin-mbelin ndai, e maka bengket ia ku ingan man-man e. Nina, “Rasa lalaplah raja nggeluh! Ola min gulut ukurndu janah ola sambar ayondu.

¹¹Lit sekalak dilaki i bas kerajanndu enda si lit i bassa kesah dibata-dibata si badia. Tupung bapandu mbarenda nggeluh denga, kalak si kukataken enda ndai enggo encidahken pengertinna ras kebeluhenna si mehuli, ras kepentaren si seri ras kepentaren dibata-dibata. E maka bapandu Raja Nebukadnesar ngangkat ia jadi kepala guru-guru si ngoge nasip, guru permangmang, guru si baso, ras ahli bintang.

¹²I bas ia lit kecerdiken si luar biasa, janah pentar dingen beluh kal ia ngertiken nipi, njabap kuning-kuningen ras nerangken rahasia-rahasia. E maka dilolah dilaki e, e me si Daniel, si ibahan raja gelarna Belsasar, maka iturikenna man bandu kai ertina si enda.”

¹³E maka ibaba minter Daniel ngadap man raja nina raja man Daniel, “Kam kin si Daniel, kalak Jahudi buangen si ibaba bapangku ku jenda i Juda nari?

¹⁴Enggo kubegi maka i bas kam lit kesah dibata-dibata si badia, janah kam tuhu-tuhu cerdik, beluh dingen pentar.

¹⁵Penasehat-penasehat ras guru-guru permangmang enggo ibaba ku jenda lako ngoge surat ah janah nuriken kai ertina bangku, tapi la datca ertina.

¹⁶Tapi enggo kubegi maka kam ngasup ndatken erti si terbuni dingen nuriken kai si rahasia. Adi beluh kam ngoge surat ah ras ngataken ertina man bangku, iuisi me kam alu jubah si meherga dingen mehaga, janah iburaken i bas kerahungndu rante emas, dingen man bandu ibereken kuasa si peteluken i bas kerajan enda.”

¹⁷Ngaloi Daniel nina, “Man bandulah pemerendu e, di lang bereken man kalak si deban. Amin bage pe kuogeken nge man bandu kai si enggo tersurat janah kuturiken kai ertina.

¹⁸Dibata si Meganjangna erbahan bapandu Nebukadnesar jadi sekalak raja si mbelin janah iberekenNa bana dolat ras kehagan.

¹⁹Ia sekalak raja tuhu mbelin, seh maka kerina bangsa, suku, ras cakap, mbiar man bana dingen nggirgir. Ise atena ibunuhna, ibunuhna; ise atena la ibunuhna, ipelepasna nggeluh. Ipehagana tah ipeterukna kalak bagi ate-atena.

²⁰Tapi erkiteken ukurna jadi meganjang, pusuhna batu-batun, janah rate-ate ia, e maka ipelawes ia i bas kursi kinirajanna nari, janah dolatna pe ibuat i bas ia nari.

²¹Ia ipedarat i tengah-tengah manusia nari, janah perukurenna jadi bali ras rubia-rubia. Ia nggeluh ras kelede si meliar, dukut jadi nakanna bali ras lembu. Ia medem i tengah mbalmbal, dagingna litap ibahan namur si nusur i langit nari. Kedungenna iakuina maka Dibata si Meganjangna kap si ngaturken kerina kerajan manusia, janah banci iberekenNa man ise pe ateNa.

²²Tapi kam, anakna la ipeterukndu ukurndu aminna itehndu pe kerina si enda.

²³Ilawanndu Tuhan nu langit; ipakendu cangkir ras mangkuk si ibuat i bas Rumah PertotonNa nari; kam, kalak si mbelin-mbelin, ndehara-ndeharandu, ras gundik-gundikndu nginem anggur taresa dingen ipujindu dibata-dibata si ibahan i bas emas nari, pirak, tembaga, besi, kayu, ras batu, e me dibata-dibata si la erpengidah tah erpemegi dingen si la lit kai pe pemetehna. Tapi la ihamatindu Dibata si nentuken pate geluhndu, si ngaturken kerina perbahanenndu.

²⁴Em sabapna maka isuruh Dibata tan e nuratken kata-kata ah.

²⁵Enda me kai si tersurat ah: MENE, MENE, TEKEL, UPARSIN.

²⁶Antusenna e me kap: bilangen, enggo ibeligai Dibata wari-wari kinirajandu, janah ipeltepkenNa;

²⁷timbangen, kam enggo itimbang i bas timbangen, janah teridah maka kam menahangsa;

²⁸pembagin, kerajanndu ibagi-bagiken jenari ibereken man kalak Medi ras Persia.”

²⁹Kenca bage minter isuruh Belsasar juak-juakna nguisi Daniel salu jubah si meherga dingen mehaga janah iburaken i bas kerahungna rante emas. Kenca bage iangkatna Daniel jadi kalak si peteluken erkuasa i bas kerajan e.

³⁰I bas berngi e Belsasar, raja Babilon e, ibunuh kalak;

³¹kerajanna ndabuh ku bas tan Darius kalak Medi, si umurna tupung e enem puluh dua tahun.