Read Batak Karo DANIEL 6 Bible Online

DANIEL 6 - Batak Karo bible

DANIEL 6

¹Mehuli iakap Darius ngangkat seratus dua puluh gubernur si nitugasken i belang-belang kerajanna.

²Tambah si e iangkatna Daniel ras dua kalak si deban jadi wakilna mperdiateken pendahin gubernur-gubernur e.

³Minter teridah pendahin Daniel ndauh ulin asangken wakil-wakil raja si debanna bage pe asangken kerina gubernur-gubernur e. Erkiteken si e, ersura-sura raja ngangkat ia jadi wakilna ngaturken kerina kerajan.

⁴Kenca bage wakil-wakil raja si debanna bage pe gubernur-gubernur e erpala-pala ndarami kesalahen Daniel i bas ia ngaturken kerajan e, tapi la datca. Sabap Daniel terteki i bas pendahinna janah la lit sitik pe ibahanna si salah ras si la bujur.

⁵E maka nina kalak ndai sapih-sapih ia, “Labo banci sidat dalanna ngaduken Daniel seakatan arah aturen agamana.”

⁶E maka lawes kalak ndai ngadap raja, janah nina, “O Raja Darius, rasa lalaplah kam nggeluh.

⁷Kerina kami si ikut ngaturken kerajanndu enda, wakil-wakil raja, gubernur-gubernur, ras wakil-wakil gubernur, bage pe pegawai-pegawai si deban, enggo ersada ukur maka ipedaratndu min sada perentah si arus ipatuhi, e me kidekah telupuluh wari la banci ise pe mindo kai-kai pe man dibata-dibata tah pe man manusia seakatan man bandu saja. Ise ngelanggar perentah enda, iambekken ku bas lubang ingan singa.

⁸Dage ipedaratndulah perentah e, jenari tamaken capndu i je maka perentah e enggo esah jadi undang-undang Medi ras Persia si lanai banci iobah-obah.”

⁹E maka itamaken Raja Darius capna i bas perentah ndai.

¹⁰Kenca ieteh Daniel maka perentah e enggo iesahken, mulih ia ku rumahna. I das loteng rumahna e lit sada kamar jendelana ngala kempak Jerusalem. Bagi semalna, erjimpuh ia i je ertoto man Dibata telu kali sada wari, janah jendelana talang.

¹¹Kenca imbang-imbang Daniel ngidah ia ertoto man Dibata,

¹²kerina ia lawes ngadap raja lako ngaduken Daniel. Nina, “Enggo ibahanndu perentah maka telu puluh wari, kasa kalak si mindo man dibata-dibata tah manusia seakatan man bandu, la banci lang iambekken ku bas lubang ingan singa.” Erjabap raja, “Payo, janah e sada perentah si arus ipatuhi, sada undang-undang Medi ras Persia si la banci iobah-obah.”

¹³Kenca bage nina man raja, “Daniel, sekalak buangen i Juda nari, la mehamat man bandu raja, janah la ipatuhina perentahndu e, ia ertoto telu kali sada wari.”

¹⁴Kenca ibegi raja si enda, ceda kal atena. E maka idaramina kal dalan lako mulahi Daniel. Seh ben wari lalap icubakenna ngukurkenca.

¹⁵Kenca bage reh kalak ndai mulihi ngadap man raja nina, “O raja, etehndu maka sue ras undang-undang Medi ras Persia perentah raja la banci sada pe iobah-obah.”

¹⁶E maka iperentahken raja gelah Daniel itangkap, jenari ibenterken ku bas lubang ingan singa. Nina raja man Daniel, “Dibatandu, si isembahndu alu patuh, Ialah si mulahi kam.”

¹⁷Kenca bage itamaken me sada batu jadi tutup lubang e, janah itamaken raja capna ras cap kalak si erpangkat mbelin i bas batu e, gelah ola ise pe banci mulahi Daniel.

¹⁸Jenari mulih raja ku istanana. Gedang-gedang berngi e la ia tunduh, la man, janah la ia nggit ngenehen keriahen kai-kai pe.

¹⁹Erpagi-pagi si lampas keke raja, jenari pedas-pedas ia ku lubang e.

²⁰Kenca seh i je, alu sora nggirgir ilebuhna Daniel nina, “O Daniel, suruh-suruhen Dibata si nggeluh! Ngasup kang Dibata si isembahndu alu tutus e ngkelini kam i bas singa-singa e nari?”

²¹Ngaloi Daniel, “O Raja, rasa lalaplah kam nggeluh!

²²Dibata nuruh malekatna nutupi babah singa-singa e gelah ola aku isakitina. Si enda ibahan Dibata sabap ietehNa aku bujur, janah la lit kubahan si salah man bandu, o Raja.”

²³Lanai kal tanggung riahna ukur raja e maka iperentahkenna ngerintak Daniel i bas lubang e nari. Dage irintak me Daniel ku das, janah teridah maka la kena kai pe ia, perban ernalem man Dibata.

²⁴Kenca bage iperentahken raja nangkap kerina kalak si ngaduken Daniel e, jenari ibenterken ku bas lubang ingan singa e, radu ras ndehara-ndeharana ras anak-anakna pe. Ope denga seh i teruh pe, enggo irigep singa e ia, janah iripukkenna tulan-tulanna.

²⁵Kenca bage ibahan Raja Darius surat man kerina bangsa, suku, ras cakap i doni, bagenda katana, “Mejuah-juah kam kerina!

²⁶Arah enda kuperentahken maka kerina kalak i bas kerajanku arus mbiar ras mehamat man Dibata si isembah Daniel. Ia kap Dibata si nggeluh rasa lalap ia merentah. KinirajanNa rasa lalap la termasapken, kuasaNa rasa lalap la erkeri-kerin.

²⁷Ia kap si ngkelini ras si mulahi manusia; ibahanNa tanda si mejin ras tanda kuasa, subuk i Surga bage pe i doni enda. I bas singa si merawa nari, Daniel ipulahiNa.”

²⁸Senang iakap Daniel nggeluh kidekah pemerentahen Darius ras pemerentahen Kores, kalak Persia e.