Read Batak Karo DANIEL 7 Bible Online

DANIEL 7 - Batak Karo bible

DANIEL 7

¹I bas tahun si pemena sanga Belsasar jadi raja i Babilon, i bas sada berngi ernipi aku, janah kuidah sada pengenehenen. Kusuratken nipingku e janah enda me turi-turin,

²kerna kai si kuidah i bas berngi e: Angin rembus kerina dampar nari, janah lau lawit si mbelang mesangat pengembusna.

³E maka mulgap empat rubia-rubia si galang i bas lawit nari, pelain-lain tempasna sada ras si debanna. [3†]

⁴Rubia-rubia si pemena tempasna bagi singa, tapi lit kabengna bagi kabeng rajawali. Sanga kupernehen, mesepak kabengna e. Rubia-rubia e iangkat, jenari ipetedis bagi manusia. Kenca bage man bana ibereken ukur manusia. [4†]

⁵Rubia-rubia si peduaken tempasna bagi beruang, tedis alu nahena si arah pudi. I bas babahna ikaratna telu rangrang. E maka lit sada sora ngatakenca nina, “Terusken, panlah daging asa besurndu!”

⁶Tupung kupernehen, mulgap ka rubia-rubia si deban. Tempasna bagi arimo tapi i bas gurungna lit empat kabeng, seri ras kabeng perik. Takalna lit empat; janah teridah kal ia erkuasa.

⁷Sanga aku ngenen-ngenen, mulgap ka rubia-rubia si peempatken. Rupana mejin janah man kebiaren, seh kal gegehna. Alu ipen besina ingatngatina kai si ijerngemna, jenari iperjakina seh melumat. Si enda la bali ras rubia-rubia si deban, janah lit sepuluh tandukna. [5†]

⁸Sanga kuperdiateken tandukna e, kuidah sada tanduk si kitik-kitik turah i kelang-kelang tanduk si deban. Telu i bas tanduk si enggo lit ndai meruah ibahanna. Tanduk si kitik-kitik e ermata bagi mata manusia, janah babahna melasken cakap si megombang. [6†]

⁹Sanga kupernehen, itamaken me piga-piga kursi kinirajan i bas inganna. Ia si enggo nggeluh rasa lalap kundul i bas sada kursi. Uisna mbentar bagi salju, janah bukna bali ras mbulu biri-biri si la lit man pandangen. Kursi kinirajanna e me api si gurlah, janah rodana api si gara. [7†]

¹⁰Api ndarat i bas kursi e nari desken lau maler. I je lit meribu-ribu kalak si erdahin guna ia, janah erjuta-juta manusia tedis i adep-adepenna. Ibenaken me pengadilen e, jenari italangi me kitap-kitap kerina. [8†]

¹¹Tupung aku ngenehen ku je, kubegi denga tanduk si kitik-kitik ndai melasken cakap meganjang alu megombang. Sanga kuperdiateken, rubia-rubia si peempatken ibunuh, jenari bangkena ibenterken ku gara api e seh keri meseng.

¹²Rubia-rubia si deban ibuat kuasana, tapi ipelepas denga nggeluh seh paksa si tertentu.

¹³I bas pengenehenenku berngi e, kuidah sekalak manusia, nusur tare embun, jenari idahina ia si nggeluh rasa lalap e, jenari ibaba ngadap. [9†]

¹⁴Man bana ibereken kuasa, kehamaten, ras kuasa kinirajan, gelah kerina manusia i bas tep-tep bangsa, suku, ras cakap, nembah man bana. Kuasana rasa lalap la ermasap-masap, janah kinirajanna la erkeri-kerin. [10†]

¹⁵Pengenehenen si kuidah ndai mahanca gulut ukurku, janah mbiar pe aku.

¹⁶Kudeheri kalak si tedis i je jenari kusuruh ia nuriken antusenna man bangku. E maka iturikenna bangku antusenna.

¹⁷Nina, “Rubia-rubia si galang si empat e, e me empat kerajan si nandangi pajek i doni.

¹⁸Janah bangsa Dibata si Meganjangna, ngaloken kuasa kinirajan me pagi, janah i bas ia me kuasa e asa si ndekah-ndekahna.” [11†]

¹⁹Kenca bage merincuh aku metehsa tole kerna rubia-rubia si peempatken e, si la bali ras rubia-rubia si deban, e me rubia-rubia si mejin si ngeripukken alu silu-silu tembagana ras alu ipen besina, janah kenca bage iperjakina.

²⁰Janah merincuh aku meteh kerna tandukna si sepuluh i bas takalna bage pe tanduk si pudin turahna si mahanca telu tanduk si deban ndabuh. Lit matana janah babahna melasken cakap meganjang alu megombang. Rubia-rubia si e belinen asangken si debanna.

²¹Tupung kupernehen, tanduk ndai erperang ras bangsa Dibata jenari italukenna bangsa Dibata e. [12†]

²²Kenca bage, ia si nggeluh rasa lalap e reh mereken putusen si bujur man bangsa Dibata si Meganjang e. Paksana enggo seh maka bangsa Dibata ngaloken kuasa kinirajan. [13†]

²³Enda me keterangen si iberekenna man bangku, “Rubia-rubia si peempatken e me kerajan si peempatken si turah pagi i doni, janah la bali ras kerina kerajan-kerajan si deban. Doni enda iripukken dingen iperjakina.

²⁴Tanduk si sepuluh e, e me sepuluh kalak raja si erkuasa i bas kerajan e. Kenca bage reh me sada raja si deban, raja si enda lain kal ras raja-raja si debanna si leben asa ia, janah idabuhkenna telu kalak raja. [14†]

²⁵Cakapna ngelawan Dibata si Meganjangna janah bangsa Dibata itindihna. Icubakenna ngobahken undang-undang agamana ras wari-wari raya janah bangsa Dibata lit i teruh kuasana telu setengah tahun dekahna. [15†]

²⁶Kenca bage runggu me pengadilen Surga, jenari ibuatna kuasa raja e, janah ikernepkenna raja e seh masap.

²⁷Kuasa ras kemulian, ras kerina kerajan si i doni ibereken man bangsa Dibata si Meganjangna. Kuasa kinirajanna rasa lalap la erkeri-kerin, janah kerina pemerentah i doni erdahin janah patuh man bana.” [16†]

²⁸Enda me pendungi turi-turin e. Mbiar kal aku, e maka mbulan ayongku, janah kerina kubuniken i bas ukurku.